1-3. (a) Ba deꞌuwan suurebaa dooriyoogan Yaasu loꞌꞌo leemiso gididoy aybissee? (b) Nuuni kuushshaa kuuyiyo wode ay hassayana bessii?

“DOORITE” giya qaalay keehi wolqqaamaba. Dooriyoobay nuuni ayba ogiyan deꞌanaakko maaddees. Leemisuwau, issi uri hemettiiddi balla ogee deꞌiyoosaa gakkiis gaada qoppa. I awu simmidi baanau dooranee? He uri biyoosaa eriyaaba gidikko, he ogetuppe issoy i biyoosaa efees; haray qassi harasaa efees.

² Geeshsha Maxaafay wolqqaamabaa kuuyida daro asatubaa yootees. Leemisuwau, Qaayeeli hanqquwaa mittanau woy hanqquwaa suullanau qofaa qachana koshshiis. (Doo. 4:6, 7) Yaasu tumu Xoossau woy worddo xoossatussi goynnanau doorana koshshiis. (Yaasa 24:15) Yaasu Yihoowakko shiiqidi deꞌanau koyiyo gishshau, hegaadan oottanau maaddiya ogiyan hemettanau dooriis. Qaayeeli hegaadan oottanau halchibeenna gishshau, bana Yihoowappe haassiya ogiyan hemettanau dooriis.

³ Nuna issi issitoo, balla ogiyaappe issuwaa dooriyoogaa malabay gakkees. Hegaa malabay gakkiyo wode, ne halchuwaa hassaya; he halchoy neeni oottiyo ubbaban Yihoowa bonchissiyoogaanne nena appe shaakkiya aybanne oottennan aggiyoogaa. (Ibraawe 3:12 nabbaba.) Ha huuphe yohuwaaninne hagaappe kaalliyaagan, nuuni aybinne nuna Yihoowappe haassanaadan oottana koshshenna laappun yohota pilggana.

OOSUWAA

4. Oosuwaa oottiyoogee koshshiyaaba gididoy aybissee?

⁴ Kiristtaaneti banttassinne bantta soo asaassi koshshiyaaba kunttana bessees. Geeshsha Maxaafay ba soo asaassi koshshiyaabaa kunttanau koyenna uri ammanenna uraappekka iita gidiyoogaa yootees. (2 Tas. 3:10; 1 Xim. 5:8) Oosoy deꞌuwan keehi koshshiyaaba; shin issi uri oosoy bana Yihoowappe haassanaadan oottana danddayees. Ayba ogiyan?

5. Nuuni ooso oyqqanau koyiyo wode, akeekana bessiyaabay aybee?

⁵ Neeni ooso oyqqanau koyiyaabadan qoppa. Neeni deꞌiyo biittan ooso demmiyoogee keehi metiyaaba gidikko, koyro demmido ay oosonne oyqqanau paacettana danddayaasa. He oosoy Geeshsha Maxaafaa maaraara phalqqettiyaaba gidikko shin? He oosuwaa gaasuwan, neeni ayyaanaabaa oosuwaa oottiyo wodee woy so asaara issippe aattiyo wodee guuxxiyaaba gidikko shin? Ooso xayidi uttiyoogaappe hanenna oosuwaa oottiyoogee keha ga qoppada, ayba oosonne oyqqanau eeno guutee? Suure gidenna ogiyan hemettanau dooriyoogee nena Yihoowappe haassana danddayiyoogaa hassaya. (Ibr. 2:1) Neeni biron ooso oyqqanau koyiyaaba woy oosuwaa laammanau koyiyaaba gidikko, loꞌꞌo kuushsha kuuyana danddayiyoy ayba ogiyaanee?

6, 7. (a) Oosuwaara gayttidaagan issi uri ay halchana danddayii? (b) Neeni Yihoowakko shiiqanaadan oottiya halchoy awugee, qassi aybissi?

⁶ Qommoora odidoogaadan, ne halchuwaa hassaya. ‘Taani ooso koyiyoy aybissee?’ gaada nena oycha. Oosuwaa neeni ne halchuwaa polanau maaddiyaabadan, giishin aggennan Yihoowau oottanaadan neessinne ne soo asaassi koshshiyaabaa kunttanau maaddiyaabadan qoppiyaaba gidikko, Yihooway nena anjjana. (Maa. 6:33) Neessi oosoy xayiyo wode woy deꞌoy iiti iiti biyo wode, Yihooway nena maaddiyo ogiyaa erees. (Isi. 59:1) I, “Xoossau goinniya asata paaciyaappe waati ashshanaakko erees.”—2 PHe. 2:9.

⁷ Hara baggaara qassi, ne halchoy duretanaagaa xalla gidikko shin? Geella neeni duretana danddayaasa. SHin, neeni duretikkonne, hegaa daafan qohettana danddayaasa. (1 Ximootiyoosa 6:9, 10 nabbaba.) Neeni ne deꞌuwan miishshaanne oosuwaa xoqqu oottada xeelliyaaba gidikko, hegee neeni Yihoowappe haakkanaadan oottees.

