Harata Bonchcha

1. Asay bonchchettiyogaa dosiyoy aybissee? (Roome 12:10)

ASAY nena bonchchiyogaa dosay? Neeni dosiyogee qoncce. Asay ubbaykka bonchchuwa koyiyogee wottin deꞌiyaba. Harati nuna bonchchiyo wode nuuni ufayttoos. Geeshsha Maxaafay “harata bonchchanawu sintta xeera gidite” giyoy hegaassa!—Roome 12:10 nabbaba.

2-3. Harata bonchchiyogee issi issitoo metiyaba gidiyoy aybissee, qassi ha huuphe yohuwan nuuni ay beꞌanee?

² Harata bonchchiyogee issi issitoo nuna metana danddayees. Hegawu issi gaasoy, haratu balan nuuni xeelaa wottiyogaa. Qassi ha wodiyan daroti harata bonchchokkona. Shin nuuni etappe dummatana bessees. Ayssi giikko, Yihoowi nuuni ‘ubba qommo asaa bonchchanaadan’ koyees.—1 Phe. 2:17.

³ Ha huuphe yohuwan, bonchchuwa giyogee woygiyogaakko, qassi (1) nu soo asaa yarata, (2) nu mala Kiristtaaneta, qassi (3) Yihoowa Markka gidiichchibeennaageeta nuuni waati bonchchana danddayiyakko beꞌana. Ubba qassi metiya hanotatunkka harata waati bonchchana danddayiyakko tamaarana.

HARATA BONCHCHIYOGAA GIYOGEE WOYGIYOGEE?

4. Harata bonchchiyogaa giyogee woygiyogee?

⁴ Bonchchuwa giyogee woygiyogee? Bonchchuwa giyogee nuuni haratubaa qoppiyonne eta oyqqiyo ogiya qonccissees. Issi urawu loꞌꞌo eeshshati deꞌiyogaa, I loꞌꞌobaa oottidogaa, woy nu bolli awu maatay deꞌiyogaa akeekikko, nuuni A bonchchoos. Qassi nuuni wozanappe bonchchana koshshiyogee qoncce.—Mat. 15:8.

5. Nuuni harata bonchchana koshshiyoy aybissee?

⁵ Yihoowi nuuni harata bonchchanaadan koyees. Leemisuwawu, ‘ayssiyo maatay deꞌiyogeeta’ nuuni bonchchanaadan I yootiis. (Rom. 13:1, 7) Shin issoti issoti hagaadan qoppana danddayoosona: “Taani suurebaa oottiyageetu xalaalaa bonchchays.” Hegaadan qoppiyogee likkee? Likke gidenna. Nuuni harata bonchchana koshshiyoy, eti oottidobaa woy oottibeennabaa gaasuwana gidennan, Yihoowi nuuni harata bonchchanaadaaninne A ufayssanaadan koyiyo gishshataassa.—Yaa. 4:14; 1 Phe. 3:15.

6. Nuna bonchchenna ura bonchchiyogee danddayettiyabee? Qonccissa. (Misiliyakka xeella.)

⁶ Issi issi asati hagaadan qoppana danddayoosona: ‘Nuna bonchchenna ura nuuni bonchchiyogee tumuppe danddayettiyabee?’ Ee, danddayettiyaba. Amarida leemisota beꞌa. Kawuwa Saaꞌooli ba naꞌaa Yonaataana asaa sinttan kawushshiis. (1 Sam. 20:30-34) Gidikkonne, Yonaataani ba aawaa wurssettay gakkanaashin olan kaafiisinne bonchchiis. (Kes. 20:12; 2 Sam. 1:23) Gita kahinee Eeli Haanna mattottaasu giidi O boriis. (1 Sam. 1:12-14) Shin Eeli aawanne gita kahiine gidiyo ba maataa maara goꞌettibeennaagaa Israaꞌeelan deꞌiya ubba asay erikkonne, Haanna bonchchuwan Eela haasayissaasu. (1 Sam. 1:15-18; 2:22-24) Ateenan deꞌiya amarida asati kiitettida Phawuloosa “tafaliinay” giidi cayidosona. (Oos. 17:18) Gidikkonne, Phawuloosi eta bonchchuwan haasayissiis. (Oos. 17:22) Ha taariketi, nuuni Yihoowa wozanappe siiqiyogeenne A ufayssiyogee metenna wode xalaala gidennan, metiya wodiyankka harata bonchchanaadan nuna denttettana danddayiyogaa bessoosona. Nuuni bonchchana koshshiyogeeti oonakko, qassi aybissakko ane beꞌoos.

