Taani Hayqqanawu Koyays—Hayqqanawu Qoppiyogaa Agganawu Geeshsha Maxaafay Tana Maaddana Danddayii?
Geeshsha Maxaafay yootiyobaa
Ee! “Waayettiyageeta minttettiya Xoossay” Geeshsha Maxaafaa xaafissiis. (2 Qoronttoosa 7:6) Geeshsha Maxaafay payyatettaabaa yootiya maxaafa gidana xayikkonne, banttana woranawu qoppiya daroti he qofaa agganaadan maaddiis. An deꞌiya loꞌꞌo zoree nenakka maaddana danddayees.
Geeshsha Maxaafay maaddiya ayba zoriya yootii?
● Neeyyo siyettiyabaa haratussi yoota.
Geeshsha Maxaafay yootiyobaa: “Laggee mule wodekka siiqees; ishaikka metuwaa wode maaddanaassi yelettees.”—Leemiso 17:17.
Hegaa birshshettaa: Nuuni unꞌꞌissiyabaa qoppiyo wode haratu maadoy nuussi koshshees.
Neeyyo siyettiyabaa neeni haratuyyo yootana xayikko, keehi deexxiyabaa nerkka tookkaasa. Shin haratuyyo yootikko, woppu gaananne ne hanotabaa loꞌꞌobaa qoppana danddayaasa.
Hagaadan oottanawu mala: Neeyyo siyettiyabaa ne so asaappe issuwawu woy ammanettida laggiyawu hachchi yoota.a Neeyyo siyettiyabaa xaafiyogankka nebaa qonccissana danddayaasa.
● Aakimeta maaduwa oychcha.
Geeshsha Maxaafay yootiyobaa: “Harggiya asatussappe attin, payya asatussi aakime koshshenna.”—Maatiyosa 9:12.
Hegaa birshshettaa: Nuuni sakettiyo wode aakime keetti baana koshshees.
Bana barkka woranawu qoppiyogee guuggiya harggiyawu malaata gidana danddayees. Hara harggiyagaadan, he harggee sakkiyogeekka yeellayiyaba gidenna. Guuggiya sahoy akkamettana danddayiyoba.
Hagaadan oottanawu mala: Danddayettida keenan sohuwara aakimiya maaduwa koya.
● Xoossay neeyyo qoppiyogaa hassaya.
Geeshsha Maxaafay yootiyobaa: “Woni, ichchashu qeeri kafoti naaꞌꞌu santtimiyan bayzettokkonaayye? Shin hegeetuppe issuwanne Xoossay dogenna. . . . Yayyoppite, intte he qeeri kafotu ubbaappe aadhdheeta.”—Luqaasa 12:6, 7.
Hegaa birshshettaa: Neeni Xoossaayyo keehi alꞌꞌo.
Nena ebelo godoo giyay baynnabadan qoppana danddayaasa, shin Xoossay ne waayiya akeekees. Neeni hagaappe simmin deꞌanawu koyennabadan qoppikkonne, I nena siiqees. Mazamure 51:17y, “Abeet Xoossau, . . . meqqida wozanaa neeni karakka” yaagees. Xoossay nena siiqiyo gishshawu, neeni paxa deꞌanaadan koyees.
Hagaadan oottanawu mala: Xoossay nena siiqiyogaa bessiya naqaashaa Geeshsha Maxaafaappe pilgga. Leemisuwawu, Geeshsha Maxaafaa xannaꞌanawu maaddiya Yihoowakko Shiiqa giya maxaafaa shemppo 24 xeella.
● Xoossaa woossa.
Geeshsha Maxaafay yootiyobaa: “[Xoossay] intteyyo qoppiyo gishshau, inttena hirggissiya ubbabaa a bolli olite.”—1 PHeexiroosa 5:7.
Hegaa birshshettaa: Neeyyo tumuppe siyettiyabaanne nena hirggissiyabaa awu yootanaadan Xoossay koyees.
Neeni genccanaadan Xoossay neeyyo sarotettaanne wolqqaa immana. (Piliphphisiyusa 4:6, 7, 13) I hegaadan oottiyogan, azzanidi bana woossiyageeta maaddees.—Mazamure 55:22.
Hagaadan oottanawu mala: Hachchi Xoossaa woossa. Yihoowa gaada A sunttaa xeesada neeyyo siyettiyabaa awu yoota. (Mazamure 83:18) Genccanaadan maaddana mala A woossa.
● Geeshsha Maxaafay yootiyo hidootaa wotta dentta qoppa.
Geeshsha Maxaafay yootiyobaa: “Nuuni demmana giidi ufaissan naagi uttidoogee, nu shemppuwaayyo markkabiyaa oiqqiya qaaxxenna birata mala; he nuuni demmana giidi, ufaissan naagi uttidoogee erettida mino.”—Ibraawe 6:19.
Hegaa birshshettaa: Beetay qaattiyo markkabiyagaadan, neeyyo siyettiyabaykka sohuwara laamettana danddayees; shin Geeshsha Maxaafaa hidootay neeni woppu gaanaadan maaddees.
He hidootay coo amottiyo polettennaba gidennan, nu waayiyawu gaaso gidiyabaa xayssanawu Xoossay gelido qaalaara gayttidaba.—Ajjuutaa 21:4.
Hagaadan oottanawu mala: “Keha Wodee Yaana Giidi Hidootana Danddayiyoo?” giya huuphe yohuwa nabbabada, Geeshsha Maxaafay yootiyo hidootaabaa gujjada era.
● Nena ufayssiyabaa ootta.
