Miishshaa Metuwa—Xoossaa Kawotettay Ay Oottanee?

Kumetta saꞌan daro asay deꞌuwawu koshshiyabaa demmanawu metootiiddi deꞌees, qassi he metoy yaa iiti iiti bees.

• Asay aginan aginan demmiyo miishshay shammana danddayiyobay guuxxi guuxxi biidoogaa mata wode kumetta saꞌan xannaꞌido irpportteea qonccissees. Hegaa giigissanawu aynne oottana xayikko, duriyanne hiyyeesaa giddon deꞌiya dummatettay aakki aakki baanaagaa, qassi daro so asaa deꞌoy kaseegaappe yaa iitanaagaa he irpporttee yootees.

Kawotettati ha metuwa qaarana woy guuttaakkonne giigissana danddayiyonaa?

Aquwa dummatettaa gujjin, ha ubba metota qaarana danddayiyanne qaaranawu deꞌiya kawotettaabaa Geeshsha Maxaafay yootees. Saꞌan deꞌiya ubbabaa haarana kawotettaa ‘saluwa Xoossay essanaagaakka’ yootees. (Daaneela 2:44) He kawotettaa haaruwan ooninne dogetti attenna. (Mazamure 9:18) Xoossaa Kawotettaa haaruwa garssan, ubba asay ufayttanawu koshshiyabaa demmana. Ubba asay ba oosuwan loꞌꞌo ayfiya demmidi ufayttana.—Isiyaasa 65:21, 22.