XANNAꞌIYO HUUPHE YOHUWA 36
MAZAMURE 103 Henttanchchata—Imota Gidida Asata
‘Cimata Xeega’
“I galchchaa cimata baakko xeego.”—YAQ. 5:14.
TAMAARANABAA
Ayyaanaaban nuussi maadoy koshshiyo wode cimata oychchiyogee keehi koshshiyoy aybissakko beꞌana.
1. Yihoowi ba dorssata xoqqu ootti xeelliyogaa waati bessidee?
YIHOOWI ba dorssata xoqqu ootti xeellees. I eta Yesuusa suuttan shammiis; qassi Ba wudiya heemmanaadan galchchaa cimata sunttiis. (Oos. 20:28) Xoossay ba ashkkarata cimati siiquwan oyqqanaadan koyees. Cimati dorssata minttettiyogaaninne ayyaanaaban qohiyabaappe naagiyogan Kiristtoosa kaaletuwa kaalloosona.—Isi. 32:1, 2.
2. Hizqqeela 34:15, 16 maaran Yihoowi oona maaddii?
2 Yihoowi ba dorssatu ubbawu qoppikkonne, ayyaanaaban shuggidaageetussi keehi qoppees. Ayyaanaaban shuggidaageeta cimatu baggaara Yihoowi maaddees. (Hizqqeela 34:15, 16 nabbaba.) Shin nuussi maadoy koshshiyo wode Yihoowi nuna ubbaa maaddanawu koyees. Hegaa mala wodetun, maaduwa demmanawu wozanappe Xoossaa woossiyogaa xaalaala gidennan, galchchan ‘heemmiyanne tamaarissiyageetu’ maaduwa oychchoos.—Efi. 4:11, 12.
3. Cimati oottiyobaa pilggiyogee nuna ubbaa waati goꞌꞌana danddayii?
3 Nuuni cimatu baggaara ayyaanaaban maaduwa demmana mala Xoossay giigissidobaa ha huuphe yohuwan pilggana. Qassi ha oyshata zaarana: Nuuni cimata maaduwa oychchana koshshiyoy awudee? Nu yaatana koshshiyoy aybissee? Qassi eti nuna waati maaddiyonaa? Nuuni haꞌꞌi ayyaanaaban mino gidikkokka, ha oyshatu zaaruwa eriyogee Xoossay giigissidobaa loytti nashshanaadan, qassi maadoy koshshiyo wode waatanaakko nuna maaddana.
NUUNI ‘CIMATA XEEGANA’ KOSHSHIYOY AWUDEE?
4. Yaaqooba 5:14-16, 19, 20y ayyaanaaban sahettiya uraabaa yootees giyoy aybissee? (Misiliyakka xeella.)
4 Yihoowi nuna maaddanawu cimata waati goꞌettiyakko Yesuusa kaalliya Yaaqoobi qonccissiis. I hagaadan giis: “Intte giddon sahettiya asi deꞌii? I galchchaa cimata baakko xeego.” (Yaaqooba 5:14-16, 19, 20 nabbaba.) Yuushuwan deꞌiya qofay bessiyogaadan, Yaaqoobi ayyaanaaban sahettiya uraabaa yootiiddi deꞌees. Leemisuwawu, I he sahettiya asi dottoriya gidennan, cimata xeeganaadan yootiis. Qassi he sahettiya izaawu A nagaray atto geetettiyo wode paxiyogaa Yaaqoobi qonccissiis. Issi harggida uri paxanawu dottoriyakko biidi ba harggiyabaa yootana koshshees; yaatidi dottoree yootiyo kaaletuwa kaallana koshshees. Hegaadankka, Yihoowara zaarettidi dabbotanawu nuussi maadoy koshshikko, nuuni cimata haasayissana, nu metuwabaa etawu yootana, yaatidi eti Geeshsha Maxaafaappe nuna zoriyobaa oosuwan peeshshana koshshees.
