Mishiraachchuwa Siyanawu Koyiyageeta Eesuwan Maadda

1. Nuuni mishiraachchuwa yootiyo wode issi issi asaa xeelay aybee? (Oosuwa 13:47, 48; 16:14, 15)

KOYRO xeetu layttan deꞌida daroti mishiraachchuwa siyido wode sohuwara ammanidosona. (Oosuwa 13:47, 48; 16:14, 15 nabbaba.) Hegaadankka ha wodiyan, amaridaageeti mishiraachchuwa koyro siyiyo wode, keehi ufayttoosona. Ubba qassi koyro heeran mishiraachchuwa siyanawu koyennaageetikka, guyyeppe siyanawu koyana danddayoosona. Haggaazuwan, “suure xeelay” deꞌiyogeeta demmiyo wode nuuni waatana koshshii?

2. Mishiraachchuwa yootiyo oosuwa issi uri gaden oottiyo oosuwara nuuni geeddarssana danddayiyoy aybissee?

² Mishiraachchuwa yootiyo oosuwa issi uri gaden oottiyo oosuwara geeddarssana danddayoos. Gaden issi issi kattay haraappe kasetidi bootidi cahawu gakkees. Qassi goshshanchchay cahawu gakkida kattaa sohuwara cakkees. Shin I gakkiichchibeennaagaa haattaa ushshananne bulꞌꞌana koshshees. Hegaadankka, mishiraachchuwa siyanawu koyiya ura nuuni demmiyo wode, danddayettida keenan sohuwara I Kiristtoosa kaalliyagaa gidanaadan maaddanawu koyoos. Shin, siyanawu koyiichchibeennaageeta Xoossaabaanne Geeshsha Maxaafaabaa tamaariyogee ay keena loꞌꞌokko eti akeekanaadan maaddanawu ubbatoo baaxetoos. (Yoh. 4:35, 36) Asay siyanawu koyiyakko woy koyennaakko nuuni shaakki eriyo wode, eta maaddiyo keehi loꞌꞌo ogiya erana. Nuuni koyro haasayissiyo wode, mishiraachchuwa siyanawu koyiyageeta maaddanawu waatana danddayiyakko beꞌana. Qassi hegaa mala asati ayyaanaaban ubbatoo diccanaadan waati maaddanaakko beꞌana.

MISHIRAACHCHUWA SIYANAWU KOYIYAGEETA WAATA MAADDANA DANDDAYAY?

3. Haggaazuwan siyanawu koyiya asaa nuuni demmiyo wode waatana koshshii? (1 Qoronttoosa 9:26)

³ Haggaazuwan siyanawu koyiya asaa demmiyo wode, sohuwara deꞌuwawu efiya ogiyan biyogaa doommanaadan eta maaddanawu koyoos. Hegaa mala asata nuuni koyro haasayissiyo wode, eti sohuwara Geeshsha Maxaafaa xannaꞌanaadaaninne shiiqota shiiqanaadan shoobbana koshshees.—1 Qoronttoosa 9:26 nabbaba.

4. Geeshsha Maxaafaa xannaꞌiyogaa sohuwara doommida uraabaa yoota.

⁴ Xannaꞌanaadan shoobba. Nuuni haasayissiyo amaridaageeti Geeshsha Maxaafaa xannaꞌanawu sohuwara eeno goosona. Leemisuwawu, Kanaadan deꞌiya issi yelagiya issi Hamuusa galla xuufiya wottiyo gaariyakko shiiqada Merinawu Ufayttada Deꞌa! giya broshuriya ekkaasu. Yaatin gaariya matan deꞌiya michchiya A he broshuriya goꞌettada miishshaa qanxxennan Geeshsha Maxaafaa xannaꞌana danddayiyogaa iyyo yootaasu. He yelagiya hegan ufayttaasu, qassi ba silkkiya payduwa immaasunne michchee silkkiya payduwakka ekkaasu. He gallassi guyyeppe he yelagiya awude xannaꞌana danddayiyakko he michchiyo kiitaa xaafada oychchaasu. He michchiya Qeeraa galla gayttanaadan shoobbido wode, he yelagiya, “Wontto gayttana danddayiyoo?” gaada oychchaasu. Eti Arbba galla xannaꞌiyogaa doommidosona. He yelagiya Woggaa galla koyro shiiquwa shiiqaasu, qassi ayyaanaaban sohuwara dicciyogaa doommaasu.