SO ASAA YARATA BONCHCHA

7. So asaa bonchchiyogee nuna metanaadan oottana danddayiyabay aybee?

⁷ Metiyabaa. Nuuni nu soo asaara daro wodiya aattoos. Hegaa gishshawu, eti minonne shugo gididobaa eroos. Issoti issoti sahettiyogee eta eeshshay laamettanaadan oottiyo gishshawu, eta maaddiyogee nuuyyo deexxana danddayees; woy eti keehi unꞌꞌettana danddayoosona. Harati qassi nuna qohiyabaa haasayananne oottana danddayoosona. Issoti issoti son sarotettaynne woppay deꞌanaadan oottiyogaa aggidi, so asaa bonchchennan aggiyogan son cabbuwa medhdhoosona. Hegaa gaasuwan so asay issippetettan oottenna. So asaa bollaa kifiletun leemisana danddayoos. Harggee bollaa kifileti maara oottennaadan diggana danddayees. Hegaadankka, so asay issoy issuwa bonchchennabaa gidikko, hegee so asay issippetettan oottennaadan diggana danddayees. Shin daro harggetuyyo xalee deꞌiyogaadan, so asaykka issoy issuwa bonchchiyogaa tamaarana danddayees.

8. So asaa yarata bonchchiyogee keehi koshshiyoy aybissee? (1 Ximootiyosa 5:4, 8)

⁸ Bonchchana koshshiyoy aybissee? (1 Ximootiyosa 5:4, 8 nabbaba.) Phawuloosi Ximootiyosawu xaafido koyro dabddaabbiyan, so asaa yarati maadoy koshshiyo bantta soo asaassi koshshiyabaa kunttana bessiyogaa yootiis. Nuuni hegaadan oottidi nu soo asaa bonchchiyogaa bessiyo waanna gaasoy, coo wogaa polanaassa gidennan, nuuni Xoossawu ammanettiyo gishshataassa gidana bessiyogaa Phawuloosi qonccissiis. Hegaa giyogee nuuni hegaadan oottiyoy Yihoowa siiqiyo gishshataassanne hegaa nu goynuwa shaahuwadan xeelliyo gishshataassa. Yihoowi so asaa deꞌuwa doomissiis. (Efi. 3:14, 15) Yaaniyo gishshawu, nuuni nu soo asaa yarata bonchchiyo wode, so asaa deꞌuwa Doomissida Yihoowa tumuppe bonchchoos. (1 Xim. 5:4) Nu soo asaa yarata bonchchanawu hegee keehi koshshiya gaaso!

