Niyukileere Olaabaa Geeshsha Maxaafay Woygii?

Ha saꞌaa wolqqaama kawotettati banttayyo deꞌiya niyukileere olaa miishshata minttiiddinne qoodaakka gujjiiddi deꞌiyo gishshawu niyukileere olaabay asaa keehi hirggissiiddi deꞌees. Niyukileere olaa miishshatu qooday gujji gujji biyo wode, asay niyukileere olay doommana giidi kaseegaappe aaruwan hirggiyogee bessiyaba. Keehi guutta gidida issi niyukileere ola miishshaa goꞌettiyogeekka ha saꞌaa xayssana danddayiya niyukileere olay doommanaadan oottana giidi asay yayyees. Bulletin of zi Atomik Saynttisttiis giyo dirijjitee yootidoogaadan, “nuuni niyukileere olay doommanaagee attennaba milatiyo wodiyan deꞌoos.”

Niyukileere olay tumuppe denddana danddayii? Yaanikko, ha saꞌay bashshaappe attanee? Qassi nuuni niyukileere olaabawu hirggiyogaa waani aggana danddayiyoo? Geeshsha Maxaafay woygii?

Ha huuphe yohuwan

Geeshsha Maxaafay niyukileere olaabaa kasetidi yootii?

Geeshsha Maxaafay niyukileere olaabaa dummayidi yootenna. Gidikkonne, niyukileere olay doommana giidi hirgganaadan oottiya, asaa eeshshaynne hanotati Geeshsha Maxaafan kasetidi odettidosona.

Ha wodiyan alamiyan haniiddi deꞌiyabata kaallidi deꞌiya Geeshsha Maxaafaa xiqisetun odettidabaara geeddarssa:

Geeshsha Maxaafaa xiqisiya: Yesuusa kaalliyageeti hagaadan giidi oychchidosona: “Neeni simmada nunaara takkana wodiyawunne wodiya wurssettawu malaatay ayba gidanee?” Yesuusi hagaadan giidi zaariis: “Deree deriya bolli, qassi kawotettay kawotettaa bolli denddana.”—Maatiyosa 24:3, 7.

Alamiyan haniyabata: Niyukileere olaa miishshay deꞌiyogeeta gujjin, daro biittati olaa miishshata goꞌettidi kaseegaappe aaruwan olettoosona.

“Mata layttatuppe simmin, ha alamiyan makkalay keehi dariiddi deꞌees: olay keehi dariis.”—Olay Deꞌiyo Sohotanne Hegaara Gayttidabata Xannaꞌiyo Projekttiya.

Geeshsha Maxaafaa xiqisiya: “Wurssettaa wodee gakkin, tohossa biittaa kawoi denddidi, huuphessa biittaa kawuwaa olana.”—Daaneela 11:40.

Alamiyan haniyabata: Geeshsha Maxaafay kasetidi yootidoogaadan, eqettiya kawotettatinne etaara hashetiyageeti wolqqaama gidanawu sugettoosona woy keesettoosona. Ha wodiyan, wolqqaama niyukileere olaa miishshati deꞌiyo biittati issoy issuwara sittan olettennaba gidikkonne, bantta niyukileere olaa miishshata kaseegaappe minttiiddinne corayiiddi deꞌoosona.

“Aadhdhida tammu layttatu giddon wolqqaama kawotettatuppe daroti eqettiya biittata kaafidoogaa gujjin, kawotettatu giddon daro olay deꞌees.”—Apssaala Olaabaa Xannaꞌiyo Prograamiya.

Geeshsha Maxaafaa xiqisiya: “Wurssetta gallassatun haniyabay wayssiyabanne daafan yeggiyaba [gidana]. Ayssi giikko, asay . . . haratuura maayettenna, sunttaa bashshana, bana naagenna, biittaa goggana.”—2 Ximootiyosa 3:1-3.

Alamiyan haniyabata: Ha wodiyan deꞌiya daro asaagaadan, alamiyan haariyageeti darotoo haratuura maayettokkona. Qassi eti maayettennabata sarotettan giigissiyogaappe, harata qohidi woy wolqqaa goꞌettidi metuwa pagalanawu baaxetoosona. Hegee niyukileere olay doommiyo hanotay yaa gujjanaadan oottees.

“Issoy issuwara hashetidi oottennaba gidikko, ubbabaa bashshiya daro olay deꞌana.”—S. Saran qassi J. Harman, Alamiya Ikkonoomiya Foremiya.

Xoossay niyukileere olay denddanaadan eeno gaanee?

