Yesuusi hariyaa toggidi bonchchuwan Yerusalaame gelees

Masiyaabaa Yootiya Hiraagati Yesuusi Mase Gidiyoogaa Bessiyoonaa?

Geeshsha Maxaafay yootiyoobaa

Ee. Yesuusi saꞌan deꞌiyo wode, ‘ha saꞌaa ashshiyaagaabaa,’ woy ‘Halaqaa Masiyaabaa’ yootiya daro hiraagata poliis. (Daaneela 9:25; 1 Yohaannisa 4:14) I hayqqi simmin deꞌiya wodetunkka Masiyaara gayttida hiraagata poliiddi takkiis.—Mazamure 110:1; Oosuwaa 2:34-36.

“Masiyaa” giyoogee woygiyoogee?

Ibraawettuwan Mashiyak (Masiyaa) giyoonne Giriikettuwan Kiristos (Kiristtoosa) giyo naaꞌꞌu qaalatu birshshettaykka “Tiyettidaagaa” giyoogaa. Yaatiyo gishshawu, “Yesuus Kiristtoosa” giyoogaa birshshettay “Tiyettida Yesuusa” woy “Masiyaa Yesuusa” giyoogaa.

Beni wode, issi uri issi dumma maatawu sunttettiyo wode, darotoo A huuphiyan zaytee tiyettees. (Wogaabaa 8:12; 1 Sameela 16:13) Yesuusa Mase oottidi woykko awu gita maataa immidi sunttidaagee Xoossaa. (Oosuwaa 2:36) SHin Xoossay Yesuusa zayitiyan gidennan, geeshsha ayyaanan tiyiis.—Maatiyoosa 3:16.

Masiyaa xeelliyaagan odettida hiraagati dumma dumma asatun polettana danddayiyaabee?

Akkay. Issi asa kushiyaa ashaaray izaawu xallaa shaakki erissiyoogaadan, Geeshsha Maxaafan odettida hiraagati issi Masiyaa woykko Kiristtoosa xallan polettiyoogaa bessoosona. SHin Geeshsha Maxaafay “worddanchcha Kiristtoosatinne wordduwaa hananabaa yootiyaageeti . . . denddidi banttau danddayettikko, harai atto Xoossai dooridoogeetakka balettanau gita malaataanne garamissiyaabaa” bessanaagaa yootees.—Maatiyoosa 24:24.

Masee sinttappe qonccana danddayii?

Akkay. Masee Israaꞌeela biittaa Kawuwaa Daawita zare gidanaagaa Geeshsha Maxaafay kasetidi yootiis. (Mazamure 89:3, 4) SHin Ayhudatu mayzza aawatubaa yootiya, Daawita zareti xaafettido mazggafay xayiis; hegee Roomati 70 M.Ln, Yerusalaame xoonido wode xayennan aggenna.a He wodeppe doommidi, bana kawuwaa Daawita zare giidi geeshshi yootana danddayiya uri baa. SHin Yesuusi saꞌan deꞌiyo wode he mazggafati deꞌiyo gishshawu, morkketuura ubbay I Daawita zare gidiyoogaa kashi gibookkona.—Maatiyoosa 22:41-46.

Masiyaa xeelliyaagan Geeshsha Maxaafan odettida hiraagati aappunee?

Masiyaabaa yootiya hiraagay hagaa keena giidi suure yootana danddadayettenna. Leemisuwawu, Masiyaabaa qoncciyan yootiya xiqisetun deꞌiya hiraagaatakka asay qoodiyo ogee dumma dumma. Isiyaasa 53:2-7y Masiyaa xeelliyaagan daro hiraagata yootees. Issi issi asay hegan qonccida ubbabaa issi hiraagadan qoodiyo wode, hara asay qassi hegaa shaakki shaakki qoodees.