Nuuni harggiyo wode dottoriyakko boos; nuuni ayyaanaaban sahettiyo wode cimatukko baana koshshees (Mentto 4 xeella)
5. Yihoowara dabbotido nu dabbotay shuggiiddi deꞌiyakko waati erana danddayiyoo?
5 Yaaqooba shemppo 5n, nuuni Yihoowara dabbotido dabbotay shuggiyogaa doommidabadan nuuyyo siyettiyo wode ubban nuuni cimata haasayissanaadan Yaaqoobi minttettiis. Shin nuuni Xoossaara dabbotido dabbotaa keehi mooriyabaa oottanaappe kasetidi maaduwa oychchiyogee keehi loꞌꞌo! Nuuni naagettana xayikko, Yihoowara dabbotennan deꞌiiddi dabbotidabadan qoppana danddayiyogaa Geeshsha Maxaafay yootees. (Yaq. 1:22) Sarddeesan deꞌiya amarida Kiristtaaneti hegaadan hanidosona. Shin Yihoowi etan ufayttiyogaa aggidoogaa Yesuusi yootiis. (Ajj. 3:1, 2) Ayyaanaaban nuuni minokko shaakki erana danddayiyo issi ogee haꞌꞌi haggaaziyo hanotaa kaseegaara geeddarssiyogaana. (Ajj. 2:4, 5) Nuna hagaadan oychchana danddayoos: ‘Taani kaseegaadan tawu danddayettida keenan Geeshsha Maxaafa nabbabiyogaaninne hegaa wotta dentta qoppiyogan ufayttikkinaa? Taani ubba shiiqota shiiqiyogaa aggidanaa? Taani shiiqota shiiqiyo wode giigettennan shiiqiyanaa? Taani kaseegaadan yeemottada haggaaziyogaa aggidanaa? Ta wodiyappe dariyagaa ekkiyabaynne taani darotoo qoppiyobay tana ufayssiyabee woy ta aquwabee?’ Ha oyshatuppe awugaanne ee giidi zaarikko, Yihoowara dabbotido nu dabbotay shuggiiddi deꞌees giyogaa. Qassi nuuni hegaa giigissanawu aybanne oottana xayikko, hegee yaa iiti iiti baana danddayees. Nuuni Yihoowara dabbotido dabbotaa nu huuphen minttana danddayennaba gidikko, woy Yihoowa ufayssennabaa oottidaba gidikko, cimatu maaduwa oychchana koshshees.
6. Gita nagaraa oottidaageeti waatana koshshii?
6 Galchchaappe kiyanaadan oottana danddayiya gita nagaraa oottidaageeti cimata haasayissana koshshiyogee qoncce. (1 Qor. 5:11-13) Gita nagaraa oottida ooyyonne Yihoowara dabbotido dabbotaa zaarettidi giigissanawu maadoy koshshees. Nuuni wozuwa baggaara Yihoowa maarotaa demmanawu ‘zilꞌꞌettidi laamettidoogaa bessiyabaa oottana’ koshshees. (Oos. 26:20) Nuuni yaatana danddayiyo issi ogee gita nagaraa oottikko, hegaa cimatussi yootiyogaa.
7. Cimatu maadoy koshshiyo harati oonee?
7 Cimati gita nagaraa oottidaageetu xalaala gidennan, ayyaanaaban shuggidaageetakka maaddoosona. (Oos. 20:35) Leemisuwawu, neeni iita amuwa xoonana danddayennabadan qoppada hirggana danddayaasa. Neeni Kiristtaane gidanaappe kase jallissiyabaa goꞌettiyagaa, pornograafiya beꞌiyagaa woy pokkobaa oottiyagaa gidikko, iita amuwa eqettiyogee nena keehi deexxana danddayees. He paaceta neeni nerkka baaxetana koshshenna. Ne yootiyobaa loytti ezggiya, neeni iita amuwa ubbatoo eqettanawu laammana danddayiyobata qonccissiya, qassi he iita amuwa neeni ubbatoo eqettikko, Yihoowi keehi ufayttanaagaa nena hassayissiya cimawu yootana danddayaasa. (Era. 4:12) Neeni baaxetiyo baaxee nena unꞌꞌissidaba gidikko, hegee neeni Yihoowara dabbotido dabbotaa xoqqu oottada xeelliyogaanne likkiyappe aaruwan neeni nenan ammanettennaagaa bessiyaba gidiyogaa cimati nena hassayissana danddayoosona.—1 Qor. 10:12.