Geeshsha Maxaafay hegaabaa yootenna. Shin ha wodiyan, ‘yashshiyabati’ woy shabbirssiyabati deꞌanaagaa yootees. (Luqaasa 21:11) Naaꞌꞌantto Alamiya Olaa wode xuuqqida atomike bombbee hegeetuppe issuwa. Geeshsha Maxaafay Xoossay olay deꞌanaadan eeno giidoy aybissakko yootees. Gujjada eranawu, Xoossay Tuggaa Aybissi Coꞌꞌu Giidi Xeellii? giya biiduwa beꞌa.

Ha saꞌay bashshaappe attanee?

Ee. Asay niyukileere olaa miishshata haranttuwa goꞌettiyakkokka hanotay keehi iitin kumetta saꞌay xayanaadan Xoossay eeno geenna. Geeshsha Maxaafay ha saꞌay bashshaappe attiyogaa xalla gidennan asay an merinawu deꞌanaagaakka yootees.

“Ha biittai merinaukka laamettennan de7ees.”—Eranchchaa 1:4.

“GODAI, [biittaa] giigissidi oottidaagee, . . . asi de7anaadaanappe attin, biittaa coo medhdhibeenna.”—Isiyaasa 45:18.

Issoti issoti, niyukileere olaa gaasuwan bazzottida biittan deꞌanawu porqqattiya amarida asa xalaalay sinttappe ha saꞌan deꞌana giidi qoppoosona. Gidikkokka, olaa gaasuwan ha saꞌaa gakkida qoho ubbay kumetta hanotan giiganaagaa Geeshsha Maxaafay yootees.

“Bazzoinne mela biittai ufaittana; bazzoi ufaissaa poocu giiddi, ciishshaa ciyyana.”—Isiyaasa 35:1.

Gannate gidida saꞌan issippe oottiyanne ufayttiya asaa. — Xoossay nuuni loꞌꞌiya saꞌan ufayttidi deꞌanaadan koyees

Nuna Medhdhidaagee saꞌay malaalissiya ogiyan bana barkka giigissanaadan oottidi medhdhiis. Yaaniyaba gidikkonne, Xoossay ha saꞌaa giigissanawu ba wolqqaa goꞌettana; yaatin asay an merinawu deꞌana.—Mazamure 37:11, 29; Ajjuutaa 21:5.

“Niyukileere olaabawu hirggiyogaa” waana aggana danddayay?

Issoti issoti niyukileere olaabawunne hegee kaalettiyobawu yayyiyogan, “niyukileere olaabawu hirggoosona.” Geeshsha Maxaafan deꞌiya Xoossay qaalaa gelidobatinne maaddiya zoree hegaa mala asati yayyiyogaa agganaadan maaddana danddayees. Waatidi?

Geeshsha Maxaafay ha saꞌawunne an deꞌiyageetuyyo ufayssiya hidootaa yootees. He hidootaabaa eriyogee, “nu deꞌuwawu markkabiya techchaa mala” gididi nuuni hirggiyogaa agganaadan maaddees. (Ibraawe 6:19, tohossa qofaa) Qassi hachchi hachchi haniyabatun xeelaa wottiyogaaninne sinttappe hanana iitabata qoppiiddi sheekkennan aggiyogan hirggiyogaa aggana danddayoos. Yesuusi yootidoogaadan, “Gallassa ubbawu awu awu gidiya metoy deꞌees.”—Maatiyosa 6:34.

Nuuni ubbay nu guuggiyanne qofaa payyatettaa naaganawu koshshiya ubbabaa oottana bessees. Niyukileere olaa miishshay mata wode gakkido xekkaa xeelliyagan tobbiyobaa, hanana danddayees gi yootiyobaanne buzo qofaa mala unꞌꞌettanaadan oottiya naqaashata bessiyagaappe aaruwan kaallennan aggiyogan yaatana danddayoos. Hegee nuuni tumubaa sheneho goos giyogaa gidenna. Yaatiyogaappe, nuuni teqqana danddayennabatanne mule hanennan aggana danddayiyabata qoppidi hirggennan agganawu nuussi danddayettidabaa oottoos.

“Hirggiyoogee asa ufaissaa diggees; shin shonggaara de7iya haasayai a ufaissees.”—Leemiso 12:25.

Ne deꞌuwan hanida loꞌꞌobata qoppiyogan iita oduwabaa qoppennan agganawu wodiya bazza.

“Hidootaa immiya Xoossay intte an ammanettido gishshawu intte wozanan ufayssaynne sarotettay eellanaadan oottana mala woossays.”—Roome 15:13.