5. Issi uri nunaara Geeshsha Maxaafaa xannaꞌanawu koyiichchibeennaba gidikko, waatana koshshii? (Misiliyakka xeella.)

⁵ He yelageedan, nuuni haasayissiyo asa ubbay sohuwara Geeshsha Maxaafaa xannaꞌana giidi nuuni naagennaagee qoncce. Amaridaageetussi daro wodee koshshana danddayees. Issi ura ufayssiya qofan koyro haasayissiyogaa doommiyogee koshshana danddayees. Qassi nuuni ubbatoo loꞌꞌobaa qoppiyabanne he ura maaddanawu wozanappe koyiyaba gidikko, qantta wodiyan I Geeshsha Maxaafaa xannaꞌiyogaa doommana danddayees. Xannaꞌanaadan shoobbiyo wode, nuuni woygana danddayiyoo? Xannaꞌissiyogaa doomissiyogan gooba gidida amarida ishanttinne michchontti yootidobaa ane beꞌoos.

6. Issi uri Geeshsha Maxaafaa xannaꞌiyogee awu loꞌꞌo gidiyogaa akeekanaadan maaddanawu woygana danddayay?

⁶ Geeshsha Maxaafaa xinaatiya doomissanawu shoobbiyo wode, issi issi biittatun “xannaꞌissays,” “Geeshsha Maxaafaa xannaꞌissays,” woy “tamaarissays” giyo qaalata goꞌettennaagee loꞌꞌo gidiyogaa aassiyageetinne aqinyeti yootidosona. Eti, “haasayoos,” “tobboos,” “Geeshsha Maxaafaabaa haasayoos” giya qaalata goꞌettiyogee loꞌꞌo gidiyogaa akeekidosona. Issi uri nenaara zaarettidi haasayanawu koyanaadan maaddanawu, hagaadan gaana danddayaasa, “Asay oychchiyo keehi koshshiya oyshatussi Geeshsha Maxaafaappe zaaruwa demmiyogee keehi ufayssiyaba,” woy “Geeshsha Maxaafay coo haymaanootiyabaa yootiya maxaafa xalla gidennan, nuna maaddiyabaa yootiya maxaafa.” Gujjada hagaadankka gaana danddayaasa: “Hegee daro wodiya ekkenna; keehi maaddiyabaa tamaaranawu 10ppe 15 daqiiqay gidees.” Asay unꞌꞌettanaadan oottana danddayiyabata; hegeekka, gayttanawu “keerettoos” woy “saaminttan saaminttan” giyagaa mala qaalata goꞌettana koshshenna.

7. Issoti issoti Geeshsha Maxaafaa tumaa koyro akeekidoy awudee? (1 Qoronttoosa 14:23-25)

⁷ Shiiquwa eta shoobba. Phawuloosa wodiyan deꞌida amaridaageeti galchchaa shiiquwa eti koyro shiiqido wode, Geeshsha Maxaafaa tumaa akeekidaba milatoosona. (1 Qoronttoosa 14:23-25 nabbaba.) Ha wodiyankka darotoo hegaa mala. Oorattatuppe daroti nu shiiqota shiiqiyogaa doommi simmidi sohuwara ayyaanaaban diccoosona. Yaatin neeni eta shiiquwa shoobbana koshshiyoy awudee? Merinawu Ufayttada Deꞌa! giya maxaafaa timirtte 10y neeni shoobbanaadan yootikkonne, he timirttiya gakkanaashin neeni naagana koshshenna. Neeni issi ura haasayissiyo koyro gallassaappe doommada he saaminttaa wurssettan siyana dere haasaya huuphe yohuwa woy he saaminttan xannaꞌiyo Wochchiyo Keelaa Xinaatiyappe issi qofaa yootada shoobbana danddayaasa.

