Issi yelagay SHiiquwaa Addaraashaa biyaageeta xeellees

YELAGATI OYCHCHIYO OYSHAA

SHiiquwaa Addaraashan SHiiqana Koshshiyoy Aybissee?

Yihoowa Markkati eti goynniyo sohuwan, SHiiquwaa Addaraashan saaminttan saaminttan naaꞌꞌu galla shiiqoosona. Yaani oottiyoobay aybee, qassi he shiiqota shiiqiyoogan neeni waana goꞌettana danddayay?

SHiiquwaa Addaraashan Oosettiyaabay Aybee?

SHiiquwaa Addaraashay Geeshsha Maxaafaappe imettiya timirttiyaa tamaariyo soho. He shiiqoy nena kaallidi deꞌiya ogetun maaddana:

Xoossaabaa tumaa tamaaranaadan.
Ha wodiyan ha alamiyan haniiddi deꞌiyaabawu gaasoy aybakko akeekanaadan.
Neeni loꞌꞌo asaa gidanaadan.
Loꞌꞌo laggeta demmanaadan.

Hagaa ereetii? Yihoowa Markkatu SHiiquwaa Addaraashan nuuni tamaariyo waannabay Xoossaa Kawotettaabaa.—Maatiyoosa 6:9, 10; 24:14; Luqaasa 4:43.

SHiiqana Koshshiyoy Aybissee?

Tamaariyoobay nena maaddana. Yihoowa Markkatu SHiiquwaa Addaraashan tamaariyo Geeshsha Maxaafaa maaray neeni ‘aadhdhida eratettaa’ demmanaadan maaddana. (Leemiso 4:5) Hegaa giyoogee Geeshsha Maxaafay ne deꞌuwan neeni loꞌꞌobaa kuuyanaadan maaddana giyoogaa. Qassi kaalidi deꞌiyaageetu mala, nu deꞌuwan oychchiyo gita oyshatu zaaruwaa demmanaadan maaddana:

Kaallidi deꞌiyaabay saaminttaa wurssettan shiiqiyo shiiquwan nuuni tamaariyo haasaya huuphe yohotuppe amaridaageeta:

Geeshsha Maxaafaa Nu Deꞌuwawu Kaaleto Oottidi Goꞌettana Koshshiyoy Aybissee?
Metuwaa Wodiyan Maaduwaa Awuppe Demmana Danddayiyoo?
Xoossaa Kawotettay Ha Wodiyan Nuussi Oottiiddi Deꞌiyoobay Aybee?

“Tanaara tamaariya issi naꞌi shiiquwaa yiis. I nu so asaara uttiis; qassi nuuni xannaꞌiyo xuufeta awukka bessida. Ezggiyaageeti bantta qofaa yootiyo timirttetun ezggiyaageeti immiyo qofan I keehi maalaalettidoogaa shiiquwaappe simmin tawu yootiis. A woosa keettan eti nuuni xannaꞌiyoogaadan xannaꞌennaagaakka yootiis.”—Brenda.

Hagaa ereetii? SHiiqanawu miishshaa qanxxissokko qassi muxuwaata shiishshokko.

SHiiquwan neeni minettana. Nuuni shiiqiyo gaasotuppe issoy ‘issoi issuwaa minttettanaassa’ gidiyoogaa Geeshsha Maxaafay yootees. (Ibraawe 10:24, 25) Ba xallaa siiqiya asay kumido ha alamiyan, bantta goꞌꞌaappe aaruwan Xoossaanne haratu goꞌꞌaa kaseyiya asatuura dabbotettaa medhdhiyoogee keehi ufayssiyaaba.

“Gallassa kumettaa azzaniyonne daafuriyo wode deꞌees; shin SHiiquwaa Addaraashan deꞌiya asay taayyo woppay siyettanaadan oottoosona. SHiiquwaappe so simmiyo wode, keehi ufayttays qassi wonttetta galla gakkiya metuwawu genccaa demmays.”—Elizo.

Hagaa ereetii? Kumetta alamiyan deꞌiya 120,000ppe dariya Yihoowa Markkatu gubaaꞌeti, 60,000ppe dariya sohotun shiiqoosona. SHiiqiyaageetu qooday gujji gujji biyo gishshawu, layttan layttan amakaayiyan 1,500ppe dariya SHiiquwaa Addaraashati keexettoosona.a

Ne Laggeti Woygiyoonaa?

“Taani naaꞌꞌantto xekka timirtte keettan tamaariyo wode, tamaara tamaariyaara amarida wodiyawu nu shiiquwaa yaasu; qassi layttan dumma dumma gidida asati issippe Geeshsha Maxaafaa xannaꞌiyoogaa beꞌada keehi maalaalettaasu. Ubba qassi mata wodiyan, ta halaqay nu shiiquwaa yiis; qassi shiiquwan Geeshsha Maxaafaa xiqiseta darota goꞌettin beꞌidoogan keehi maalaalettiis. I hegaadan nashshidi yootiyoogaa beꞌidoogee taanikka shiiquwaa xoqqu oottada xeellanaadan oottiis!”—Jesika.

“Galla galla gakkiya unꞌꞌissiyaabaappenne metiyaabaappe woppaa demmanaadan shiiqoti tana maaddoosona. Nuuni ufayssiya deꞌuwaa waani deꞌanaakko, loꞌꞌo asaa waani gidanaakko, qassi haraa darobata tamaaroos. Ubbatoo minettadanne woppu gaada SHiiquwaa Addaraashaappe simmays.”—Timety.

“Taani shiiquwaa shoobbido issi bitanee shiiquwaappe simmin hagaadan giis: ‘Taani intte shiiquwaa shiiqidoy intte ammaniyoobay bala gidiyoogaa qonccissanawu koyido gishshaassa. SHin, haꞌꞌi taani ta ammanoy bala gidiyoogaa akeekaas!’ Qassi Yihoowa Markkati issoy issuwaa siiqiyaageeta gidiyoogaa beꞌidi maalaalettiis. I gujjidi hagaadan giis: ‘Taani inttenaara biron gayttidabaa gidikkonne daro layttawu erettiyo asaadan taani qoppanaadan oottideta!’”—Jakob.

“‘SHiiqoy wurosaara kiyaaggana’ gaada shiiquwaa biyo wodeti deꞌoosona. SHin shiiqoy doometti simmin, tawu siyettiya iitabay muleera xayees. SHiiquwaappe simmin, issoy issuwaara kaaꞌoos, qassi tawu koyro siyettida qofaa muleera dogays. SHiiquwaa beennan aggiyaakko, haꞌꞌi tawu deꞌiya loꞌꞌo laggeta demmana danddayikke.”—Madseno.

a SHiiqoy deꞌiyoosa eranawu, “Yihoowa Markkatu Gubaaꞌe SHiiquwaa” giya saytiyan gelada “Ne Heeraagaa Koya” giyaagaa bochcha.