8, 9. Yelidaageeti oosuwaabaa qoppiyoogaara gayttidaagan ay hassayana koshshii? Qonccissa.

⁸ Neessi naati deꞌikko, neeni oottiyoobay ne naata waati qohanaakko woy maaddanaakko qoppa. Ne naati neeni oosuwaa xoqqu oottada xeelliyoogaa akeekiyoonaayye, Yihoowaara deꞌiya dabbotaa xoqqu oottada xeelliyoogaa akeekiyoonaa? Neeni bonchettiyoogaa, hayttatiyoogaanne duretiyoogaa ne deꞌuwan kaseyiyoogaa eti akeekikko, eti neegaadan hegaa mala qohiya ogiyaa kaallanddonaashsha? Woy qassi neeni oottiyoobay neeni aawa woy aayo gidiyoogaadan, eti nena bonchiyoogaa agganaadan oottaneeshsha? Issi yelaga Kiristtaaniyaa hagaadan gaasu: “Taani hassayiyo wodiyaappe doommidi, ta aaway ba oosuwan buskkattees. Koyro, i minnidi oottiyoy nu soo asay ishalo deꞌo deꞌanaadan koyiyo gishshataassa gidennan aggenna. I nuussi koshshiyaabaa loyttidi kunttanau koyiis. SHin, mata wodeppe doommidi issi issibay laamettiis.” I oosoppe harabaa erenna; qassi ba soo asau koshshenna keehi alꞌꞌobaa shammees. Hegaappe denddidaagan, eta soo asay Yihoowau oottanaadan harata minttettiyoogaappe, keehi daro miishshaa shiishshiyoogan erettidaageeta gididosona. A ba aaway daro miishshaa shiishshanau gidennan, so asay Yihoowakko shiiqanaadan maaddanau minnidi oottiyaakko ufayttiyoogaa yootaasu.

⁹ Yelidaageetoo, oosuwaa keehi xoqqu oottidi xeelliyoogee inttena Yihoowappe haassanaadan oottoppite. Nuuni shiishshana danddayiyo keehi alꞌꞌo aqoy miishshaa gidennan, ayyaanaabaa gidiyoogaa intte ammaniyoogaa intte oottiyooban intte naata bessite.—Maa. 5:3.

10. Issi yelagay oosuwaa dooriyo wode, ay qoppana danddayii?

¹⁰ Neeni ooso oyqqanau qoppiya yelaga gidikko, suure ogiyaa waatada doorana danddayay? Hagaappe kase beꞌidoogaadan, neeni ne deꞌuwan halchidobaa erana koshshees. Neeni tamaaranabaynne oottanabay Kawotettaabaa loytta oottanaadan maaddiyaabeeyye, nena Yihoowappe haassiyaabee? (2 Xim. 4:10) Neeni daro miishshay deꞌiyo wode xallan ufayttiya alamiyaa asaa mala gidanau koyay? Woy qassi, “Taani kase yelaga; ha77i simmi cimaas; shin xillo asi coo attin, woikko a naati miyoobaa woossin, taani mulekka be7a erikke” yaagida Daawitaagaadan, Xoossan ammanettanau koyay? (Maz. 37:25) Issi ogee nena Yihoowappe haassiyaagaa, qassi haray neeni aybippenne injje deꞌo deꞌanaadan oottiyaagaa gidiyoogaa hassaya. (Leemiso 10:22; Milkkiyaasa 3:10 nabbaba.) Yaatin, neeni doorana ogee awugee?a

ALLAXXIYOOBAANNE WODIYAA AATTIYOOBAA

11. Geeshsha Maxaafay allaxxiyoobaanne wodiyaa aattiyoobaa xeelliyaagan ay tamaarissii, shin nuuni ay hassayana koshshii?

¹¹ Geeshsha Maxaafay ufayttennaadan diggenna; qassi allaxxiyoobaynne wodiyaa aattiyoobay coo wode wurssiyooba geenna. PHauloosi Ximootiyoosau, “Asai ba bollaa minttiyoogee guuttaa go77ees” yaagidi xaafiis. (1 Xim. 4:8) Geeshsha Maxaafay ubba, “Miiccanaukka wodee de7ees,” qassi “ufaittidi yexxanaukka wodee de7ees” yaagees; hegaadankka, bessiyaagaa keenaa shemppanaadan zorees. (Era. 3:4; 4:6) SHin neeni naagettana xayikko, allaxxiyoobaynne wodiyaa aattiyoobay nena Yihoowappe haassana danddayees. Ayba ogiyan? Neeni allaxxanaunne wodiyaa aattanau bessennabaa dooriyoogaananne hegan keehi daro wodiyaa wurssiyoogaana.

