Nuna Woy Harata Naaqoy Gakkiyo Wode Waatana Koshshii?

1-2. Eta woy harata naaqoy gakkiyo wode daro asay waanii, qassi nuuni woygi qoppana danddayiyoo?

NUUNI naaqoy kumido alamiyan deꞌoos. Hiyyeesatettaa, mattumaa, zariya woy qommuwa gujjin, daro gaasotun asaa naaqoy gakkees. Hegaadankka, amarida dure asati woy kawotettaa sunttati miishshaa demmanawu xalaalaa qoppiyo gishshawu daro asay eta gaasuwan waayettees. Harati gattiyo naaqoy nuna woy nu eriyo hara ura qohana danddayees.

² Ha wodiyan daroti alamiyan kummida naaquwa beꞌidi yiillotiyogee malaalissiyabaa gidenna. Ayssi giikko, nuuni ubbay hirggissiyabinne naaqoy baynna alamiyan deꞌanawu koyoos. Amarida asay alamiyan woy bantta biittan deꞌiya metuwa giigissanawu baaxetees. Eti kawotettatanne higgeta eqettoosona, woy naaquwa xayssanawu qaalaa geliya polotikaa asata kaafoosona. Shin nuuni Kiristtaane gidiyo gishshawu, “saꞌaa asaa mala” gidennaagaanne naaqo ubbaa Xoossaa Kawotettay xayssanaashin naagana koshshiyogaa tamaarida. (Yoh. 17:16) Gidikkonne, asay harata naaqqiyogaa beꞌiyo wode azzanoos; ubba qassi issi issitoo yiillotoos. Yaaniyo gishshawu, nuuni hagaadan qoppana danddayoos: ‘Hegee haniyo wode waatana danddayiyanaa? Naaquwa xeelliyagan taani haꞌꞌi oottana danddayiyobi deꞌii?’ Ha oyshatu zaaruwa eranawu, asay naaqettiyo wode Yihoowawunne Yesuusawu aybi siyettiyakko ane koyruwan beꞌoos.

YIHOOWINNE YESUUSI NAAQUWA IXXOOSONA

3. Nuna woy harata naaqoy gakkiyo wode nuuni yiillotiyoy aybissee? (Isiyaasa 5:7)

³ Nuna woy harata naaqoy gakkiyo wode nuuni yiillotiyoy aybissakko Geeshsha Maxaafay qonccissees. Qassi Yihoowi nuna ba leemisuwan medhdhidoogaanne I ‘xillotettaanne tumu pirddaa dosiyogaa’ yootees. (Maz. 33:5; Doo. 1:26) I mule naaqqenna, qassi ooninne harata naaqqanaadan koyenna! (Zaa. 32:3, 4; Mik. 6:8; Zak. 7:9) Leemisuwawu, Xoossay erissidobaa yootiya Isiyasa wode, daro Israaꞌeelati bantta biittaa asay eta naaqqin unꞌꞌettidi ‘waassidoogaa’ Yihoowi siyiis. (Isiyaasa 5:7 nabbaba.) Yihoowi A higgiyawu zaari zaaridi azazettennan ixxidaageetanne harata naaqqidaageeta qaxxayiis.—Isi. 5:5, 13.

4. Issi uri naaqettiyo wode Yesuusawu aybi siyettii? (Misiliyakka xeella.)

⁴ Yihoowagaadan, Yesuusikka suure pirdda dosees; qassi naaquwa ixxees. Issi gallassi, Yesuusi kushee silido bitaniya beꞌiis. Yesuusi he bitaniyawu qarettidi A kushiya pattiis. Shin haymaanootiya kaalettiyageeti hegaa beꞌido wode keehi hanqqettidosona. Eti Yesuusi Sambbataa higgiya kanttiis giidosona. He waayettiiddi deꞌiya bitaniya maaddiyogee eta aybanne qofissibeenna. Yaatin Yesuusi eta hanotan waanidee? I, “Eta wozanay dammido gishshawu keehi [azzaniis].”—Mar. 3:1-6.

5. Naaqoy gakkiyo wode nuuni hanqqettidi takkana koshshennay aybissee?

⁵ Asay harata naaqqiyo wode Yihoowinne Yesuusi hanqqettoosona. Hegaa gishshawu, nuuyyokka hegaadan siyettikko bala gidenna. (Efi. 4:26) Shin nuuni nu hanqquwa mittananne naaquwa xayssana danddayennaagaa hassayana koshshees. Nuuni hanqqettidi keehi takkikko, sahettana woy keehi unꞌꞌettana danddayoos. (Maz. 37:1, 8; Yaq. 1:20) Yaatin, nuna woy harata naaqoy gakkiyo wode nuuni waatana koshshii? Yesuusi oottidobaappe tamaarana danddayoos.

