Anton Petrus/Moment via Getty Images
NAAGI UTTITE!
Alamiya Olay Doommanaagee Attennabee?—Geeshsha Maxaafay Woygii?
Aadhdhida 30 layttatun, kumetta saꞌan deꞌiya daro biittatu dabbotettay mino gididabadaaninne kaseppe loꞌꞌi loꞌꞌi biyabadan daroti qoppidosona. Gidikkonne, mata wode hanidabati hegee tuma gidana danddayennaagaa bessoosona.
“Israaꞌeela biittay Hezboolaara Liibaanoosa zawan olettiyogaa doommidoogaa gaasuwan, Gaaza olay he heeran deꞌiya hara biittatakka qohana giidi asay hirggees.”—Royteris, Ichchashe 6, 2024.
“Iraane kaalettiyo citay dumma dumma heerata qohiiddi deꞌees; qassi qoppennan, Iraane niyukileere olaa miishshata medhdhiyogaa zaarettidi doommiis. Hegaa bollikka, Raasheenne Chaynay haꞌꞌi Iraaneera hashetoosona. Ha ubbabay arggo bagga biittata qohiya harabaa kaalettiiddi deꞌees.”—Ze Niwu York Taymis, Ichchashe 7, 2024.
“Raashee Yukireene bolli wolqqaama qohuwa kaalettiyogaa aggibeenna.”—UN Oduwa, Ichchashe 11, 2024.
“Chaynaa ikkonoomeenne wotaaddaratu wolqqay gujji gujji biyogee, Taywaane laꞌa biitta gidanawu kaseegaappe aaruwan koyiyogee, qassi Bejinggeenne Washinggitenee issoy issuwa keehi ixxiyogee sohuwara olay denddanaadan oottana danddayees.”—Ze Jaappan Taymis, Ichchashe 9, 2024.
Ha wodiyan kumetta alamiyan woppay xayidoogaa xeelliyagan Geeshsha Maxaafay yootiyobi deꞌii? Hegee alamiya olay doommanaadan oottanee?
Geeshsha Maxaafay ha wodiyan haniyabata kasetidi yootiis
Geeshsha Maxaafay ha wodiyan nuuni beꞌiyo awugaa olaabaakka dummayidi yootenna. Gidikkonne, nu wodiya shaakki erissiyanne saꞌaappe sarotettaa xayssiya ubbasaa gakkiya olaabaa yootees.—Ajjuutaa 6:4.
Daaneela maxaafay ‘wurssetta wodiyan,’ issoy issuwara keesettiya alamiya wolqqaama kawotettati ‘sugettanaagaa’ woy issoy hinkkuwappe aadhdhanawu baaxetanaagaa yootees. Eti hegaadan baaxetiyogan wotaaddaratu wolqqaanne daro “duretettaa” woy miishshaa wurssoosona.—Daaneela 11:40, 42, 43.
Yiiddi deꞌiya olaa
Geeshsha Maxaafay ha alamiya hanotay giiganaappe kase keehi iitanaagaa yootees. Yesuusi, ‘saꞌaa doomettaappe hanno gakkanawu denddibeenna gita waayee denddanaagaa’ yootiis. (Maatiyosa 24:21) He “gita waayee,” “Ubbaappe Wolqqaama Xoossaa gita gallassan” olettiyo olaa geetettida, Armmageedoona olay doommanaadan oottana.—Ajjuutaa 16:14, 16.
Gidikkonne, Armmageedooni asaa ashshanappe attin xayssenna. Xoossay he olaa baggaara, darobaa bashshida olawu gaaso gidida asaa kawotettaa xayssana. Armmageedooni merinaa sarotettay deꞌanaadan waati oottanaakko eranawu kaallidi deꞌiya huuphe yohota nabbaba: