Asay Tana Zigirikko Waatoo?

Zigirssay qohiyoy aybissee?

Issi issi zigirssay keehi qohees—leemisuwawu, sunttaa mooranawu halchchidi wordduwa yootiyogaa. Shin zigirssay lefa gidikkonne issi asi bawu mata lagge giidi qoppiyo uray zigirikko hegee qohana danddayees!—Mazamure 55:12-14.

“Issi laggiya tana hara asawu qoppukku gaada zigiridoogaa siyaas. Hegee keehi qohiyaba! A hegaa malabaa aybissi haasayidaakko taani erikke.”—Ashilo.

Tumaa: Zigirida uri mata lagge gidin aggin, harati nebaa iitabaa haasayidoogaa eriyogee ufayssiyaba gidenna.

Azzanttiyabay—asay nebaa haasayiyogaa diggana danddayakka

Asay zigiriyo daro gaasoti deꞌoosona; hegeetuppe amaridaageeti:

Suurebaa qoppiyogaa. Asay issoy issuwabaa qoippiya mereta. Yaaniyo gishshawu, nuuni (haratubaa) issoy issuwara haasayiyogee wottin deꞌiyaba. Nuuni ‘haratubaakka qoppana’ bessiyogaa Geeshsha Maxaafay minttettees.—Piliphphisiyusa 2:4.

“Asaabaa haasayiyogee ubbatookka keehi ufayssiyaba!”—Biyanko.

“Asaabaa eriyogeenne hegaa haratuyyo yootiyogee tana loꞌꞌiyogaa akeekaas. Hegee aybissakko erikke—shin tana coo ufayssees.”—Kato.

Ooso birshshiyogaa. Beni wode ‘shemppo wodiyan oorattabaa odiyogaa woy siyiyogaa’ dosiya asay deꞌees. (Oosuwa 17:21) Ha wodiyankka hegaa mala!

“Issi issitoo oorattabi xayiyo wode, asay haasayiyobaa medhdhi kessees.”—Joꞌaano.

Hirggaa. Geeshsha Maxaafay nuuni nuna haratuura geeddarissennaadan yootees. (Galaatiya 6:4) Azzanttiyabay issi issi asay bawu hirggiyo gishshawu harata zigirees.

“Zigirssay zigiriya uraabaa odiyobay deꞌees. Hegee eti zigiriyo uraa bantta wozanan qanaatiyogaa bessees. Eti banttana ufayssanawu, woy haratuppe kehiyogaadan banttana ammanttanawu giidi harata zigiroosona.”—Pila.

Tumaa: Dosin ixxin, asay nebaa gujjin hara asaabaa haasayiyogee attenna.

Ufayssiyabay—asay nebaa haasayiyoban unꞌꞌettennan aggana danddayaasa

Asay nena zigiriyo ubbabaa diggana danddayakka; shin hegaa xeelliyagan neeni oottiyobaa doorana danddayaasa. Asay nena zigiriyogaa erikko, neeni oottana danddayiyo naaꞌꞌubati deꞌoosona.

DOORO 1: Karidi aggiyogaa. Zigirssay lefa gidikko darotoo hegaa karidi aggiyogee loꞌꞌo. “Elle hanqqettoppa” giya Geeshsha Maxaafaa zoriya oosuwan peeshsha.—Eranchchaa 7:9.

“Taani mule gaytta erenna naꞌaara aqo oyqqanawu qoppada wodiya aattawusu giya zigirssaa siyaas! Hegee qoodan yeggiyoba gidenna gishshawu, miiccada aggaagaas.”—Eliso.

“Zigirssaa xoonanawu loꞌꞌo kanddoy xale. Neeyyo loꞌꞌo kanddoy deꞌishin asay nebaa iitabaa haasayikkokka, amarida asa xallay hegaa ammanana. Nebay tumay qoncciyogee attenna.”—Alisono.

Maaddiya qofaa: (1) nebaa asay haasayidobaanne (2) hegan neeyyo siyettidabaa xaafa wotta. Neeni gaana bessiyabaa ne ‘wozanan’ qachchikko hegaa aggaaganaagee metennaba gidana danddayees.—Mazamure 4:4.

DOORO 2: Zigirida izaawa haasayissiyogaa. Issi issitoo zigirssay keehi qohiyaba gidikko, hegaa doommida uraa haasayissiyogee koshshiyaba gidana danddayees.

“Nena zigirida asata neeni haasayissikko, zigirssay bii biidi zigirettiya izaawa gakkiyogee attennaagaa erana danddayoosona. Hegaa bollikka metuwa birshshananne izaawaara dabbotaa ooraxissana danddayaasa.”—Eliso.

Nena zigirida uraara haasayanaappe kase kaalliya Geeshsha Maxaafaa maarata qoppa; qassi etaara deꞌiya oyshatakka nena oychcha.

• ‘Siyennan deꞌiiddi zaariyogee he uraayyo eeyyatetta.’ (Leemiso 18:13) ‘Taani hegaabaa wurssa eriyanaa? He zigirssaabaa tawu yootida uri ba siyidobaa bala ogiyan akeekideeshsha?’

• “Siyanawu eesotana bessees, qassi haasayanawunne hanqqettanawu eesotana bessenna.” (Yaaqooba 1:19) ‘Zigirida uraara haasayanawu hanna injje wodee? Taani he metuwabaa xalaalaa haasayiyanaa? Woy ta hanqqoy zarbbanaashin amarida wodiya takkiyakko loꞌꞌaneeshsha?’

• “Asay intteyyo oottanaadan intte koyiyo ubbabaa inttekka etayyo oottana bessees.” (Maatiyosa 7:12) ‘He izaawu tana haasayissiyaba gidiyakko, I tana waati haasayissanaadan koyiyanaa? Ayba hanotan I tana haasayissiyakko ufayttiyanaa? Ay mala qaalaaninne ay mala eeshshan haasayissiyakko loꞌꞌoo?’

Maaddiya qofaa: Nena zigirida uraara gayttanaappe kase ne gaanawu qoppidobaa xaafa. Yaatada issi woy naaꞌꞌu saaminttaa takka, ne xaafidobaa zaarettada nabbaba, qassi ne laammana koyiyobay deꞌikko akeeka. Ne oottanawu qoppidobaa xeelliyagan nena yelida uraara woy kayima laggiyara tobbite; qassi he uraa zoriya oychcha.

Tumaa: Deꞌuwan haniya darobatudan, zigirssaykka ne koyin haniyaba gidenna. Shin hegee neeni unꞌꞌettanaadan oottees giyogaa gidenna!