Masiyaa xeelliyaagan odettida hiraagatuppe Yesuusi polido amaridaageeta

Hiraagaa	Deꞌiyoosaa	Poluwaa
Abrahaama zare	Doomettaabaa 22:17, 18	Maatiyoosa 1:1
Abrahaama naꞌaa Yisaaqa zare	Doomettaabaa 17:19	Maatiyoosa 1:2
Israaꞌeela zaretun Yihudaappe yelettiis	Doomettaabaa 49:10	Maatiyoosa 1:1, 3
Kawuwaa Daawita zare	Isiyaasa 9:7	Maatiyoosa 1:1
Geelaꞌeeppe yelettiis	Isiyaasa 7:14	Maatiyoosa 1:18, 22, 23
Beetaliheemen yelettiis	Mikiyaasa 5:2	Maatiyoosa 2:1, 5, 6
Sunttay Amaanuꞌeela geetettiisb	Isiyaasa 7:14	Maatiyoosa 1:21-23
Hiyyeesa keettan yelettiis	Isiyaasa 53:2	Luqaasa 2:7
I yeletti simmin guutta naata asay woriis	Ermmaasa 31:15	Maatiyoosa 2:16-18
Gibxxeppe xeegettiis	Hoose7a 11:1	Maatiyoosa 2:13-15
Naazireeta asa geetettiisc	Isiyaasa 11:1	Maatiyoosa 2:23
Kiitettidaagee appe kasetidi yiis	Milkkiyaasa 3:1	Maatiyoosa 11:7-10
Mase gididi 29 M.Ln tiyettiisd	Daaneela 9:25	Maatiyoosa 3:13-17
Xoossay A ‘Ta Naꞌaa’ giis	Mazamure 2:7	Oosuwaa 13:33, 34
I Xoossaa keettawu mishettiis	Mazamure 69:9	Yohaannisa 2:13-17
Mishiraachchuwaa yootiis	Isiyaasa 61:1	Luqaasa 4:16-21
Galiilan mishiraachchuwaa yootiyoogan gita pooꞌuwaa pooꞌissiis	Isiyaasa 9:1, 2	Maatiyoosa 4:13-16
Muuseegaadan maalaaliyaabaa oottiis	Zaarettido Wogaa 18:15	Oosuwaa 2:22
Muuseegaadan Xoossaa qofaa yootiis	Zaarettido Wogaa 18:18, 19	Yohaannisa 12:49
Darota harggiyaappe pattiis	Isiyaasa 53:4	Maatiyoosa 8:16, 17
Asay A woraabi gaanaadan oottibeenna	Isiyaasa 42:2	Maatiyoosa 12:17, 19
Qohettidaageetussi qarettiis	Isiyaasa 42:3	Maatiyoosa 12:9-20; Marqqoosa 6:34
Xoossaa suure pirddaa qonccissiis	Isiyaasa 42:1, 4	Maatiyoosa 12:17-20
Maalaaliyaabaa Zoriyaagaa	Isiyaasa 9:6, 7	Yohaannisa 6:68
Yihoowa sunttaa erissiis	Mazamure 22:22	Yohaannisa 17:6
Leemisuwan haasayiis	Mazamure 78:2	Maatiyoosa 13:34, 35
Kaalettiyaagaa, Halaqaa	Daaneela 9:25	Maatiyoosa 23:10
Daroti A ammanibookkona	Isiyaasa 53:1	Yohaannisa 12:37, 38
Xubbiya shuchchaa	Isiyaasa 8:14, 15	Maatiyoosa 21:42-44
Asay A kariis	Mazamure 118:22, 23	Oosuwaa 4:10, 11
Gaasoy baynnan ixettiis	Mazamure 69:4	Yohaannisa 15:24, 25
Hariyaa toggidi bonchchuwan Yerusalaame geliis	Zakkaariyaasa 9:9	Maatiyoosa 21:4-9
Naati sabbidosona	Mazamure 8:2	Maatiyoosa 21:15, 16
Yihoowa sunttan yiis	Mazamure 118:26	Yohaannisa 12:12, 13
Ammanettiyo laggee kaddiis	Mazamure 41:9	Yohaannisa 13:18
A 30 xaqara biran aatti immiise	Zakkaariyaasa 11:12, 13	Maatiyoosa 26:14-16; 27:3-10
Laggeti A yeggibayidi baqatidosona	Zakkaariyaasa 13:7	Maatiyoosa 26:31, 56
Worddo markkati A bolli markkattidosona	Mazamure 35:11	Maatiyoosa 26:59-61
Mootiyaageetu sinttan coꞌꞌu giis	Isiyaasa 53:7	Maatiyoosa 27:12-14
Asay A bolli cuchchiis	Isiyaasa 50:6	Maatiyoosa 26:67; 27:27, 30
Asay A huuphiyaa shociis	Mikiyaasa 5:1	Marqqoosa 15:19
Lissuwan garafettiis	Isiyaasa 50:6	Yohaannisa 19:1
Bana shociyaageeta eqettibeenna	Isiyaasa 50:6	Yohaannisa 18:22, 23
Deriyaa haariyaageeti A bolli maqettidosona	Mazamure 2:2	Luqaasa 23:10-12
Kusheenne tohoy mittaa bolli misimaariyan cadettiis	Mazamure 22:16	Maatiyoosa 27:35; Yohaannisa 20:25
Asay A maayuwan saamaa yeggiis	Mazamure 22:18	Yohaannisa 19:23, 24
Nagaranchchatuura qoodettiis	Isiyaasa 53:12	Maatiyoosa 27:38
Asay A qilliiciisinne cayiis	Mazamure 22:7, 8	Maatiyoosa 27:39-43
Nagaranchchatu gishshaa waayettiis	Isiyaasa 53:5, 6	1 PHeexiroosa 2:23-25
I Xoossay yeggi aggido asa milatiis	Mazamure 22:1	Marqqoosa 15:34
Ciyyee walahettido caala woyne eessaa asay awu immiis	Mazamure 69:21	Maatiyoosa 27:34
Hayqqana haniyo wode saamettiis	Mazamure 22:15	Yohaannisa 19:28, 29
Ba ayyaanaa Xoossawu hadaraa immiis	Mazamure 31:5	Luqaasa 23:46
Hayqqiis	Isiyaasa 53:12	Marqqoosa 15:37
Nagaraa xayssanawu wozuwaa qanxxiis	Isiyaasa 53:12	Maatiyoosa 20:28
A meqettay meqqibeenna	Mazamure 34:20	Yohaannisa 19:31-33, 36
Cadettiis	Zakkaariyaasa 12:10	Yohaannisa 19:33-35, 37
Duretu duufuwan moogettiis	Isiyaasa 53:9	Maatiyoosa 27:57-60
Hayquwaappe denddiis	Mazamure 16:10	Oosuwaa 2:29-31
A aatti immidaagaa sohuwan hara uri doorettiis	Mazamure 109:8	Oosuwaa 1:15-20
Xoossaappe ushachcha baggaara uttiis	Mazamure 110:1	Oosuwaa 2:34-36