9. Azinaynne machchiya issoy issuwa waati bonchchana danddayiyonaa? (Misiliyakka xeella.)

⁹ Bonchchiyogaa waati bessana danddayiyoo? Ba machchiyo bonchchiya azinay eti banttarkka deꞌiyo wodekka, haratuura deꞌiyo wodekka O xoqqu oottidi xeellees. (Lee. 31:28; 1 Phe. 3:7) I mulekka O shocenna, kawushshenna, woy A bana pattenna asadan xeellanaadan oottenna. Arjjenttiina biittan deꞌiya Areelia hagaadan giis: “Ta machchiya sahettiyo gishshawu issi issitoo tana qohiyabaa haasayawusu. A hegaadan haasayiyo wode, hegee tumuppe A gaanawu koyiyoba gidennaagaa hassayanawu baaxetays. Qassi bonchchuwan haasayanaadaaninne hanqqettennaadan tana maaddiya 1 Qoronttoosa 13:5 hassayanawu malays.” (Lee. 19:11) Ba azinaa bonchchiya machchiya abaa haratussi loꞌꞌobaa haasayawusu. (Efi. 5:33) A ba azinaa borukku; woy qilliiccukku, qassi A cayukku. A hegaadan oottikko, I aqo deꞌoy laalettanaagaa erawusu. (Lee. 14:1) I azinay keehi unꞌꞌettiyo Xaaliya biittan deꞌiya issi michchiya hagaadan gaasu: “Ta azinay issi issibawu bessiyagaappe aaruwan hirggiyabadan issi issitoo tawu siyettees. Kase ta haasayiyobaynne ta somꞌꞌuwan ta bessiyobay A bonchchennaagaa qonccissees. Shin harata bonchchuwan haasayissiyageetuura laggetidoogee tana maaddiis; hegee taani ta azinaa kaseegaappe aaruwan bonchchanaadan tana denttettiis.”

10. Yelagati banttana yelidaageeta bonchchiyogaa waati bessana danddayiyonaa?

¹⁰ Yelagatoo, inttena yelidaageeti inttiyo kessido higgetussi azazettite. (Efi. 6:1-3) Inttena yelidaageeta bonchchuwan haasayissite. (Kes. 21:17) Inttena yelidaageeti cimiyo wode, koshshiyaban maaddiyogan eta bonchchiyogaa bessite. Etawu koshshiyabaa kunttanawu inttiyo danddayettidabaa oottite. I aaway Yihoowa Markka gidenna Maaree hanotaa beꞌa. I aaway harggido wode, kehatetti baynna ogiyan O oyqqido gishshawu, A maaddiyogee Maariyo metiis. A hagaadan gaasu: “Taani ta aawaa bonchchiyogaa xalaala gidennan, bonchchiyogaa wozanappe bessanaadankka woossaas. Taani tana yelidaageeta bonchchanaadan Yihoowi azazikko, I ta yaatanaadan wolqqaa immanaagaakka akeekaas. Ta aaway tana oyqqiyo hanotay laamettana xayikkonne, taani A bonchchuwan oyqqana koshshiyogaa guyyeppe akeekaas.” Wayssiyabay deꞌishinkka, so asaa bonchchiyo wode, so asaa deꞌuwa doomissida Yihoowa bonchchiyogaa bessoos.

NE MALA KIRISTTAANETA BONCHCHA

11. Nu mala Kiristtaaneta bonchchiyogee metiyaba gidana danddayiyoy aybissee?

¹¹ Metiyabaa. Nu mala Kiristtaaneti Geeshsha Maxaafay yootiyo maaratudan deꞌanawu baaxetikkonne, issi issitoo kehatetti baynna ogiyan nuna oyqqana, nuna naaqqana, woy nuna yiilloyana danddayoosona. Nu mala Kiristtaanee nuna ‘lanccissikko’ nuuni ubbatoo A bonchchiyogee metiyaba gidana danddayees. (Qol. 3:13) Yaatin eta ubbatoo bonchchanawu aybi maaddana danddayii?