8. Issi ura nuuni shiiqota shoobbiyo wode ay yootana danddayiyoo? (Isiyaasa 54:13)

⁸ Siyanawu koyiya ura shoobbiyo wode, nu shiiqoti I ba haymaanootiyan meezetidoogaappe waani dummatiyakko qonccissa. Geeshsha Maxaafaa tamaariya issinna saaminttaa wurssettaa shiiquwa koyro shiiqido wode, bana xannaꞌissiyaro hagaadan oychchaasu, “Xinaatiya kaalettiyagee ubba asaa sunttaa erii?” Nu michchiya nuuni nu soo asaa yaratu sunttaa eriyogaadan, galchchan deꞌiyageetu sunttaa eranawu nu ubbay baaxetiyogaa iyyo yootaasu. He xinaatiya bantta woosa keettan daroti issoy issuwa sunttaa erennaagaa yootaasu. Issi urawu nu shiiqoy dummatiyo hara ginaakka yootana danddayoos. (Isiyaasa 54:13 nabbaba.) Nuuni Yihoowawu goynnanawu, appe tamaaranawunne issoy issuwa minttettanawu shiiqoos. (Ibr. 2:12; 10:24, 25) Nu shiiqoti coo wogaadan gidennan, tamaaranawu maaddiya hanotan daraajjayettidoy hegaassa. (1 Qor. 14:40) Nu shiiqo sohoti giiga, qassi yan tamaaranawu injje hanotan keexettidosona. Nuuni polotikaaban oossinne exatenna gishshawu, hegaabaa haratuura mule tobbokko; qassi he allaalliya woy buzo allaalliya denttidi palamettokko. Xinaateta SHiiquwaa Addaraashan Oosettiyaabay Aybee? giya biiduwa kasetidi bessiyogee maaddana danddayees. Yaatikko xinaateti yan oosettiyabaa erana.

9-10. Issi uri shiiquwa yaanaadan nuuni shoobbikko, I yayyennaadan ay yootana danddayiyoo? (Misiliyakka xeella.)

⁹ Yihoowa Markkati haymaanootiya laammanaadan oottoosona gi hirggidi amaridaageeti shiiquwa yaanawu mammottoosona. Imattati nu shiiquwa yiyogan nuuni ufayttiyogaanne nu haymaanootiyan gelanaadan nuuni eta iisettennaagaa he urawu loytta yoota. Guutta naata gujjin, soo asa ubbay yaana danddayees. Nu shiiqotun naati banttana yelidaageetuppe shaahettidi tamaaranaadan oottokko. Yelidaageeti bantta naatuura issippe tamaaroosona. Hegaa gishshawu, yelidaageeti bantta naati oonaara deꞌiyakko, qassi ay tamaariiddi deꞌiyakko eroosona. (Zaa. 31:12) Nuuni shiiqotun muxuwata shiishshokko. Nuuni yaatiyogaappe, “Intte coo ekkideta, coo immite” giidi Yesuusi azazidobaa kaalloos. (Mat. 10:8) Qassi he uri shiiquwa yiyo wode alꞌꞌo maayuwa maayana koshshiyabadan qoppennaadan awu yootana danddayaasa. Xoossay wozanaa xeelleesippe attin, issi ura maayuwa xeellenna.—1 Sam. 16:7.

¹⁰ Issi uri shiiquwa yiikko, I ufayttanaadan neessi danddayettidabaa ootta. I cimatuuranne aassiya haratuura erettanaadan ootta. Aara yan gayttiya asati kehatanne awu qoppiyageeta gidiyogaa I akeekikko, zaarettidi yaanawu keehi koyana danddayees. Shiiquwan awu Geeshsha Maxaafay baynnaba gidikko, neegaappe bessa; qassi shiiqiya haasayanne nuuni issippe waati xannaꞌiyakko I akeekanaadan maadda.