HARATI NAAQETTIYOGAA BEꞌIDI YESUUSI WAATIDEE?

6. Yesuusi saꞌan deꞌiyo wode asaa gakkida naaqoy aybee? (Misiliyakka xeella.)

⁶ Yesuusi saꞌan deꞌiyo wode daro asaa naaqoy gakkiyogaa beꞌiis. Haymaanootiya kaalettiyageeti daro higgeta kessiyogan asawu deꞌoy deexxanaadan oottidoogaa Yesuusi erees. (Mat. 23:2-4) Rooma biittaa haariyageeti asaa naaqqiyogaakka Yesuusi erees. Daro Ayhudati Roomatu haaruwappe laꞌa kiyanawu koyidosona. Ubba issoti issoti, Roomatuura olettiya citaa essidosona. Shin Yesuusi kawotettaa laammanawu eqettiya ay citaakka kaafibeenna. Yesuusi asay A kawoyanawu qoppidogaa erido wode, etappe shaahettiis.—Yoh. 6:15.

7-8. Yesuusi saꞌan deꞌiyo wode naaquwa xayssanawu malibeennay aybissee? (Yohaannisa 18:36)

⁷ Yesuusi saꞌan deꞌiyo wode naaquwa xayssanawu he wode deꞌiya polotikan gelibeenna. Aybissi? Asi asa haaranawu maataykka wolqqaykka baynnaagaa I eriyo gishshataassa. (Maz. 146:3; Erm. 10:23) Asay naaqo ubbawu waanna gaasuwa xayssana danddayenna. Ayssi giikko, ha alamiya haariyay Seexaanaa Dabloosa; I meqettaa iita, qassi ha alamiyan daro asay A leemisuwa kaallees. (Yoh. 8:44; Efi. 2:2) Loꞌꞌo asatikka ha alamiya metuwa giigissana danddayokkona; ayssi giikko, etikka ubbatoo suurebaa oottokkona.—Era. 7:20.

⁸ Naaquwawu waanna gaasuwa muleera xayssanay Xoossaa Kawotettaa xalaala gidiyogaa Yesuusi erees. Hegaa gishshawu I, ‘Xoossaa Kawotettaa mishiraachchuwa yootanawunne awaajjanawu’ ba wodiyanne wolqqaa goꞌettiis. (Luq. 8:1) I hegaadan oottiyogan waayeenne naaqoy xayanaadan yeemottiya asaa minttettiis. (Mat. 5:6; Luq. 18:7, 8) Shin asa kawotettay awugeenne hegeeta xayssana danddayeenna. Xoossaa Kawotettaa xalaalay hegeeta xayssana, qassi I “ha saꞌaa kawotettatu mala gidenna.”—Yohaannisa 18:36 nabbaba.

NAAQOY GAKKIYO WODE YESUUSA MILATITE

9. Naaqo ubbaa xayssanay Xoossaa Kawotettaa xalaala gidiyogaa neeni ammanettanaadan oottidabay aybee?

⁹ Nuuni “wurssetta gallassatun” deꞌiyo gishshawu, Yesuusi saꞌan deꞌido wodiyagaappe naaqoy haꞌꞌi keehi dariis. Shin Yesuusa wodiyagaadan naaquwawu gaasoy Seexaanaanne iita asata. (2 Xim. 3:1-5, 13; Ajj. 12:12) Yesuusaagaadan, nuunikka naaquwawunne iitatetta ubbawu waanna gaaso gidida Seexaanaa Xoossaa Kawotettaa xalaalay xayssanaagaa ammanettoos. Nuuni Xoossaa Kawotettawu wozanappe exatiyo gishshawu, asa kawotettata eqettokko woy naaquwa eti xayssana giidi ammanettokko. Isttaasoa giyo michchee hanotaa qoppa. Isttaasa tumaa siyanaappe kase, naaquwa eqettiya citaara ubbatoo salppiya kiyawusu. Shin A oottiyobay likkekkonne siriyogaa doommaasu. A hagaadan gaasu: “Taani salppiya kiyada kaafiyo citay metuwa xayssaneeshsha gaada qoppiyogaa doommaas. Shin Xoossaa Kawotettay meto ubbaa xayssanaagaa taani haꞌꞌi ammanettays. Yihoowi naaqo ubbaa xayssanaagaa taani erays; hegeeta ta xayssana danddayikke.”—Maz. 72:1, 4.