Geeshsha Maxaafay yootiyobaa: “Wozani ufaittiyoogee asassi lo77o xale.”—Leemiso 17:22.
Hegaa birshshettaa: Nuna ufayssiyabaa oottiyogee nu guuggiya payyatettawu maaddees.
Hagaadan oottanawu mala: Nena ufayssiya issibaa ootta. Leemisuwawu, ufayssiya muuziqaa siya, minttettiyabaa nabbaba woy allaxxissiyabaa ootta. Harata maaddanawu guuttabaa oottiyogeekka neeni keehi ufayttanaadan maaddana.—Oosuwa 20:35.
● Ne payyatettaa naaga.
Geeshsha Maxaafay yootiyobaa: “Bollaa meezeyiyogee . . . maaddees.”—1 Ximootiyosa 4:8.
Hegaa birshshettaa: Nuuni bollaa minttiyabaa oottiyogee, loytti xiskkiyogeenne payyatettawu maaddiya qumaa miyogee goꞌꞌees.
Hagaadan oottanawu mala: Tammanne ichchashu daqiiqawu gidikkonne, kare kiyada hemetta.
● Neeyyo siyettiyabaynne harabati deꞌuwan laamettiyogaa hassaya.
Geeshsha Maxaafay yootiyobaa: “Wontto intte de7oi ai hananaakkonne erekketa.”—Yaaqooba 4:14.
Hegaa birshshettaa: Keehi unꞌꞌissiya metoy, haray atto neeni mule giigenna gaada qoppiyo metoykka xayana.
Ne hanotay hachchi ay keena iita gidikkokka, wontto laamettana danddayees. Yaaniyo gishshawu, gencciyo ogiya koya. (2 Qoronttoosa 4:8) Nena unꞌꞌissiya metoy issi wode xayana, shin nena nerkka worikko hegaa giigissana danddayakka.
Hagaadan oottanawu mala: Keehi hidootaa qanxxidi hayqqanawu koyida asatubaa Geeshsha Maxaafaappe nabbabada, eti kase qoppibeenna hanotan eta deꞌoy waani laamettidaakko akeeka. Amarida leemisota beꞌa.
Hayqqanawu koyida asatubaa Geeshsha Maxaafay yootii?
Ee. Geeshsha Maxaafay hayqqanawu koyida amarida asatubaa yootees. Xoossay eta hanqqettibeenna, ubba eta maaddiis. Nenakka hegaadan maaddana danddayees.
Eelaasa
● I oonee? Eelaasi Xoossay erissidobaa yootiya xala asa. Shin, ikka issi issitoo hidootaa qanxxiis. Yaaqooba 5:17y, “Eelaasi nu mala asa” yaagees.
● I hayqqanawu koyidoy aybissee? Eelaasi issi wode, barkka attidabadaaninne aynne maaddennabadan qoppiisinne yayyiis. Yaatiyo gishshawu, “Ta shemppuwaa ekka” giidi Yihoowa woossiis.—1 Kawotu Maxaafaa 19:4.
● A maaddidabay aybee? Eelaasi baayyo siyettiya ubbabaa Xoossawu yootiis. Xoossay A waati minttettidee? Xoossay Eelaasawu qoppiyogaa bessiis, qassi ba gita wolqqaa ayyo qonccissiis. Xoossay Eelaasi haꞌꞌikka maaddiya asa gidiyogaa ayyo yootiis, qassi ayyo qoppiya mino laggiya immiis.
▸ Eelaasabaa nabbaba: 1 Kawotu Maxaafaa 19:2-18.
Iyyooba
● I oonee? Iyyoobi tumu Xoossawu ammanettidi goynnida, cora so asay deꞌiyo dure asa.
● I hayqqanawu koyidoy aybissee? Qoppennan, Iyyooba bolli daro iitabay gakkiis. Awu deꞌiya ubbay xayiis. A naati ubbay daafaban hayqqidosona. A iita harggee oyqqiis. Wurssettan qassi, I ba metuwa ba kushiyan ehiis giidi wordduwan A mootidosona. Iyyoobi hagaadan giis: “Taani ta de7uwaa karaas; taani merinau de7anau koyikke.”—Iyyooba 7:16.
● A maaddidabay aybee? Iyyoobi Xoossaa woossiis, qassi bawu siyettiyabaa haratuyyo yootiis. (Iyyooba 10:1-3) Eelihu giyo qarettiya laggee I ba hanotaabaa suure qoppanaadan maaddiyogan A minttettiis. Ubbaappe aaruwan, Iyyoobi Xoossaa zoriyanne maaduwa eeno giidi ekkiis.
▸ Iyyoobabaa nabbaba: Iyyooba 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13
Muusa
● I oonee? Muuse Israaꞌeelata beni kaalettidaagaanne ammanettidi Xoossay erissidobaa yootidaagaa.
● I hayqqanawu koyidoy aybissee? Muuseyyo oottiyo darobay deꞌees, asay A ubbatoo borees, qassi I keehi daafuriis. Yaatiyo gishshawu I, “Tana ha77i wora baya” yaagidi Xoossaa woossiis.—Qoodaabaa 11:11, 15.
● A maaddidabay aybee? Muusee baayyo siyettiyabaa Xoossawu yootiis. Yaatin I keehi unꞌꞌettennaadan, A oosuwan maaddana mala Xoossay harata sunttiis.
▸ Muusebaa nabbaba: Qoodaabaa 11:4-6, 10-17
a Neeni nena woranawu keehi koyiyaba gidikko, qassi neeni ammanettiyo uri ne matan deꞌennaba gidikko, elle gakkana danddayiya urawu silkkiya dawala.