Yesuusi Waati Ashshii?

Geeshsha Maxaafay yootiyoobaa

Yesuusi ba deꞌuwaa wozo yarshsho oottidi immiyoogan ammanettida asata ashshiis. (Maatiyoosa 20:28) Yaatiyo gishshawu, Yesuusa Geeshsha Maxaafay “ha sa7aa ashshiyaagaa” yaagees. (1 Yohaannisa 4:14) Gujjidikka hagaadan gees: “Asi atotettaa Yesuusa baggaara demmanaappe attin, hara o baggaaranne demmenna; nuuni a sunttan attanau bessees; aissi giikko, Xoossai saluwaappe garssan asassi immido hara suntti baawa.”—Oosuwaa 4:12.

Yesuusi bana ammaniya ‘ubbawu hayqqiis.’ (Ibraawe 2:9; Yohaannisa 3:16) Hegaappe simmin, “Xoossai haiquwaappe a denttiis”; qassi, I ayyaana mereta gididi saluwaa biis. (Oosuwaa 3:15) Yesuusi yan “eta gishshaa gaannatanau merinau de7iyo gishshau, Xoossaakko ba baggaara yiyaageeta muleera ashshanau danddayees.”—Ibraawe 7:25.

Yesuusi nu gishshaa gaannatana koshshiyoy aybissee?

Nuuni ubbay nagaranchcha. (Roome 3:23) Nagaray asay Xoossaappe haakkanaadan ootteesinne hayquwaa kaalettees. (Roome 6:23) SHin, Yesuusi wozuwaa yarshshuwan ammaniya ubbawu ‘gaannatees.’ (1 Yohaannisa 2:1) Xoossay eta woosaa siyanaadaaninne wozuwaa yarshshuwaa baggaara eta nagaraa atto gaanaadan oychchiyoogan I etawu gaannatees. (Maatiyoosa 1:21; Roome 8:34) Yesuusi gaannatidi oychchiyoobay Xoossaa sheniyaara maayettiyaaba gidiyo gishshawu, Xoossay hegaa zaarees. Xoossay asaa “a baggaara ashshanau” Yesuusa saꞌaa kiittiis.—Yohaannisa 3:17.

Nuuni attanawu Yesuusan ammaniyoogaa xallay gidii?

Akkay. Nuuni attanawu Yesuusan ammanana koshshikkonne, hegaappe harabaa oottana koshshees. (Oosuwaa 16:30, 31) Geeshsha Maxaafay hagaadan gees: “[Ayyaanay, NW] shaahettido bollai haiqqidaagaa gidiyoogaadan, hegaadankka qassi oosoi shaahettido ammanoi haiqqidaagaa.” (Yaaqooba 2:26) Nuuni attanawu:

• Yesuusabaanne A Aawaa Yihoowabaa tamaarana koshshees.—Yohaannisa 17:3.

• Eta minttidi ammanana bessees.—Yohaannisa 12:44; 14:1.

• Etawu azazettiyoogan nu ammanuwaa oosuwan bessana koshshees. (Luqaasa 6:46; 1 Yohaannisa 2:17) Yesuusi, “saluwan de7iya [A] Aawai giidoogaa oottiya” urappe attin, A “ta Godau” giya ubbay attennaagaa tamaarissiis.—Maatiyoosa 7:21.

• Metiyaabay deꞌishinkka ubbatoo nu ammanuwaa oosuwan bessana koshshees. Yesuusi, “wurssettaa gakkanaashin gencciya urai attana” giidi yootiyoogan hegaa qonccissiis.—Maatiyoosa 24:13.