12. Neeni allaxxanaunne wodiyaa aattanau dooriyoobaara gayttidaagan ay qoppana koshshii?

¹² Koyruwan, nuuni allaxxanaunne wodiyaa aattanau ay doorana koshshiyaakko qoppa. Neeni allaxxananne wodiyaa aattana danddayiyo loꞌꞌobay deꞌiyoogee tuma. SHin, yaatanau dooriyoobaappe dariya baggay Xoossay ixxiyooba gidida danobay, iita ayyaanaa oosoynne shori baynna asho gaytotettaara gayttidabay deꞌiyoogaa. Yaatiyo gishshau, neeni allaxxiyoobaanne wodiyaa aattiyoobaa akeekan qoppana koshshees. Hegee nena maaddiiyye qohii? Hegee neeni danobaa oottanaadan, annaacettanaadan woy ne biittaa siiqanaadan denttettii? (Lee. 3:31) Woy qassi ne miishshaa wurssiyaabee? Hegee harata xubbaneeshsha? (Roo. 14:21) Neeni allaxxanaunne wodiyaa aattanau dooriyoobay ay mala asaara gayttanaadan oottii? (Lee. 13:20) Hegee neeni iitabaa oottanau amottanaadan denttettii?—Yaaq. 1:14, 15.

13, 14. Neeni ay keena wodiyau allaxxana koshshiyaakko qoppana bessiyoy aybissee?

¹³ Neeni allaxxiyoobaaninne wodiyaa aattiyooban ay keena wodiyaa wurssiyaakkokka qoppa. ‘Taani allaxxaydda keehi daro wodiyaa wurssiyo gishshau, ayyaanaabaa oosuwaa oottanau wode xayiyaanaa?’ yaagada nena oycha. Neeni allaxxiyoobaaninne wodiyaa aattiyooban daro wodiyaa wurssiyaaba gidikko, hegee neeni bessiyaagaa keenaa gazddanaadan oottenna. SHin, suure allaxxiyaageeti keehi ufayttoosona. Aybissi? Eti kasetidi keehippe koshshiyaabaa polidoogaa eriyo gishshau, allaxxidoban zilꞌꞌettokkona.—Piliphphisiyuusa 1:10, 11 nabbaba.

¹⁴ Allaxxiiddi daro wodiyaa wurssiyoogee ufayssiyaaba milatana danddayikkonne, hegaadan oottiyoogee nena Yihoowappe haassana danddayees. Layttay 20 gidido Kiimo giyo michiyaa hegaa bana gakkidabaappe akeekaasu. A kase ubbatoo Arbba gallassi, Qeeraa gallassinne Woggaa gallassi gibiraa keettaa biyoogaa yootaasu. SHin, haꞌꞌi a oottana bessiya keehi koshshiyaabay deꞌiyoogaa akeekaasu. A hagaadan gaasu: “Leemisuwau, taani aqinye gidiyo gishshau, haggaazuwau guuraara 12 saatiyan beegottays; yaatiyo gishshau, qammaappe laappun woy hosppun saate gakkanau gibiraa keettan takkana danddayikke. Asaara issippe kaaꞌiyoogee ubbatoo iitaba gidennaagaa erays; shin hegee qofaa wora zaariyaaba gidana danddayees. Hara ubbabaadan, hegaakka likkiyaappe aattana koshshenna.”

15. Yelidaageeti bantta naati allaxxiyooban ufayttanaadan waati maaddana danddayiyoonaa?

¹⁵ Yelidaageeti banttassinne bantta naatussi asatettaaninne ayyaanaaban koshshiyaabaa kunttana koshshees; qassi ufayssiyaabaa giigissana bessees. Hegee gazddissiyaabaa giigissiyoogaa gujjees. Neeni naꞌa yelidaba gidikko, wodiyaa aattiyo ubbabaa iitabadan xeelliya, ufayttennaadan diggiya ura gidoppa. SHin, qohiyaabaappe naagetta. (1 Qor. 5:6) Neeni kasetada loytta qoppikko, allaxxiyoogaaninne wodiyaa aattiyoogan ne soo asay tumuppe ufayttanaadan oottiyaabaa demmana danddayaasa.b Yaatiyoogan, neenikka ne naatikka Yihoowakko shiiqanaadan maaddiya ogiyaa doorana danddayeeta.

SO ASAARA DEꞌIYA DABBOTAA

16, 17. Yelida darota gakkida azzanttiyaabay aybee, qassi eti ay keena azzanidaakko Yihooway akeekiyoogaa waatidi eriyoo?

¹⁶ Yelidaageetu giddooninne naatu giddon deꞌiya siiqoy keehi wolqqaama gidiyo gishshau, Yihooway ba asaa siiqiyo siiquwaa qonccissanau hegaa goꞌettiis. (Isi. 49:15) Hegaa gishshau, nu soo asaappe issi uri Yihoowappe duuxxiyo wode, nuuni keehi azzaniyoogee bessiyaaba. I naꞌiyaa bohettido issi michiyaa hagaadan gaasu: “Ta wozanay shabbirettiis. ‘A Yihoowappe duuxxidoy aybissee?’ yaagada qoppaas. Tana mooranchadan xeellaas.”

