Nuuni Merettido Gaasoy Aybee?

Geeshsha Maxaafay yootiyoobaa

Daro asay, nuuni merettidoy aybissakko eranawu koyiyo gishshawu, Nuuni saꞌan deꞌiyoy aybissee? woy Xoossay tana medhdhido gaasoy deꞌii? giyaageetu mala oyshata oychchees. Nuuni merettido gaasoy Yihoowaara dabbotaa minttidi deꞌanaassa gidiyoogaa Geeshsha Maxaafay yootees. Geeshsha Maxaafay yootiyo tuma gididabatuppe amaridaageeta akeeka.

• Xoossay nuna Medhdhidaagaa. Geeshsha Maxaafay hagaadan gees: “Nuna medhdhidaagee [Xoossaa]; nuuni aageeta.”—Mazamure 100:3; Ajjuutaa 4:11.

• Xoossay nuna gujjin, ubbabaa medhdhido gaasoy deꞌees.—Isiyaasa 45:18.

• Xoossay ‘ayyaanaabaa koshshay’ nuussi daanaadan oottidi medhdhiis; hegaappe issoy nuuni merettido gaasuwaa eranawu koyiyoogaa. (Maatiyoosa 5:3) I nuuyyo ayyaanaaban koshshiyaabay kumanaadan koyees.—Mazamure 145:16.

• Nuuni Xoossaara dabbotiyoogan ayyaanaaban nuussi koshshiyaabaa kunttoos. Xoossaara dabbotiyoogee danddayettennabadan issooti issooti qoppikkonne, Geeshsha Maxaafay hagaadan giidi nuna minttettees: “Xoossaakko shiiqite; ikka inttekko shiiqana.”—Yaaqooba 4:8; 2:23.

• Xoossaa dabbo gidanawu, nuuni I koyiyoogaadan deꞌana bessees. Geeshsha Maxaafay Eranchchaa 12:13n, “Xoossaassi yayya; a azazuwaa naaga. Aissi giikko, hegee asassi waanna ooso” yaagidi he gaasuwaa yootees.

• Sinttappe, Xoossay metuwaa xayssiyo wodenne baayyo goynniya ba dabboti merinaa deꞌuwaa demmanaadan oottiyo wode, Xoossay nuuyyo koyro halchchidobaa demmana danddayoos.—Mazamure 37:10, 11.