8. Nuuni balido ubbabaa cimatuyyo yootana koshshii? Qonccissa.
8 Nuuni balido ubbabaa cimatuyyo yootana koshshenna. Leemisuwawu, issi ishaa woy michchiyo qohiyaba haasayadasa, ubba keehi hanqqettadasa giidi qoppoos. Yaanikko, neeni cimaakko biyogaappe Yesuusa zoriya kaallada ne ishaakko woy ne michcheekko baada maarotaa oychcha. (Mat. 5:23, 24) Qassi neeni kaseegaappe aaruwan ashilaalo, danddayanchchanne nena naagiyagaa gidanawu he eeshshatubaa pilggana danddayaasa. Neeni ne metuwa giigissana danddayennaba gidikko, issi cimaa maaduwa oychchana danddayaasa. Kiitettida Phawuloosi Piliphphisiyusa Kiristtaanetussi xaafido dabddabbiyan Ewodinne Sinxxiiki giddon merettida metuwa giigissiyogan sunttay odettibeenna issi ishay maaddanaadan oychchiis. Ne galchchan deꞌiya issi cimaykka hegaa mala ogiyan nena maaddana danddayees.—Plp. 4:2, 3.
NUUNI CIMATA XEEGANA KOSHSHIYOY AYBISSEE?
9. Nuuni nu oottido mooruwan yeellatikkokka, maaduwa demmanawu cimata oychchana koshshiyoy aybissee? (Leemiso 28:13)
9 Nuuni gita nagaraa oottiyo wode woy iita amuwa eqettana danddayennabadan nuuyyo siyettiyo wode maaduwa oychchanawu nuussi ammanoynne xalatettay koshshees. Hegee nuna yeellayiyaba gidikkokka, nuuni cimatuyyo yootana koshshees. Aybissi? Yihoowi nuuni aara dabbotaa minttidi deꞌana mala maaddanawu cimata immido gishshataassa. Hegaappe denddidaagan, nuuni cimatuyyo yootiyo wode Yihoowan ammanettiyogaanne awu azazettiyogaa bessoos. Ubbatoo suurebaa oottanawu A maadoy nuussi koshshiyogaa akeekoos. (Maz. 94:18) Qassi nuuni nagaraa oottikko hegaa paaxiyonne aggiyo wode Xoossaa maarotaa demmana.—Leemiso 28:13 nabbaba.
10. Nuuni nu oottido gita nagaraa cimatuyyo yootennan aggikko aybi hanana danddayii?
10 Nuuni nu oottido nagaraa cimatuyyo yootiyo wode Yihoowi nuuyyo atto gees; qassi zaarettidi aara loytti dabbotana danddayoos. Shin nuuni cimatuyyo yootana xayikko, keehi waayettana. Kawuwa Daawiti ba nagaraa genttanawu malido wode ayyaanaaban, qofan, ubba qassi asatettan qohettiis. (Maz. 32:3-5) Nuuni sahettidi woy nu bollay qohettin, akkamettennan takkikko sahoy yaa gujjana. Hegaadankka, nuuni gita nagaraa oottidi, cimatuppe maaduwa ekkennan takkikko, nu yaa waayettana. Yihoowi hegee hananaadan koyenna gishshawu, nuuni aara zaarettidi dabbotanaadan maaddana mala I goꞌettiyo cimatuyyo yootanaadan nuna minttettees.—Isi. 1:5, 6, 18.
11. Nuuni gita nagaraa cimatuyyo yootennan aggikko, harati waani qohettana danddayiyonaa?
11 Nuuni oottido gita nagaraa cimatuyyo yootennan aggikko, harati qohettana danddayoosona. Yihoowi galchchawu ba ayyaanaa immennaadaaninne ishanttunne michchonttu giddon sarotettay xayanaadan oottana danddayoos. (Efi. 4:30) Qassi galchchan deꞌiya issi uri gita nagaraa oottidoogaa nuuni erikko, I hegaabaa cimatuyyo yootanaadan minttettana koshshees.a Nuuni hara uri oottido gita nagaraa genttikko, nuunikka mooranchcha gidoos. (Wog. 5:1) Nuuni Yihoowa siiqiyo gishshawu issi uri gita nagaraa oottikko, hegaa cimatuyyo yootoos. Yaatiyogan, nuuni ubbatoo galchchay geeshsha gidanaadaaninne nagaraa oottidaagee zaarettidi Yihoowara loytti dabbotanaadan maaddoos.
