Kiristtaane Gidiyogaa Giyogee Woygiyogee?—Geeshsha Maxaafay Woygii?

Ha wodiyan, Kiristtaane gidiyogaa ceeqettidi yootiya daroti deꞌoosona; gidikkonne eti harata qohiyabaa oottoosona. Issoti issoti bantta xallaa siiqoosona, xillobaa hanokkona, woy kehokkona. Harati bantta azinawu woy machcheeyyo ammanettennaageeta gidana danddayoosona. Eta eeshshaappe denddidaagan issoti issoti, ‘Kiristtaane gidiyogaa giyogee tumuppe woygiyogee?’ giidi qoppoosona.

Kiristtaane gidiyogaa giyogee tumuppe woygiyogee?

Issi uri bana Kiristtaane giidi yootana danddayees. Shin hegaa xallay gidenna. Geeshsha Maxaafay yootiyogaadan, Kiristtaane geetettiyay Yesuus Kiristtoosa kaalliya ura. (Oosuwa 11:26) Yesuusi, “Intte ta yootidoogaadan ubbatoo oottikko, tumukka tana kaalliyageeta” yaagiis. (Yohaannisa 8:31) Yesuusi yootidobaa wottiyobi baynna hanotan azazettana danddayiya ooninne baynnaagee qoncce. Shin Kiristtaane gidiya uri Yesuusi tamaarissidobaa kaallanawunne ubba galla hegaa ba deꞌuwan bessanawu baaxetees. Amarida leemisota beꞌa.

Kiristtaaneti bantta goꞌꞌaa aggi bayidi harata siiqoosona

Yesuusi yootidobaa: “Taani inttena ooratta azazuwa azazays: Issoy issuwa siiqite. Taani inttena siiqidoogaadan inttekka issoy issuwa siiqite. Intte issoy issuwa siiqiyogan, asay ubbay intte tana kaalliyageeta gidiyogaa erana.”—Yohaannisa 13:34, 35.

Yesuusi oottidobaa: Yesuusi haratuyyo deretettan deꞌiya sohuwa, woy eti diccido hanotaa xeellennan ba goꞌꞌaa aggi bayidi asa ubbaa siiqiis. I sahettidaageeta pattiis, namisettidaageeta miziis, ubba ba shemppuwa haratuyyo aattidi immiis.—Maatiyosa 14:14-21; 20:28.

Kiristtaaneti oottiyobaa: Kiristtaaneti haratuyyo kehiyogan, zaggennaagaaninne atto giyogan bantta goꞌꞌaa aggi bayidi harata siiqoosona. Eti maadoy koshshiyogeeta maaddoosona, qassi haratuyyo giidi issi issibaa aggi bayanawu eeno goosona.—1 Yohaannisa 3:16.

Kiristtaaneti xillobaa hanoosona

Yesuusi yootidobaa: ‘Tumay tana.’—Yohaannisa 14:6.

Yesuusi oottidobaa: Yesuusi ba haasayidonne oottido ubbaban tumanchcha. I baayyo goꞌettanawu harata mule cimmibeenna, woy balettiya haasaya haasayibeenna. Xillobaa haniya asa gidiyogee harati A eqettanaadan oottiyo wodekka, I hegaa mala asa gidiyogan erettees.—Maatiyosa 22:16; 26:63-67.

Kiristtaaneti oottiyobaa: Kiristtaaneti worddotokkona. Eti qaraxaa qanxxoosona, wuuqqokkona, qassi banttawu qanxxettiya miishshawu bessiyagaa keena saatiya minnidi oottoosona. (Roome 13:5-7; Efisoona 4:28) Eti harata cimmokkona, paaciya wuuqqokkona, qassi oosuwawu kunttiyo malkkachchan woy hegaa mala harabatun worddobaa xaafokkona.—Ibraawe 13:18.

Kiristtaaneti haratuyyo kehoosona

Yesuusi yootidobaa: “Daafuriyanne deexobaa tookkiya ubba asatoo, taakko haa yiite; taani inttena gazddissana. Taani ashkkenne ziqqi giyagaa gidiyo gishshawu, ta qambbaraa tookkitenne taappe tamaarite; yaatikko, intte gazddana. Ayssi giikko, ta qambbaray giiga, qassi intte tookkanaadan taani oychchiyobay kawushsha.”—Maatiyosa 11:28-30.

Yesuusi oottidobaa: Yesuusi harati akko shiiqanawu yashshenna, qassi I ashilaalo. Naata I baakko shiishshi ekkiis, unꞌꞌettidaageeta minttettiis, qassi harata bonchchiis.—Marqqoosa 10:13-15; Luqaasa 9:11.

Kiristtaaneti oottiyobaa: Kiristtaaneti shonggaara deꞌiya qaalan harata haasayissoosona; eti qohiyabaa haasayokkona, woy cayokkona. (Efisoona 4:29, 31, 32) Eti haratuyyo qoppoosona, qassi harata maaddiyo ogiya koyoosona.—Galaatiya 6:10.

Kiristtaaneti bantta azinawu woy machcheeyyo ammanettoosona

Yesuusi yootidobaa: “Xoossay issippe gattidoogaa ay asinne shaakkoppo.”—Marqqoosa 10:9.

Yesuusi oottidobaa: Yesuusi mule machchibeennaba gidikkonne, azinaynne machchiya issoy issuwawu ammanettanaadan minttettiis. (Maatiyosa 19:9) Issi uri ba aqo deꞌoy laalettanaadan oottiyabaappe naagettanaadan I minttidi yootiis.—Maatiyosa 5:28.

Kiristtaaneti oottiyobaa: Kiristtaaneti ekkiyogaanne geliyogaa bonchchennaagaa bessiya aybanne oottokkona. (Ibraawe 13:4) Azinaynne machchiya issoy issuwa siiqoosonanne bonchchoosona.—Efisoona 5:28, 33.