Xoossay Ba Qofaa Laammii?
Geeshsha Maxaafay yootiyoobaa
Ee laammees. Asay ba oottiyoobaanne haniyoobaa laammiyo wode Xoossay ba qofaa laammees. Leemisuwawu, beni Israaꞌeela asawu Xoossay hagaadan giidi pirddaa kiitaa yootiis: “Ooni erii, eti siyidi, bantta iita ogiyaappe simmanaakkonne. Yaatiyaakko taanikka eta oosuwaa iitatettaa gishshau, eta xaissanau qoppidoogaa agga bayana.”—Ermmaasa 26:3.
Daro Geeshsha Maxaafaa birshshettati Xoossay xayssanawu qoppidoogan “zilꞌꞌettidoogaa” ha xiqisiyan yootidosona. Hegee I mooriis giidi qoppanadan oottees. SHin koyro xaafettida Ibraawetto qaalaa birshshettay “qofaa laammiyoogaa” giyoogaa. Issi eranchchay hagaadan giis: “Issi asi ba hanotan laamettiyoogee Xoossaa pirdday laamettanaadan oottees.” Xoossay ba qofaa laammana danddayiyoogee I laammiyoogee attenna giyoogaa gidennaagee qoncce.
Geeshsha Maxaafay Xoossay ba qofaa laammibeennaagaa yootiyo amarida hanotata akeeka:
Xoossay ba qofaa laammidi Israaꞌeela deriya qangganawu Baalaaqawu eeno gibeenna.—Qoodaabaa 23:18-20.
Israaꞌeela Kawoy Saaꞌooli iitabaa oottiyoogaa aggennan ixxiyoorin, Xoossay araatappe A wottanawu qoppidoogaa laammibeenna.—1 Sameela 15:28, 29.
Xoossay ba Naꞌaa merinawu qeese oottanawu gelido qaalaa polana. Xoossay he qofaa laammenna.—Mazamure 110:4.
Geeshsha Maxaafay Xoossay mule laamettenna geenneeyye?
Ee, Xoossay, “Taani GODAI laamettikke” yaagidoogaa Geeshsha Maxaafay yootees. (Milkkiyaasa 3:6) Hegaadankka, Geeshsha Maxaafay, “Xoossai ba huuphen dummatennanne woi mirqqidi xumissenna [“ba sohuwaa laammiya eeshuwaadan laamettenna,” NW]” yaagees. (Yaaqooba 1:17) SHin hegee, Geeshsha Maxaafay Xoossay ba qofaa laammiyoogaa yootiyoobaa phalqqenna. Xoossaa eeshshay, A siiqoynne suure pirdday mule laamettenna. (Zaarettido Wogaa 32:4; 1 Yohaannisa 4:8) Gidikkokka, I asawu dumma dumma wode dumma dumma azazuwaa immana danddayees. Leemisuwawu, Xoossay Kawuwa Daawitawu naaꞌꞌu olatun azazidobay dumma dumma; gidikkokka, he naaꞌꞌu olatunkka xooniis.—2 Sameela 5:18-25.
Xoossay asaa medhdhidoogan zilꞌꞌettii?
CHii zilꞌꞌettenna. Gidoppe attin, daro asay awu azazettennaagan I zilꞌꞌettees. Nohe wode kumetta saꞌaa xayssida Bashshaa Haattaappe kase hanidabaa xeelliyaagan Geeshsha Maxaafay, “GODAI asaa ha sa7aa bollan medhdhidoogau azzaniis; ba wozanan keehippe seelettiis” yaagees. (Doomettaabaa 6:6) Ha xiqisiyan “azzaniis” giya qaalay “qofaa laammiyoogaa” bessiya Ibraawetto qaalaappe yiis. Bashshaa Haattaappe kase deꞌida daro asay iita gidido gishshawu, eta xeelliyaagan Xoossay ba qofaa laammiis. (Doomettaabaa 6:5, 11) I eti iitabaa oottanawu kuuyido gishshawu azzanikkonne, asa zariyawu qoppidobaa laammibeenna. I Nohenne A so asaa baggaara asa zariya Bashshaa Haattaappe ashshiis.—Doomettaabaa 8:21; 2 PHeexiroosa 2:5, 9.