¹⁷ Yihooway neeni ay keena azzanidaakko erees. I saꞌan deꞌiya ba keettaa asaappe koyroogee, qassi guyyeppe Bashshaa Haattaappe kase deꞌida asatuppe daroti makkalido wode, “ba wozanan keehippe seelettiis.” (Doo. 6:5, 6) Hegaa malabay gakkibeenna uri hegee ay keena azzanttiyaabaakko loytti akeekenna. Gidikkokka, intte soo asa gidida bohettida uri oottido nagaray nena Yihoowappe haassanaadan oottiyoogee eratetta gidenna. Yaatin, intte so asa gidida uri Yihoowappe duuxxiyo wode he azzanttiyaaban waanada genccana danddayay?

18. Issi naꞌay Yihoowappe duuxxikko, yelidaageeti banttana mooranchadan xeellana koshshennay aybissee?

¹⁸ Hegee hanidoy neeni moorido gishshataassa gaada qoppoppa. Ba huuphiyaa Yihoowau geppidi xammaqettida so asaa yara ubbay “ba toohuwaa tookkanau” bessees; qassi Yihoowau oottanaakkonne woy oottennaakko i ba huuphen doorana koshshees. (Gal. 6:5) Yihooway mooranchadan xeelliyoy nena gidennan, nagaraa oottidaagaa. (Hiz. 18:20) Qassi, harata amassaloppa. Yihooway seeranau wottido maaraa boncha. Gubaaꞌiyaa qohiyaabaappe naagiya cimata amassaloppa. Dabloosa eqetta; qassi he hanotay nena Yihoowappe haassanaadan oottoppa.—1 PHe. 5:8, 9.

19, 20. (a) Bantta naati bohettin azzanidaageeti genccanau ay oottana danddayiyoonaa? (b) Eti ufayssan naagiyoobay aybee?

¹⁹ SHin, neeni Yihoowa bolli lanccikko, appe haakkaasa. Neeni aybippenne aaruwan, ubba so asaa dabbotaappekka aattada Yihoowa kaseyanau murttidoogaa, neeni siiqiyo intte soo asay akeekana koshshees. Yaatiyo gishshau, he hanotan genccanau ayyaanaaban minnada deꞌa. Ammanettida Kiristtaane ishanttuppenne michonttuppe shaahettoppa. (Lee. 18:1) Ne metuwaa Yihoowayyo yoota. (Maz. 62:7, 8) Intte soo asa gidida bohettida uraara silkkiyan woy imeeliyan gayttanau gaasoyiyoobaa koyoppa. (1 Qor. 5:11) Ayyaanaabaa minnada ootta. (1 Qor. 15:58) Qommoora ibay odettido michiyaa hagaadan gaasu: “Ta naꞌiyaa Yihoowakko simmiyo wode taani o maaddana mala, Yihoowayyo minnada oottana koshshiyoogaanne ayyaanaabankka minnana bessiyoogaa erays.”

²⁰ Geeshsha Maxaafay siiqoy “ubbabaikka hanana giidi, ufaissan” naagiyoogaa yootees. (1 Qor. 13:4, 7) Neeni siiqiyo uri Yihoowakko simmana gaada naagiyoogee bala gidenna. Layttan layttan, nagaraa oottidaageetuppe daroti bantta nagaraappe simmidi Yihoowa soo simmoosona. Eti bantta nagaraappe simmiyo wode Yihooway lanccenna. Ubba i ‘atto gees.’—Maz. 86:5.

ERATETTAN DOORA

21, 22. Koyidobaa dooriyo maataa goꞌettiyo wode ay oottanau murttadii?

²¹ Yihooway asaa naatussi koyidobaa dooriyo maataa immiis. (Zaarettido Wogaa 30:19, 20 nabbaba.) SHin he maatay aawatettaakka gujjees. Kiristtaaneti ubbay hagaadan giidi banttana oychana koshshees: ‘Taani biyo ogee awugee? Oosoy woy allaxxiyoobaynne wodiyaa aattiyoobay woy so asaara deꞌiya dabbotay tana Yihoowappe haassanaadan oottidanaa?’

²² Yihooway ba asaa siiqiyoogaa mule aggenna. Nuuni Yihoowappe haakkana danddayiyoy bala ogiyaa kaalliyo wode xallaana. (Roo. 8:38, 39) SHin hegee hanana bessennaba! Aybinne nena Yihoowappe haassennaadan murtta. Hagaappe kaalliya huuphe yohuwan neeni hegaadan murttana koshshiyo hara oyddubata beꞌana.

1, 2. (a) Seexaanaa ‘qofay’ aybee? (b) Nuuni Xoossaakko shiiqanaadan aybi maaddii?

XOOSSAA YIHOOWAY asay aara dabbotanau koyanaadan oottidi medhiis. SHin, Seexaanay nuunikka aagaadan, Yihoowa kaaletoy nuussi koshshenna giidi qoppanaadan koyees. Edene ataakiltte sohuwan Hewaana hegaadan qoppanaadan oottidi cimmoosappe doommidi, Seexaanay he worddo qofaa aassees. (Doo. 3:4-6) He wodeppe doommidi, daro asay he bala qofaa qoppees.

