Yihoowa Markkati Bantta Oosuwawu Miishshaa Awappe Demmiyoonaa?

Nuuni sabbakiyo oosuwawu koshshiya miishshaa, waannatettan bantta dosan miishshaa immiya Yihoowa Markkatuppe demmoos.a Miishshaa yeggana danddayiyo saaxineti nuuni shiiqiyo sohotun giigi uttidosona; qassi miishshaa immiyo ogiyaabaa qonccissiya nu weyb saytee hegaappe hara ogiyaabaakka yootees. Issi uri koyikko kumetta saꞌan oottiyo oosuwawu, woy koyikko heeran deꞌiya gubaaꞌiyawu woy qassi naaꞌꞌawukka miishshaa immana danddayiyo ogee giigiis.

Yihoowa Markkati miishshaa waagaa battidi hagaa keena immite gookkona woy issi uri bawu deꞌiya miishshaappe amaridaagaa shaakkidi immanaadan oychchokkona. (2 Qoronttoosa 9:7) Nu shiiqotun nuuni muxuwaata shiishshokko, woy shiiqanawu miishshaa qanxxissokko, qassi haymaanootiyaa haggaazuwaa immanaadan doorettidaageeti xammaqanawu, yeeho gallassawu, bullachchawu woy harabawu miishshaa oychchokkona. Nuuni qumaanne issi issi buqurata bayziyoogan woy hegaa mala harabata oottiyoogan miishshaa diccokko woy qassi asay nuussi miishshaa immanaadan woossokko. Issi uri immido miishshaa xeelliyaagan hara asawu odokko woy dabaaban awaajissokko. (Maatiyoosa 6:2-4) Nu websaytiyan woy nu xuufetun miishshaa shiishshiyoogaa qonccissiya erissoy kiyenna.

Hisaabiyaa irpporttee Yihoowa Markkatu ubba gubaaꞌetun aginan aginan ubba asawu shiiquwan odettees. Imettida miishshaa maara goꞌettiiddi deꞌiyaakkonne eranawu ubba gubaaꞌeti bantta hisaabiyaa irpporttiyaa ubbatoo yiggoosona.—2 Qoronttoosa 8:20, 21.

Miishshaa Immana Danddayiyo Ogeta

• Miishshaa yeggiyo saaxiniyaa: Nu SHiiquwaa Addaraashan, Gita SHiiquwaa Addaraashan, woy nuuni shiiqiyo hara sohotun miishshaa yegganawu giigida saaxiniyan miishshaa woy cheekkiyaa yeggana danddayaasa.

• Intternneetiyan miishshaa immiyoogaa: “Yihoowa Markkatuyyo Miishsha Imma” giya saytiyaa goꞌettada kireedit kardiyan, debit kardiyan, bankkiyaa payduwaa baggaara, woy hara elektroonike meran miishsha immana danddayiyo hanotay daro biittatun giigiis.b Issi issi Yihoowa Markkati eti demmiyo miishshaappe ‘bantta keettan dagayidi’ miishshaa immiyo ogettuppe issuwaa goꞌettidi aginan aginan miishshaa immanawu prograamiyaa kessoosona.—1 Qoronttoosa 16:2.

  

• Halchchidi immiyoogaa: Miishsha immiyo issi issi ogeti loytti halchchana woy higgiyaa eranchchata zoretaa oychchana koshshiyoobata. Hegaadan halchchuwaa kessiyoogee ne deꞌiyo biittan qaraxaara gayttidaagan nena goꞌꞌiya issi issibaa demmanaadan maaddana. Deꞌuwan deꞌishin woy hayqqiyo wode halchchidi immana danddayiyo ogiyaabaa daroti eridoogan goꞌettidosona. Neenikka kaallidi deꞌiya ogetun miishshaa immanawu koyiyaabaa gidikko, gujo qofaa demmanawu hayyanaa ne heeran deꞌiya macara biiruwaa haasayissa:

  • bankkiyan deꞌiya miishshaa

  • inshuranssiyaanne xurataa

  • gadiyaanne keettaa

  • akisiyooniyaanne bonddiyaa

  • laataanne hadara miishshaa

Ne heeran neeni miishsha immana danddayiyo ogiyaabaa gujo qofaa demmanawu “Yihoowa Markkatuyyo Miishsha Imma” giya saytiyaa xeella.