10. Maatiyosa 5:43-48y yootiyogaadan, nuuni higgetanne kawotettata laammanawu baaxetana koshshennay aybissee? (Misiliyakka xeella.)

¹⁰ Ha wodiyan daroti kawotettaa laammanawu baaxetiya citaara hashetoosona. Qassi etappe daroti keehi yiillotoosona, higgiyawu azazettokkona, qassi harata qohoosona. Shin nuuni hegaadan oottanaadan Yesuusi tamaarissibeenna. (Efi. 4:31) Jefira giyo ishay hagaadan giis: “Asay eqettanawu salppiya kiyiyo wode issi sokkondde giddon makkalaynne bonqqiyogee doomettana danddayiyogaa erays.” Shin Yesuusi nuuni nunaara maayettennaageeta woy nuna naaqqiyageeta gujjin, asa ubbaa siiqanaadan tamaarissiis. (Maatiyosa 5:43-48 nabbaba.) Qassi nuuni Yesuusa milatanawu nuussi danddayettida ubbabaa oottoos.

11. Yesuusa milatiyogee issi issitoo nuna metana danddayiyoy aybissee?

¹¹ Xoossaa Kawotettay naaqo ubbaa muleera xayssanaagaa nuuni eriyaba gidikkonne, nuna naaqoy gakkiyo wode Yesuusa milatanawu metootana danddayoos. Meraa gaasuwan harati naaqqido michchee Janayi hanotaa beꞌa. A hagaadan gaasu: “Asay haasayidobay tana keehi qohiis. Taani yiillotido gishshawu eti qaxxayettanaadan koyaas. Yaatada zariyan asaa zaggiyogaa eqettiya citaa kaafanawu qoppaas. Hegaadan oottiyogee hanotaa giigissana danddayiyabadan tawu siyettiis.” Shin guyyeppe Janaya ba qofaa laammana koshshiyogaa akeekaasu. A hagaadan gaasu: “Taani Yihoowan ammanettiyogaa aggada, asay yootiyobaaninne asan ammanettiyogaa doommaas. Hegaa gishshawu, he citaa kaafiyogaanne hegaa mala citan gelennan agganawu kuuyaas.” Naaqoy nu bolli woy haratu bolli gakkiyo wode nuuni hanqqettiyaba gidikkonne, nu hanqquwa mittana koshshees; qassi ha alamiya bagga gidana bessenna.—Yoh. 15:19.

12. Nuuni nabbabiyo, beꞌiyo woy siyiyobata akeekan doorana koshshiyoy aybissee?

¹² Nuna woy harata naaqoy gakkiyo wode, nuuni woppu gaanaadan aybi maaddana danddayii? Hegawu nuna maaddiyabay nabbabiyobaa, beꞌiyobaa, woy siyiyobaa akeekan dooriyogaa. Sooshal miidiyan odettiya issi issibati asay dagammanaadaaninne kawotettaa bolli makkalanaadan oottoosona. Darotoo, oduwa eqotati tumuppe hanidabaa gidennan, bantta qofaa yootoosona. Odettiyabay tuma gidiyakkokka, ubbatoo hegaa siyiyogee tumuppe nuna maaddii? Nuuni hegaa mala oduwa siyiiddi daro wodiya wurssiyaba gidikko, yiillotana woy hidootaa qanxxana danddayoos. (Lee. 24:10) Ubba qassi, naaquwa muleera xayssanay Xoossaa Kawotetta gidiyogaa dogana danddayoos.

13. Ubba galla Geeshsha Maxaafaa nabbabiyogee harata naaqoy gakkiyogaa beꞌiyo wode nuna waati maaddii?

¹³ Ubbatoo Geeshsha Maxaafaa nabbabiyogeenne wotti dentti qoppiyogee, naaquwa genccanaadan nuna maaddana danddayees. Aliyo giyo michchiya issi issi asati harata qohiyogaa beꞌada azzanaasu. Qassi he qohida asati qaxxayettennan attido gishshawu, A keehi yiillotaasu. A hagaadan gaasu: “Takki gaada taani tana hagaadan oychchaas, ‘Yihoowi ha meto ubbaa giigissanaagaa taani tumuppe ammaniyanaa?’ Taani he wode Iyyooba 34:22-29 nabbabaas. He paydoti ooninne Yihoowappe geemmana danddayennaagaa tana hassayissidosona. Suure pirddaabaa loytti eriyaynne asaa meto ubbaa giigissana danddayiyay Yihoowa xalaala.” Shin nuuni Xoossaa Kawotettay naaqo ubbaa xayssiyo wodiya naagiiddi, haꞌꞌi ay oottana danddayiyoo?