² Nuuni Seexaanaa piriyan gelennaagee ufayssiyaaba. “Nuuni a qofaa ereettees.” (2 Qor. 2:11) Balabaa dooranaadan denttettidi, Seexaanay nuna Yihoowappe haassanau malees. SHin, hagaappe kasetiya huuphe yohuwan beꞌidoogaadan, oosuwaara, wodiyaa aattiyoobaaranne so asaara gayttidaagan suurebaa doorana danddayoos. Ha huuphe yohoy qassi tekinoloojiyaara, payyatettaara, miishshaaranne otoruwaara gayttidaagan suurebaa qoppiyoogee, nuuni ‘Xoossaakko shiiqanaadan’ maaddiyoy ayba ogiyaanakko qonccissees.—Yaaq. 4:8.

TEKINOLOOJIYAA

3. Tekinoloojiyaa maaddiya ogiyan woy qohiya ogiyan waatidi goꞌettana danddayiyaakko leemisuwan yoota.

³ Daro asay komppiyuteriyaanne hara elektiroonike miishshaa goꞌettees. Bessiyaagaadan goꞌettikko, he miishshati maaddana danddayoosona. Bessenna ogiyan goꞌettikko, hegeeti nuna Yihoowappe haassana danddayoosona. Komppiyuteriyaabaa ane qoppa. Wochiyo Keelaa xaafanaunne attamanau nu ishantti komppiyuteriyaa goꞌettoosona. Komppiyuteree pilgganaunne asaara gayttanau maaddees; qassi issi issitoo ufayssiyaaban wodiyaa aattanaadan maaddees. SHin, wonttin qammin komppiyuteriyaabaa qoppananne a goꞌettana danddayoos. Zalꞌꞌanchati asay mata wode oosettidabaa demmana koshshees giidi qoppanaadan hiillan ammanttoosona. Issi yelagay zammaana komppiyuteriyaa keehi koyido gishshau, hegaa shammanau ba kilahuwaappe issuwaa qosan bayzziis. Hegee keehi azzanttiyaaba!

4. Issi ishay komppiyuteriyaa likkiyaappe aattidi goꞌettiyoogaa agganau waatidee?

⁴ Tekinoloojiyaa bessenna ogiyan woy likkiyaappe aattada goꞌettiyoogan neeyyo Yihoowaara deꞌiya dabbotaa mooriyoogee hegaappekka aaruwan qohiyaaba. Layttay 30 heera gidido Yoona giyo ishay Geeshsha Maxaafaa xannaꞌiyoogaa aggidi, komppiyuteriyaa goꞌettiyoogan daro wodiyaa wurssiyoogaa yootiis.a I darotoo Intternneetiyaa goꞌettiiddi keehi qamissees. I keehi daafuriyo wode, Intternneetiyan kiitaa xaafiyoogaa, woy shori baynnaagaa gidikkonne, biiduwaa beꞌiyoogaa agganau keehi metootiyoogaa yootiis. He iita amaliyaa agganau bana maaddana mala, Yooni xiskkiyo saatee gakkiyo wode komppiyuteree bau gorddettanaadan giigissiis.—Efisoona 5:15, 16 nabbaba.

5, 6. (a) Naatuura gayttidaagan yelidaageetuyyo ayba aawatettay deꞌii? (b) Yelidaageeti bantta naatussi loꞌꞌo laggeti deꞌanaadan waatana danddayiyoonaa?

⁵ Yelidaageetoo, intte naati oottiyo ubbabaa kaalliyoogee koshshennaba gidikkonne, eti komppiyuteriyaa goꞌettiyo ogiyaa intte kaallana koshshees. Intte naati inttena wayssenna mala giidi shori baynnabaa, iita biiduwaa kaassaanne iita ayyaana oosuwaa Intternneetiyan beꞌanaadan, qassi iita laggetuura gayttanaadan oottoppite. Intte hegaadan oottiyaaba gidikko, eti, ‘Ta aawaynne ta aayyiyaa aynne geenna gishshau, hegee bessiyaaba’ giidi qoppana danddayoosona. Yelidaageetoo, yelagata gujjin, intte naata Yihoowappe haassana danddayiya aybippenne naagiyoogee intte aawatetta. Mehee doꞌaykka ba maraa qohiyaabaappe naagees. Maahiyaa ba maraa issi uri qohiyo wode waaniyaakko qoppa.—Hoose7a 13:8⁠ra gatta xeella.

⁶ Intte naati loꞌꞌo leemiso gidiya, yelaga Kiristtaanetuuranne cima Kiristtaanetuura wodiyaa aattanaadan maaddite. Intte naati intte etaara wodiyaa aattanaadan koyiyoogaa hassayite! Yaatiyo gishshau, etaara issippe miiccanau, kaaꞌanau, oottanaunne ‘Xoossaakko shiiqanau’ wodiyaa bazzite.b

PAYYATETTAA

7. Nuuni ubbay payya gididi deꞌanau koyiyoy aybissee?

⁷ Sahettida uraa darotoo, “Nena waatii?” giidi oychoos. Nu koyro aawaynne aayyiyaa Seexaanay banttana Yihoowappe haassanaadan eeno giido gishshau, nuuni ubbay sahettoos. Nuuni sahettiyo wode Yihoowayyo oottanau metootiyo gishshau, sahoy Seexaanaa halchoy polettanaadan oottees. Qassi hayqqiyo wode, Yihoowau mule oottana danddayokko. (Maz. 115:17) Yaatiyo gishshau, nuuni payya gididi deꞌanau danddayiyo ubbabaa oottanau koyoos.c Qassi nu ishanttu payyatettaabaynne sarotettaabay nuna qofissees.