CIMATI NUNA WAATI MAADDIYONAA?
12. Ayyaanaaban shuggidaageeta cimati waati maaddiyonaa?
12 Cimati ayyaanaaban shuggidaageeta maaddanaadan Geeshsha Maxaafay azazees. (1 Tas. 5:14) Neeni nagaraa oottikko, cimati ne qofaanne neeyyo siyettiyabaa akeekanawu oyshata oychchana danddayoosona. (Lee. 20:5) Cimatussi yootiyogee nena deexxana danddayees. Neeni hanidabaa yootanawu yeellatana woy yayyana danddayaasa. Shin nena gakkiiddi deꞌiya paaciya etawu yootikko eta maaddana danddayaasa. Qassi taani balabaa haasayaneeshsha gaada hirggoppa. (Iyy. 6:3) Cimati ne haasayidoban pirddanawu eesotokkona. Shin eti Geeshsha Maxaafaa goꞌettidi nena zoranaappe kase hanotaa wurssidi akeekanawu ne yootiyobaa loytti ezggoosona. (Lee. 18:13) Wudiya heemmiyogee wode ekkiyaba gidiyogaa eti eriyo gishshawu, issitoo haasayissiyogan xalaalan metoy giigana giidi qoppokkona.
13. Cimatu woosaynne eti Geeshsha Maxaafaappe yootiyo kaaletoy nuna waati maaddana danddayii? (Misiliyakka xeella.)
13 Cimati neeni oottidoban keehi azzananaadan oottanawu koyokkona. Eti ne gishshaa woossana. ‘Wolqqaamabaa oottiya’ eta woosaa Yihoowi siyana. Neeni qoppana danddayiyogaappe aaruwan minettananne woppu gaana. Eti ‘Yihoowa sunttan ne bolli zaytiya tiyiyogankka’ nena maaddana. (Yaq. 5:14-16) Ha ‘zaytee’ Xoossaa Qaalaa tumaa qonccissees. Yaatiyo gishshawu nena minttettananne neeni Yihoowara zaarettada loytta dabbotanaadan maaddana danddayiya Geeshsha Maxaafaa xiqiseta cimati nenaara tobboosona. (Isi. 57:18) Eti Geeshsha Maxaafaappe yootiyo kaaletoy neeni suurebaa ubbatoo oottanawu murttido murttiya minttana danddayees. “Ogee hagaa; an biite” yaagiya Yihoowa cenggurssaa eta baggaara siyana danddayaasa.—Isi. 30:21.
Cimati Geeshsha Maxaafaa goꞌettidi nuna woppissoosonanne minttettoosona (Mentto 13-14 xeella)
14. Galaatiya 6:1y yootiyogaadan, cimati ‘wora simmida’ ura waati maaddiyonaa? (Misiliyakka xeella.)
14 Galaatiya 6:1 nabbaba. ‘Wora simmida’ issi Kiristtaanee Xoossay kessido xillotettaa maaratuura maayettiya ogiyan deꞌenna. Geella I eeyyabaa kuuyennan woy gita nagaraa oottennan aggenna. Cimati bantta ishaa siiqiyo gishshawu ‘kehatettan A suure ogiyawu zaaranawu’ baaxetoosona. ‘Suurissite’ geetetti birshshettida Giriiketto qaalay meqqida meqettay maaraa paxanaadan issi dottoree waati sitti oottiyakko qonccissees. Issi gooba dottoree meqettaa sittissanawu baaxetiyo wode darin sahissennaadan naagettees. Hegaadankka, cimati wora simmida issi ura zaaranawu baaxetiyo wode bantta ishay daro waayettanaadan koyokkona. Eti bantta ishaa kehatettan zoranawu banttawu danddayettida ubbabaa oottoosona. Qassi cimati ‘naagettanaadan’ Geeshsha Maxaafay yootees. Cimati Geeshsha Maxaafay yootiyo zoriya oosuwan peeshshanaadan issi ura maaddiyo wode, etikka nagaranchcha gidiyogaanne balana danddayiyogaa hassayoosona. Yaatiyo gishshawu eti maaddanawu baaxetiyo uraappe aaruwan banttana xillodan qoppennaadan keehi naagettoosona. Eti banttana ziqqi oottoosonanne etawu qarettoosona.—1 Phe. 3:8.