NAAQUWA XEELLIYAGAN HAꞌꞌI WAATANA DANDDAYIYOO?

14. Naaquwa xeelliyagan haꞌꞌi waatana danddayiyoo? (Qolasiyasa 3:10, 11)

¹⁴ Asay harata naaqqiyogaa diggana danddayokko; shin nuuni harata suure oyqqana danddayoos. Nuuni qommoora beꞌidoogaadan, siiquwa bessiyogan Yesuusa leemisuwa kaallana danddayoos. Yaaniyo gishshawu, nuna naaqqiyageeta gujjin, ubba asawu keha gidanawu baaxetoos. (Mat. 7:12; Roo. 12:17) Nuuni ubba asawu kehanne asa asappe shaakkennaageeta gidikko, Yihoowi ufayttees.—Qolasiyasa 3:10, 11 nabbaba.

15. Nuuni Geeshsha Maxaafaa tumaa yootiyogan asaa waati maaddiyoo?

¹⁵ Naaquwa xeelliyagan nuuni oottana danddayiyo keehi koshshiyabay Geeshsha Maxaafaa tumaa haratussi yootiyogaa. Nuuni hegaadan giyoy aybissee? ‘Yihoowa eriyogee’ kase hanqqettiyanne makkalanchcha gidida uri kehanne sarotettaa dosiyagaa gidanaadan maaddiyo gishshataassa. (Isi. 11:6, 7, 9) Jemaala giyo bitanee tumaa siyanaappe kase naaqettidabadan awu siyettido gishshawu, kawotettaa laammanawu baaxetiya citan walahettiis. I hagaadan giis: “Wolqqan asaa laammana danddayettenna. Taani wolqqan laamettabeykke; taani Geeshsha Maxaafaa tumaa tamaarada laamettaas.” Jemaali tamaarido tumay I kawotettaa laammanawu baaxetiyogaa agganaadan maaddiis. Hegaa gishshawu, nuuni asaa Geeshsha Maxaafaa tumaa tamaarissiyo wode, eti harata qohiyabaa oottiyogaa agganaadan maaddana danddayoos.

16. Xoossaa Kawotettaabaa neeni haratussi yootanawu koyiyoy aybissee?

¹⁶ Yesuusaagaadan, nuunikka naaquwa muleera xayssanay Xoossaa Kawotettaa xalaala gidiyogaa asawu yeemuwan yootoos. Ha hidootay naaqettidaageeta minttettana danddayees. (Erm. 29:11) Qommoora ibay odettido Isttaasa hagaadan gaasu: “Taani tumaa tamaaridoogee ta bolli woy haratu bolli gakkiya naaquwa genccanaadan maaddiis. Yihoowi Geeshsha Maxaafaa baggaara asaa minttettees.” Naaqoy xayanaagaa xeelliyagan minttettiyabaa Geeshsha Maxaafaappe yootanawu neeni loytta giigettana koshshees. Neeni ha huuphe yohuwan tamaarido Geeshsha Maxaafaa qofay tuma gidiyogaa mintta ammanikko, timirtte keettan woy ooso sohuwan naaquwabay denddiyo wode, hegaabaa haratuyyo loytta yootana danddayaasa.b

17. Ha wodiyan nuna gakkiya naaquwa genccanaadan Yihoowi waati maaddii?

¹⁷ “Ha saꞌaa haariya” Seexaanay deꞌiyo wode ubban, nuna naaqoy gakkanaagaa eroos. Shin, Yihoowi ha wodiyan nuna maaddanawu, qassi Seexaanaanne iitatetta ubbaa xayssanawu qaalaa gelido gishshawu, loꞌꞌo wodiya yeemuwan naagana danddayoos. (Yoh. 12:31) Leemisuwawu, naaqoy darido gaasuwanne naaqettidaageetussi I qoppiyogaa Geeshsha Maxaafaa baggaara nuussi yootees. (Maz. 34:17-19) Harati nuna naaqqiyo wode waatanaakko, Yesuusappe tamaaroos; qassi matan Xoossaa Kawotettay naaquwa xayssin haranttuwa asay mule naaqettenna. (2 Phe. 3:13) Saꞌan “suure pirddaynne xillotettay” kumiyo wodiya yeemuwan naagiiddi, Xoossaa Kawotettaa mishiraachchuwa ubbatoo minnidi yootiyageeta gidoos.—Isi. 9:7.