8, 9. (a) Nuuni nu payyatettaabaa xallau qoppennaadan naagettana danddayiyoy ayba ogiyaanee? (b) Ufayttiyoogau goꞌꞌay aybee?

⁸ Gidoppe attin, nuna qofissiyay nu payyatettaabaa xalla gidana koshshenna. Issoti issoti, miyoobaa woy xalettiyoobaa Xoossaa Kawotettaa mishiraachuwaappekka aaruwan mishettidi yootoosona. Yaatiyoogan, eti harata maaddiyaabadan qoppana danddayoosona. Gidikkonne, gita shiiquwan woy Kawotettaa Addaraashan shiiqoy doommanaappe kasenne shiiqoy wuri simmin, payya woy puulancha gidanau issi issibaa goꞌettanaadan woy oottanaadan issi uraa minttettiyoogee bessiyaaba gidenna. Aybissi?

⁹ Nuuni issippe shiiqiyoy ayyaanaabaa tobbanaassa, qassi Xoossaa geeshsha ayyaanay demissiyo ufayssay nuuyyo daranaadaana. (Gal. 5:22) Harati nena oychin oychana xayin, hegaa mala sohuwan payyatettau maaddiyaabaa zoriyoogee woy immiyoogee shiiquwaa halchuwaara maayettennaba; qassi hegee harati ufayttennaadan oottana danddayees. (Roo. 14:17) Payyatettaara gayttidabaa issi uri ba huuphe kuuyana bessees. Hegaa bollikka, ubba sahuwau xale eriya uri baawa. Ubba qassi, gooba dottoretikka cimoosona, sahettoosonanne hayqqoosona. Nuuni payyatettaabau keehi hirggiyoogee nu baree aduqqanaadan oottana danddayenna. (Luq. 12:25) Hara baggara qassi, “wozani ufaittiyoogee asassi lo77o xale.”—Lee. 17:22.

10. (a) Yihoowa sinttan issi uri loꞌꞌo gidanaadan oottiyaabi aybee? (b) Nuuni muleera payya gidanay awudee?

¹⁰ Nu meraabaakka qoppiyoogee bessiyaaba. SHin, cima milatennaadan giidi nu meraa laammanau baaxetana koshshenna. Geeshsha Maxaafay, “Puulummida huuphee bonchcho kallachcha; hegeekka beettiyoi xillo de7uwaa de7iina” yaagees. (Lee. 16:31) Yihooway nuna hegaadan xeelliyo gishshau, nuunikka nuna aagaadan xeellana koshshees. (1 PHeexiroosa 3:3, 4 nabbaba.) Yaatin, meraa loꞌꞌanau giidi, shuhettiyoogan woy xalettiyoogan qohana danddayiyaabaa oottiyoogee bessiyaabee? Nu layttay ay keena woy nu payyatettay ay mala gidikkonne, nu wozanaappe kiyiya loꞌꞌotettaa pulttoy ‘GODAA ufayssaa.’ (Nah. 8:10) Nuuni muleera payya gidanaynne nu puulay yelagatettaagaa mala gidanay ooratta alamiyaana. (Iyy. 33:25; Isi. 33:24) He wodee gakkanaassi, nuuni loꞌꞌo dooro doorananne Yihooway qaalaa gelidobaa ammanana koshshees. Hegee nuuni ha wodiyan nu deꞌuwan ufayttanaadaaninne wonttin qammin payyatettaara gayttidabaa qoppennaadan maaddees.—1 Xim. 4:8.

MIISHSHAA

11. Miishshay pire gidana danddayiyoy ayba ogiyaanee?

¹¹ Miishshay iita gidenna; qassi suure zalꞌꞌe zalꞌꞌiyoogee bala gidenna. (Era. 7:12; Luq. 19:12, 13) SHin nuuni ‘miishsha siiqikko,’ Yihoowappe haakkeetees. (1 Xim. 6:9, 10) ‘Ha saꞌaa deꞌuwau hirggiyoogee,’ giishin deꞌuwau koshshiyaabaa demmanau keehi hirggiyoogee ayyaanaaban nuna cuullana danddayees. ‘Duretettaykka’ nuna hegaadan cuullana danddayees; aybissi giikko, nuuni duretettay ufayssaanne sarotettaa demissees giidi bala ogiyan qoppanaadan oottidi nuna cimmees. (Maa. 13:22) “Ooninne” Xoossaassinne miishshaassi haarettana danddayennaagaa Yesuusi geeshshidi yootiis.—Maa. 6:24.