15. Nuna issi metoy gakkikko, waatana danddayiyoo?
15 Nuuni nu galchchaa cimatun ammanettana danddayoos. Nu xuuraa naaganawu, bantta qofaappe gidennan, Geeshsha Maxaafaappe zoranawunne deexxiya toohuwa tookkiyogan genccanaadan nuna maaddanawu eti loohidosona. (Lee. 11:13; Gal. 6:2) Eta eeshshaynne meezee dumma dumma gidikkokka, nuuni issi cimaakko shiiqidi nu metuwabaa laꞌatettan yootana danddayoos. Nuuni siyanawu koyiyobaa yootiya cimaa demmana gakkanaashin dumma dumma cimata zoriya oychchana koshshenna. Nuuni yaatikko, Xoossaa Qaalaa “tumu timirttiya” gidennan, ‘bantta siyanawu koyiyobaa xalaalaa tamaariya’ asatu mala gidana danddayoos. (2 Xim. 4:3) Nuuni issi cimaakko shiiqidi nu metuwabaa yootiyo wode, hegaabaa hara cimatuura haasayidaakko, qassi eti nuna woygi zoridaakko I nuna oychchana danddayees. Qassi I bana ziqqi oottiyo gishshawu kasetidi hara cimaa zoriya oychchana danddayees.—Lee. 13:10.
NU AAWATETTAA
16. Nuussi deꞌiya aawatettay aybee?
16 Nuna metoy gakkiyo wode, cimati nuna zoriyabanne maaddiyaba gidikkokka, nuuni ay kuuyanaakko yootokkona. Ubba galla Xoossawu aqidi deꞌiyogee nu aawatetta. Nuuni haasayidobawunne oottidobawu Xoossaa sinttan oyshettoos. Qassi nuuni loꞌꞌobaa kuuyanaadaaninne awu ammanettidi deꞌanaadan I nuna maaddana. (Roo. 14:12) Cimati nuuni oottanabaa yootiyogaappe, Geeshsha Maxaafaa goꞌettidi issi allaalliya xeelliyagan Yihoowa qofaa akeekanaadan nuna maaddiyoynne nuuni nuuyyo kuuyanaadan oottiyoy hegaassa. Geeshsha Maxaafaappe eti zoriyobaa nuuni loytti qoppidi oosuwan peeshshiyo wode kaseegaappe aaruwan Yihoowagaadan qoppiyogaanne loꞌꞌobaa kuuyiyogaa meezetoos.—Ibr. 5:14.
17. Nuuni ay oottanawu murttana koshshii?
17 Yihoowa dorssa gidiyogee nuussi gita maata! Yihoowi nuuni merinaa deꞌuwa demmana mala nuussi wozuwa qanxxanaadan “loꞌꞌo henttanchchaa” gidida Yesuusa kiittiis. (Yoh. 10:11) Galchchaa cimatu baggaara, Yihoowi hagaadan giidi gelido qaalaa poliis: “Taani ta wozanaadan, inttena heemmiya henttanchchata intteyyo immana. Eti inttena eratettaaninne akeekan heemmana.” (Erm. 3:15) Nuuni ayyaanaaban shuggiyo wode woy sahettiyo wode, maaduwawu cimata xeeganawu mammottana koshshenna. Galchchaa cimati deꞌanaadan oottiyogan Yihoowi giigissido giigissuwan loytti goꞌettanawu murttidaageeta gidoos.
MAZAMURE 31 Xoossaara Hemetta!
a Nagaraa oottida urawu neeni gidiyagaa keena wodiya imminkka I cimatussi yootana xayikko, neeni Yihoowawu ammanettanawu koyiyo gishshawu ne eriyobaa cimatussi yootana koshshees.