12. Nu mala Kiristtaaneta bonchchiyogee keehi koshshiyoy aybissee? (2 Pheexiroosa 2:9-12)

¹² Bonchchana koshshiyoy aybissee? (2 Pheexiroosa 2:9-12 nabbaba.) Pheexiroosi xaafido naaꞌꞌantto dabddaabbiyan, he wode galchchan deꞌiya amaridaageeti, ‘bonchchettidaageeta’ geetettida cimata toochchiyogaa yootiis. He asati oottidobaa kiitanchchati beꞌidosonanne eti haasayidobaa siyidosona. Yaatin he kiitanchchati ay oottidonaa? Eti “Yihoowayyo yayyiyo gishshawu,” he asatu bolli iitabaa aybanne haasayibookkona. Hegee malaaliyaba! Wottiyobi baynna kiitanchchati he otoranchcha asatu bolli bessennabaa haasayibookkona. Yaatiyogaappe eti pirddaanne seeraa Yihoowawu aggidosona. (Rom. 14:10-12; Yihudaa 9ra gatta xeella.) Nuuni kiitanchchatuppe tamaarana danddayoos. He eqettiya asatakka kiitanchchati toochchibookkona. Yaaniyo gishshawu, nuuni Yihoowa siiqiya nu ishanttanne michchontta loytti bonchchana koshshees. Qassi nuuni eta bonchchanawu ‘sintta xeera gidana’ koshshees. (Rom. 12:10) Yaatiyogee nuuni Yihoowa bonchchiyogaa bessees.

13-14. Nu ishanttanne michchontta bonchchiyogaa waati bessana danddayiyoo? Leemisuwa yoota. (Misiliyakka xeella.)

¹³ Waati bonchchana danddayiyoo? Cimatoo, harata ubbatoo siiquwan tamaarissite. (Plm. 8, 9) Intte issi ura zorana koshshikko, kehatettan zorite; shin hanqqetti uttidi zoroppite. Michchotoo, zigirennan woy sunttaa moorennan aggiyogan, galchchan deꞌiyageeti issoy issuwa bonchchanaadan maaddana danddayeeta. (Tit. 2:3-5) Nuuni ubbaykka galchchaa cimatuura hashetiyogan, qassi eti shiiqota kaalettanawu, mishiraachchuwa yootiyo oosuwa darajjayanawunne ‘wora simmidaageeta’ maaddanawu minnidi oottiyogaa nashshiyogan eta bonchchiyogaa bessana danddayoos.—Gal. 6:1; 1 Xim. 5:17.

¹⁴ Rooso giyo michchiya O zorida issi cimaa bonchchanawu metootaasu. A hagaadan gaasu: “I tana siiquwan haasayissibeennabadan qoppada yiillotaas. Son taani abaa iitabaa haasayaas. Taani hegaa agganawu baaxetikkonne, I tana maaddanawu wozanappe koyenna ga qoppada A zoriya siyennan ixxaas.” Rooso maaddidabay aybee? A hagaadan gaasu: “Taani Geeshsha Maxaafaappe 1 Tasalonqqe 5: 12, 13 nabbabaas. Taani ha ishaa bonchchennaagaa akeekido wode, ta kahay tana qumꞌꞌiyogaa doommiis. Ta qofaa giigissanawu maaddiyabaa demmanawu Yihoowa woossaasinne nu xuufeta pilggaas. Metoy deꞌiyoy he ishaana gidennan, tanaana gidiyogaa guyyeppe akeekaas; ayssi giikko, taani otorettaas. Taani tana ziqqi oottana xayikko, harata bonchchiyogee tana metanaagaa haꞌꞌi akeekaas. Taani harata kaseegaappe aaruwan bonchchanawu haꞌꞌikka baaxetaydda deꞌays; qassi ta yaatiyogee, Yihoowa ufayssiyabadan tawu siyettees.”

YIHOOWA MARKKA GIDENNA ASATA BONCHCHA

15. Yihoowa Markka gidenna asata bonchchiyogee metiyaba gidana danddayiyoy aybissee?

¹⁵ Metiyabaa. Nuuni haggaazuwan Geeshsha Maxaafaa tumaa dosenna asatuura darotoo gayttoos. (Efi. 4:18) Amarida asati naatettan tamaaridobaa ammaniyo gishshawu, nu yootiyo mishiraachchuwa siyanawu koyokkona. Nuna ootissiyageeti woy nu asttamaareti, qassi nunaara oottiyageeti woy nunaara tamaariyageeti nunan ufayttennan aggana danddayoosona. Hegaa mala asata kaseegaadan bonchchiyogaanne kehatettan eta oyqqiyogaa aggana danddayoos.