12. Daro miishshaa eesuwaara demmanau asay ha wodiyan oottiyoobay aybee? Nuuni likke gidennabaa dooriyoogaappe haakkana danddayiyoy ayba ogiyaanee?

¹² Miishshaa bala ogiyan xeelliyoogee iitabau kaalettana danddayees. (Lee. 28:20) Issoti issoti eesuwaara daro miishshaa demmanau koyiyo gishshau, lotoriyaa qanxxidosona. Issi issi ishantti eesuwaara miishshaa demissees giidi qoppiyo zalꞌꞌiyaa zalꞌꞌiyoogaa doommidosona; qassi gubaaꞌiyan deꞌiya haratikka daro miishshaa demmana danddayiyoogaa etassi yootoosona. Hara ishantti qassi, daro dichaa immanau qaalaa gelidi, gubaaꞌiyan deꞌiyaageeti banttau daro miishshaa talꞌꞌanaadan oychidosona. Yaaretada ne miishshaa coo xayssoppa. Akeekancha gida. Eesuwaara daro miishshaa demmiyoogee muletoo danddayettiyaaba gidenna.

13. Miishshaara gayttidaagan Yihoowa xeelay alamiyaagaappe dummatiyoy ayba ogiyaanee?

¹³ Nuuni Yihoowa “kawotettaanne a xillotettaa” kaseyiyaaba gidikko, deꞌuwau koshshiyaabaa demmanau baaxetiyo wode i nuna anjjees. (Maa. 6:33; Efi. 4:28) Yihooway nuuni likkiyaappe aaruwaa oottidi shiiquwan xiskkanaadan woy Kawotettaa Addaraashan uttidi miishshau hirgganaadan koyenna. SHin, alamiyan deꞌiya daro asay miishshaa demmana xallau bichaariyoogan sinttappe woppa deꞌuwaa deꞌana danddayiyaabadan qoppees. Eti bantta naati banttaagaadan miishshaa siiqanaadan minttettoosona. Hegaadan qoppana bessennaagaa Yesuusi yootiis. (Luqaasa 12:15-21 nabbaba.) Hagee, yaaretiiddi Yihoowa dabbo gididi deꞌanau koyida Gehaaza nuuni hassayanaadan oottees.—2 Kaw. 5:20-27.

14, 15. Nuuni woppa deꞌo deꞌanau miishshay maaddees giidi qoppana bessennay aybissee? Leemisuwaa yoota.

¹⁴ Issi issi argganttati keehi gita moliyaa oyqqidi yeddennan ixxido gishshau muukettidosona. Issi Kiristtaaniyaa hegaa malabay gakkana danddayii? Alekisa giyo gubaaꞌe cimay miishshaa coo xayssennaagaa yootiis. I saamunaa addiniitaanne qoraphees. SHin, i amarida miishshaa dagayidi, ba oosuwaa aggidi aqinye gidanau qoppiis. Yaatiyo gishshau, i zalꞌꞌiyaa doommiis; ba miishsha ubban bayzzanabaa shammiis. Ubba hegaa shammanau miishshaa talꞌꞌiis. SHin shammi wottidobay keehi hiraysiis. Alekisi ba miishshaa zaaretti demmanau murttiis. I shammidobaa wottishshikko, hegee takkidi alꞌꞌana giidi qoppiis.

¹⁵ Alekisi ba zalꞌꞌiyaappe harabaa aynne qoppenna. I ayyaanaabaa qoppanau metootiis; qassi au xiskkoykka xayiis. SHin, i shammidobay zaarettidi waagaa gujjibeenna. Alekisi minjjido miishshay wurido gishshau, ba keettaa bayzziis. I ba soo asay keehi unꞌꞌettanaadan oottidoogaa yootiis. SHin i keehi koshshiyaabaa tamaariis. I, “Seexaanaa alamiyan ammanettiya ooninne keehippe azzananaagaa haꞌꞌi eraas” yaagiis. (Lee. 11:28) Ha alamiyan minjjiyooban, zalꞌꞌiyooban woy miishshaa demissiya eran ammanettiyoogee ‘ha saꞌaa xoossaa,’ Seexaanan ammanettiyoogaa mala. (2 Qor. 4:4; 1 Xim. 6:17) He wodeppe doommidi, Alekisi “wonggeliyaa mishiraachchuwaa gishshau” sima deꞌuwaa deꞌiis. I yaatiyoogan, inne a soo asay ufayttanaadaaninne Yihoowakko loytti shiiqanaadan oottidoogaa yootiis.—Marqqoosa 10:29, 30 nabbaba.

OTORUWAA

16. Ceeqettiyoogee otorettiyoogaappe dummatiyoy ayba ogiyaanee?

¹⁶ Bessiyaaban ceeqettiyoogee loꞌꞌo gidana danddayees. Leemisuwau, nuuni Yihoowa Markka gidiyoogan ubbatoo ceeqettana koshshees. (Erm. 9:24) Bessiyaagaadan nu huuphiyaa bonchiyoogee loꞌꞌo kuushshaa kuuyanaadaaninne kandduwaa mooriyaabaappe naagettanaadan maaddees. SHin nu qofaa woy nu maataa keehi xoqqu ootti xeelliyoogee nuna Yihoowappe haassana danddayees.—Maz. 138:6; Roo. 12:3.