XINAATIYA DOOMMIDA URA WAATA MAADDANA DANDDAYAY?

11. Ne xannaꞌissiyo ura saatiyanne A prograamiya bonchchiyogaa waata bessana danddayay?

¹¹ Nuuni issi ura xannaꞌissiyo wode ay qoppana koshshii? Ne xannaꞌissiyo ura saatiyanne A prograamiya bonchcha. Leemisuwawu, intte heeran asay darotoo saatiya bonchchennaba gidikkokka, neeni keerido saatiya bonchcha. Hegaa bollikka, koyro wode qanttan xannaꞌissiyogee loꞌꞌo gidana danddayees. Meezee deꞌiyo amarida aassiyageeti issi izaawu siyanawu keehi koyikkonne, qanttan xannaꞌissiyogee loꞌꞌo gidiyogaa yootoosona. Qassi daro haasayoppa. Xinaatee daro haasayanaadan ootta.—Lee. 10:19.

12. Neeni issi ura Geeshsha Maxaafaa xannaꞌissiyogaa doomissiyo wode waata maaddana danddayay?

¹² Neeni issi ura Geeshsha Maxaafaa xannaꞌissiyogaa doomissikko, koyro timirttiyappe doommada I Yihoowanne Yesuusa eranaadan, qassi etaara dabbotaa minttanaadan maaddanawu koyasa. Neeni yaatanawu, nenaaninne neessi deꞌiya Geeshsha Maxaafaa eran gidennan, I Xoossaa Qaalan xeelaa wottanaadan maadda. (Oos. 10:25, 26) Kiitettida Phawuloosi nuussi loꞌꞌo leemiso. I asaa tamaarissiyo wode Yihoowi nuuni A eranaadaaninne A siiqanaadan maaddanawu kiittido Yesuusan xeelaa wottiis. (1 Qor. 2:1, 2) Phawuloosi xinaateti worqqan, biraaninne alꞌꞌo shuchchan leemisettana danddayiya loꞌꞌo eeshshati deꞌiyogeeta gidiyogee keehi koshshiyogaakka loytti qonccissiis. (1 Qor. 3:11-15) He loꞌꞌo eeshshatuppe amaridaageeti ammanuwa, hayyuwa, akeekaanne Yihoowawu yayyiyogaa. (Maz. 19:9, 10; Lee. 3:13-15; 1 Phe. 1:7) Phawuloosa leemisuwa kaallada tamaarissiyogan, ne xinaateti saluwan deꞌiya siiqiya bantta Aawaara dabbotaa minttanaadaaninne akko shiiqanaadan maadda.—2 Qor. 1:24.

13. Nuuni siyanawu koyiyageeta maaddiyo wode danddayanchchanne akeekanchcha gidiyogaa waati bessana danddayiyoo? (2 Qoronttoosa 10:4, 5) (Misiliyakka xeella.)

¹³ Tamaarissiyo wode danddayanchchanne akeekanchcha gidiyogan Yesuusa leemisuwa kaalla. Issi uri yeellatanaadan oottiya oyshata oychoppa. I akeekanawu metootido qofay deꞌikko, hegaa tobbiiddi takkoppite. Yaatiyogaappe kaalliyagaa xannaꞌananne he qofaa guyyeppe zaarettidi xannaꞌana danddayeeta. I qoppennan issi timirttiyan ammananaadan A iisettanawu baaxetiyogaappe A wozanan tumay xaphuwa yeddanawu wodee koshshiyogaa akeeka. (Yoh. 16:12; Qol. 2:6, 7) Worddo timirttee nuuni ‘laalana’ koshshiyo “mino qato” malaba gidiyogaa Geeshsha Maxaafay yootees. (2 Qoronttoosa 10:4, 5 nabbaba.) Issi xinaatee adussa wodiyawu ammanidobaa agganaagee metiyaba gidana danddayees. Hegaa gishshawu, he xinaatee ooratta qatuwa keexxanaadan maaddana koshshees; hegeekka, Yihoowan ammanettanaadan maaddiyogaa. Yaatikko, he xinaatee I kase xoqqu ootti xeelliyo ammanuwa agganawu metootenna.—Maz. 91:9.