Misiliya: Issi bitanee sinttanaabaa yayyennan qoppees. 1. Appe guyyeera olaa horoophphillee, niyukileere misaaꞌeeleenne shume milatiya niyukileere cuway deꞌiyo olaa sohoy beettees. 2. Appe sinttaara deree, maatan kamettida wombbay, goggiya shaafaynne paalliya kafoti deꞌiyo geeshshanne woppu giida saꞌay beettees. — Geeshsha Maxaafay sinttappe ufayssiya wodee yaanaagaa ammanttiya hidootaa yootees

Xoossay qaalaa gelidobata gujjada eriyogee neeyyo hidootay, ufayssaynne qofaa sarotettay deꞌanaadan maaddana.

Niyukileere Armmageedoonabaa Geeshsha Maxaafay kasetidi yootii?

Issoti issoti Armmageedooni kumetta saꞌan olettiyo niyukileere olaa giidi qoppoosona. Eti he olay kaalettiyo wolqqaama bashshaabaa qoppiyogee aynne sirissenna.

Gidikkokka, Geeshsha Maxaafay “Armmageedoona” giya qaalaa goꞌettiyoy ‘saꞌaa kawoti ubbay’ woy asaa kawotettati Xoossaara olettiyo olaa qonccissanaassa.a (Ajjuutaa 16:14, 16) Armmageedooni niyukileere bombbiyadan asa ubbaa buttidi xayssiyaba gidenna. Armmageedoonan Xoossay iita asa xallaa xayssiyogan tumu sarotettaynne woppay deꞌanaadan oottana.—Mazamure 37:9, 10; Isiyaasa 32:17, 18; Maatiyosa 6:10.

Olaa xayuwabaa Geeshsha Maxaafay ay yootii?

“I sa7aa gaxaa gakkanaassi de7iya olaa teqqees; wonddafiyaa menttees; tooraa kinchchees; gonddalliyaakka taman xuuggees.”—Mazamure 46:9.

Xoossaa Yihoowayb olettiya biittati olettennaadan teqqiyogaaninne eta ola miishshaa xayssiyogan eta bolli ba wolqqaa bessana. I saluwa ayso gidida, kumetta saꞌaa haarana ba Kawotettaa baggaara hegaa oottana.—Daaneela 2:44.

Xoossaa Kawotettay asay sarotettaaninne issippetettan waani deꞌanaakko tamaarissana. Kumetta saꞌaa issi kawotetta xallay haariyo gishshawu dumma dumma kawotettatu giddon ooshshay deꞌenna; haray atto asay he wode olaa waati olettanaakkokka tamaarenna! (Mikiyaasa 4:1-3) Hegee ay demissanee? “Asi ubbi ba woiniyaa turaa kuwaaninne balasiyaa kuwan woppu giidi uttana; ai asinne eta yashissenna.”—Mikiyaasa 4:4.

a “Armmageedoona Olay Aybee?” giya huuphe yohuwa xeella.

b Yihoowa giyogee Xoossawu buzo suntta. (Mazamure 83:18) “Yihooway Oonee?” giya huuphe yohuwa xeella.

Geeshsha Maxaafan Ajjuutaa maxaafay niyukileere olaabaa yootii?

Issoti issoti Ajjuutaa maxaafay niyukileere olaa gaasuwan gakkiya wolqqaama bashshaabaa yootees giidi qoppoosona. (Ajjuutaa 6:14; 8:7-12; 16:1-21) Leemisuwawu, ‘tamaa saluwappe saꞌawu wottiyogaabaa’ Ajjuutaa maxaafay yootees. (Ajjuutaa 13:11-13) Ha qofay niyukileere olaabaa gidennan, Naaꞌꞌantto Alamiya Olaa wode goꞌettido atomike bombbiyabaa qonccissiyogaa Yihoowa Markkati akeekoosona.

Ajjuutaa maxaafay niyukileeriyara gayttida hegaa mala hanotatubaa yootiyaba gidikkonne, hegaa halchchoy yashshiyabata qonccissidi yootanaassa gidenna. Ajjuutaa maxaafaa nabbabiyo wode kaallidi deꞌiyabata hassaya:

He maxaafay sittan akeekana koshshenna daro malaatata woy leemisota goꞌettees.—Ajjuutaa 1:1.
He maxaafay xaafettidoy nabbabiyageeta yashissanaassa gidenna.Shin an odettidabay hegaa akeekiyageetinne oosuwan peeshshiyageeti ufayttanaadan oottees.—Ajjuutaa 1:3..

Gujjada eranawu, “Ajjuutaa Maxaafay Yootiyobay Aybee?” giya huuphe yohuwa xeella.