17, 18. (a) Geeshsha Maxaafan odettida otorancha asatubaanne bantta huuphiyaa kawushshida asatubaa yoota. (b) Issi ishay otoroy bana Yihoowappe haassennaadan naagettidoy ayba ogiyaanee?

¹⁷ Geeshsha Maxaafay otorettida asatubaakka bantta huuphiyaa kawushshida asatubaakka yootees. Kawuwaa Daawiti ba huuphiyaa kawushshidi Yihooway bana kaalettanaadan oychiis; yaatin Yihooway a anjjiis. (Maz. 131:1-3) SHin, otorettiya Kawota, giishin Naabukadanaxooranne Belshshaaxaara Yihooway kawushshiis. (Dane. 4:30-37; 5:22-30) Nu huuphiyaa kawushshiyoogaara gayttidaagan ha wodiyankka nuna paacciyaabay deꞌees. Gubaaꞌiyau oottiya, layttay 32 gidido Rayini ba kase gubaaꞌiyaa laammiis. I, “Taani takkennan gubaaꞌe cima gidana gaada qoppaas. SHin, gubaaꞌe cima gidennan issi layttay aadhiis” yaagiis. Rayini he gubaaꞌiyaa cimati bana bessiyaagaadan bonchibeennabadan qoppidi, yiillotanee woy lanccanee? Woy qassi i otoroy bana Yihoowappenne A asaappe haassanaadan paqqadidi, gubaaꞌe shiiquwaa biyoogaa agganee? Nena gidiyaakko shin, waatuutee?

¹⁸ Rayini, “Koyiyoobay polettennan gamꞌꞌiyoogaara gayttidaagan taani nu xuufiyan demmido ubbabaa nabbabaas” yaagiis. (Lee. 13:12) I gujjidikka hagaadan giis: “Taani ta huuphiyaa kawushshananne danddayancha gidana koshshiyoogaa akeekiyoogaa doommaas. Yihooway tana loohissanaadan eeno gaana koshshiyoogaa akeekaas.” Rayini babaa qoppiyoogaa aggidi, gubaaꞌiyaaninne haggaazuwan harata maaddiyoogaa ba wozanan wottiis. I sohuwaara mino xinaateta xannaꞌissiyoogaa doommiis. I, “Taani issi layttanne baggaappe guyyiyan gubaaꞌe cima gidido wode, garamettaas. Taani haggaazuwan keehi ufayttiyo gishshau, hegee tana qofissiyoogaa aggiis” yaagiis.—Mazamure 37:3, 4 nabbaba.

YIHOOWAKKO SHIIQADA DEꞌA!

19, 20. (a) Ha huuphe yohotun beꞌidobati nuna Yihoowappe haassennaadan ay oottana danddayiyoo? (b) Yihoowa dabbo gididi deꞌidaageetuppe ay tamaarana danddayiyoo?

¹⁹ Ha huuphe yohuwaaninne hagaappe kasetiyaagan tobbido ubbabay nu deꞌuwan koshshiyaaba. Nuuni Yihoowayyo oottiyaageeta gidiyoogan ceeqettoos. Ufayttiya keetta asaynne payyatettay Yihooway immido gita imota. Oosoynne miishshay nuussi koshshiyaabaa kunttanau maaddiyoogaa eroos. Allaxxiyoogee ufayssiyaaba gidiyoogaanne tekinoloojee maaddana danddayiyoogaa eroos. SHin, hegeetuppe awugaaranne gayttidaagan oottiyoobay bessenna wodiyaana, likkiyaappe aadhidaba, woykko bessennaba gididi nuna Yihoowappe haassana danddayees.

²⁰ Seexaanay nuna Yihoowappe haassanau koyees. Gidikkokka, hegaa malabay ne bollinne ne soo asaa bolli gakkennaadan teqqana danddayaasa. (Lee. 22:3) Yihoowakko shiiqada, a dabbo gidada deꞌa. Hegaadan oottanau nuuni etappe tamaarana danddayiyo, leemiso gidiya daro asatubaa Geeshsha Maxaafay yootees. Heenookinne Nohee ‘Xoossaara hemettidosona.’ (Doo. 5:22; 6:9) Muusee “beettenna Xoossaa be7idabaadan, genccidi sinttau biis.” (Ibr. 11:27) Yesuusi muletoo saluwan deꞌiya ba Aawaa ufayssiyaabaa oottido gishshau, Xoossay a ubbatoo maaddiis. (Yoh. 8:29) Hegaa mala asatu leemisuwaa kaalla. ‘Ubba wode ufaytta. Ubba wode Xoossaa woossa. Ubbaban galata.’ (1 Tas. 5:16-18) Aybinne nena Yihoowappe haassanaadan oottoppa!