SHIIQOTA SHIIQIDA OORATTATA WAATA MAADDANA DANDDAYAY?

14. Nuuni shiiqota shiiqida oorattata waati oyqqana bessii?

¹⁴ Shiiquwa shiiqida oorattatu wogay, deretettan etawu deꞌiya sohoy woy eti diccido hanotay ayba gidikkonne, nuuni asa asappe shaakkennan oyqqanaadan Yihoowi koyees. (Yaq. 2:1-4, 9) Yaatin, nu shiiquwa shiiqida oorattatussi siiquwa waati bessana danddayiyoo?

15-16. Shiiqota yiida oorattati ufayttanaadan waati maaddana danddayiyoo?

¹⁵ Nu shiiqoti ay milatiyakko beꞌanawu koyido gishshawu woy hara sohuwan deꞌiya issi Yihoowa Markkay woykko issi xinaatee shiiquwa baanaadan minttettido gishshawu issoti issoti nu shiiqota yoosona. Hegaa gishshawu, shiiquwa yiida hegaa mala asata haasayissanawu nuuni mammottana koshshenna. Eti unꞌꞌettanaadan oottenna hanotan eta mokka. Eta nenaara utissa. Ne Geeshsha Maxaafaanne xannaꞌettiiddi deꞌiya xuufiya bessa; woy Geeshsha Maxaafaanne xuufeta etawu imma. Qassi eti ufayttanaadan oottiya hara ogetakka qoppa. Issi bitanee haratuugaadan giiga maayuwa maayennan Shiiquwa Addaraashaa yiidoogan hirggido wode bana mokkida ishaabaa yootiis. He ishay I yayyennaadan maaddiis; qassi Yihoowa Markkati hara asaappe dummatennaagaa awu qonccissiis. He bitanee guyyeppe haattan muukettiis; qassi I yayyennaadan maaddida ishaa mule dogibeenna. Shin nuuni oorattatussi siiquwa bessiyo wode, eti yeellatanaadan oottana danddayiya woy eta buzo allaalliya xeelliyagan oyshata oychchennaadan keehi naagettana koshshees.—1 Phe. 4:15.

¹⁶ Shiiquwa yiya oorattati yayyennaadan hara ogetunkka maaddana danddayoos. Leemisuwawu, Yihoowa Markka gidennaageetubaa woy eta ammanuwabaa nuuni haasayiyo, qofaa yootiyo woy shiiqotun kifileta shiishshiyo wode eta bonchchanawu koyoos. Eti xubettanaadan woy cayiya asadan nuna xeellanaadan oottana danddayiya qaalata haasayokko. (Tit. 2:8; 3:2) Leemisuwawu, nuuni eti ammaniyobaa bonchchennaagaa bessiya ogiyan haasayokko. (2 Qor. 6:3) Dere haasayaa haasayiya ishantti hegaara gayttidaagan keehi naagettana koshshees. Qassi eti ezggiyageetu giddon Yihoowa Markka gidennaageeti akeekana danddayenna qaalata woy qofata qonccissiyogan etawu qoppiyogaa bessoosona.

17. Haggaazuwan “suure xeelay” deꞌiyo asata demmiyo wode nuuni waatana koshshii?

¹⁷ Asay Yesuusa kaalliyageeta gidanaadan oottiyo oosoy keehi eesoyiyaba; qassi “merinaa deꞌuwawu suure xeelay” deꞌiyo asata nuuni ubbatoo koyoos. (Oos. 13:48) Nuuni yaatiyo wode, eti Geeshsha Maxaafaa xannaꞌanaadan woy nu shiiqota yaanaadan shoobbanawu mammottana koshshenna. Hegaadan oottiyogan, eti ‘deꞌuwawu efiya ogiyan’ baanawu koshshiya koyrobaa oottanaadan nuuni maaddana danddayoos.—Mat. 7:14.