16. Yihoowa Markka gidiichchibeenna asata nuuni bonchchiyogee keehi koshshiyoy aybissee? (1 Pheexiroosa 2:12; 3:15)

¹⁶ Bonchchana koshshiyoy aybissee? Yihoowa Markka gidiichchibeenna asata nuuni waati oyqqiyakko Yihoowi wudidi xeelliyogaa hassaya. Loꞌꞌo eeshshay amarida asati ‘Xoossaa bonchchanaadan’ oottana danddayiyogaa kiitettida Pheexiroosi Kiristtaaneta hassayissiis. Hegaa gishshawu, eti bantta ammanuwabaa haratussi qonccissiyo wode, ‘ashilaalotanne wozanappe bonchchiyageeta’ gidanaadan etawu yootiis. (1 Pheexiroosa 2:12; 3:15 nabbaba.) Kiristtaaneti bantta ammaniyobaa qonccissiyoy, pirdda keettan gidin woy hara ooyyonne gidin, eti ubbatoo harata bonchchana koshshees. Hegaa bollikka, nuuni haasayiyobaa Yihoowi ezggeesinne hegaa haasayiyo ogiya beꞌees. Nuuni Yihoowa Markka gidenna asata bonchchiyo loꞌꞌo gaasoy deꞌees!

17. Yihoowa Markka gidiichchibeennaageeta waati bonchchana danddayiyoo?

¹⁷ Bonchchiyogaa waati bessana danddayiyoo? Haggaazuwan, Geeshsha Maxaafaabaa darin erenna woy mule erenna asata nuuppe guuxxiyabadan mule xeellana koyokko. Yaatiyogaappe eti Xoossaa sinttan alꞌꞌo gidiyo gishshawu, nuuppe aadhdhiyabadan eta xeellanawu koyoos. (Hag. 2:7; Plp. 2:3) Yaaniyo gishshawu, neeni ammaniyobaa gaasuwan issi uri nena cayikko, cayada zaaroppa. Leemisuwawu, nuna gooba milatissidi eta eeyya milatissiyabaa mule haasayanawu koyokko. (1 Phe. 2:23) Neeni zilꞌꞌettanaadan oottiyabaa haasayikko sohuwara maarotaa oychcha. Ooso sohuwan harata bonchchiyogaa waata bessana danddayay? Minna oottiyagaa gida; qassi nenaara oottiyageetussinne nena ootissiyageetussi loꞌꞌo eeshshaa bessanawu baaxeta. (Tit. 2:9, 10) Neeni ammanettiyagaanne minna oottiyagaa gidikko, asay nenan ubbatoo ufayttana xayikkonne Xoossay nenan keehi ufayttana.—Qol. 3:22, 23.

18. Nuuni harata bonchchiyogee keehi koshshiyoy aybissee?

¹⁸ Nuuni harata bonchchana bessiyo daro gaasoti deꞌoosona! Nuuni nu soo asaa bonchchiyogee, nu soo asaa Ayssiya Yihoowa bonchchiyogaa gidiyogaa beꞌida. Hegaadankka, nuuni nu mala Kiristtaaneta bonchchiyo wode, saluwan deꞌiya nu Aawaa bonchchoos. Qassi nuuni Yihoowa Markka gidiichchibeennaageeta bonchchiyo wode, sinttappe eti nu gita Xoossaa bonchchiyogee metennaadan oottoos. Issi issi asay nuna bonchchana xayikkonne, nuuni ubbatoo eta bonchchiyogee keehi koshshiyaba. Ayssi giikko, Yihoowi nuna anjjana. I, “Tana bonchchiyageeta taani bonchchana” yaagiis.—1 Sam. 2:30.