Geeshsha Maxaafay Immiyoogaa Xeelliyaagan Woygii?
Geeshsha Maxaafay yootiyoobaa
Dosaaninne suurebaa qoppidi imotaa immanaadan Geeshsha Maxaafay minttettees. Hegaadan immiyo wode ekkiyaageekka immiyaageekka ufayttiyoogaa qonccissees. (Leemiso 11:25; Luqaasa 6:38) Yesuusi hagaadan giis: ‘Ekkiyaagaappe aaruwan immiyaagee ufayttees.’—Oosuwaa 20:35.
Nuuni immiyoogee Xoossaa ufayssiyoy awudee?
Nuuni dosan immiyo wode Xoossay ufayttees. Geeshsha Maxaafay, “Xoossai ufaissan immiya uraa siiqiyo gishshau, qarettiiddi woi dosennan immiyoogaa gidennan, immiya urai huuphen huuphen ba wozanan qoppidobaa immo” gees.—2 Qoronttoosa 9:7.
Xoossay ufayttiyo ‘geeshsha ammanuwan’ koyettiya issibay wozanappe immiyoogaa. (Yaaqooba 1:27) Maadoy koshshiyoogeeta kehatettan maaddiya uri Xoossaa ufayssiyaabaa oottees; qassi Xoossay hegaadan kehiyoogaa baassi talꞌꞌiyoobadan xeellees. (Leemiso 19:17) Hegaadan immiya urawu Xoossay zaaranaagaa Geeshsha Maxaafay yootees.—Luqaasa 14:12-14.
Nuuni immiyoogee Xoossaa ufayssennay awudee?
Issi uri bawu goꞌettanawu qoppidi immiyo wode Xoossay ufayttenna. Hegaa bessiya leemisota:
Asan nashettanawu qoppiyoogaa.—Maatiyoosa 6:2.
Kushe zaarana gi qoppidi immiyoogaa.—Luqaasa 14:12-14.
Atotettaa demmana giidi immiyoogaa.—Mazamure 49:6, 7.
He imotan Xoossay ufayttennabaa oottiyo wode. Leemisuwawu, issi uri ceeriyaa kaaꞌana mala woy jallissiyaabaa goꞌettana mala woy ushshaa likkiyaappe aattidi uyanaadan miishshaa immiyoogee bala. (1 Qoronttoosa 6:9, 10; 2 Qoronttoosa 7:1) Hegaadankka, baassi koshshiyaabawu oottana danddayiiddi oottennan ixxiya urawu immiyoogee likke gidenna.—2 Tasalonqqe 3:10.
Ba so asaa maaddennaagaa keena haratuyyo kehatettan darobaa immiyo wode. Bantta keettaa ayssiyaageeti bantta so asawu koshshiyaabaa kunttana bessiyoogaa Geeshsha Maxaafay tamaarissees. (1 Ximootiyoosa 5:8) Bantta keettaa ayssiyaageeti bantta so asay metootishin haratuyyo kehatettan immiyoogee likke gidenna. Qassi bawu deꞌiya aquwaa ‘Xoossawu imettidaba’ giidi bana yelida cimidaageetussi koshshiyaabaa kunttennan ixxiya ura Yesuusi boriis.—Marqqoosa 7:9-13.