a Makilintokinne Istirongi giigissido Saykilopidee, “Ayhuda zerettatubay xaafettido mazggafay Yerusalaame bashshaappe kase gidennan, he wode xayidoogawu siree baa” yaagees.

b Amaanuꞌeela giyo Ibraawetto sunttaa birshshettay “Xoossay nunaara deꞌees” giyoogaa; Yesuusi Mase gididi oottiyoobaa hegee loytti qonccissees. I saꞌan deꞌidoogeenne I oottidobay Xoossay ba ashkkaratuura deꞌiyoogaa bessiyaaba.—Luqaasa 2:27-32; 7:12-16.

c “Naazireeta asa” giyoogee “aacaa” giyo birshshettay deꞌiyo netser giyo Ibraawetto qaalaappe yeennan aggenna.

d Masee 29 M.Ln qonccidoogaa yootiya Geeshsha Maxaafaa qoodaabaa gujjada eranawu, “Daaneela Hiraagay Masee Yaana Wodiyaa Kasetidi Yootido Ogiyaa” giya huuphe yohuwaa xeella.

e Ha hiraagay Zakkaariyaasa maxaafan deꞌees; shin Maatiyoosi “hananabaa yootiya Ermmaasi” yootiis giidi xaafiis. (Maatiyoosa 27:9) Ermmaasa maxaafay “hananabaa yootiyaageetu maxaafaa” giyo Geeshsha Maxaafaa shaahuwan issi issitoo koyruwan deꞌiyaaba milatees. (Luqaasa 24:44) Zakkaariyaasa maxaafaynne harati issippe deꞌiyo he maxaafata Maatiyoosi “Ermmaasa” giidaba milatees.