Hegaadan siyettiyoy Kristafara, Haanninne Jini xallaassa gidenna. Kumetta saꞌan deꞌiya daro asay Xoossay banttana ba dabbodan xeelliyoogaa ammanoosona. Neeni shin? Neeni Xoossawu dabbo gididabadan qoppay? Woy qassi Xoossawu mata dabbo gidanawu koyay? ‘Ubbaa Danddayiya Xoossaara asay mata dabbo gidana danddayii?’ gaada neeni qoppennan waaya aggana. Yaanikko, waani mata dabbo gidana danddayii?

XOOSSAA DABBO GIDIYOOGEE DANDDAYETTIYAABA

Geeshsha Maxaafay yootiyoogaadan, Xoossaa dabbo gidana danddayettees. Israaꞌeeletu mayzza aawaa Abrahaama, Xoossay “ta dabbuwaa” yaagidoogaa Geeshsha Maxaafay yootees. (Isiyaasa 41:8) “Xoossaakko shiiqite; ikka inttekko shiiqana” yaagiya, Yaaqooba 4:8n deꞌiya shoobiyaakka akeeka. Hegaa gishshawu, Xoossaayyo mata dabbo gidana danddayettiyoogee qoncce. SHin, Xoossay beettenna gishshawu, neeni waanada akko ‘shiiqananne’ ayyo mata dabbo gidana danddayay?

He oyshaa zaaranawu, asay issoy issuwaara waani dabbotiyaakko qoppa. Hegee darotoo naaꞌꞌu asi issoy issuwaa sunttaa eriyoogan doommees. Hegaappe simmidi, bantta qofaanne banttawu siyettiyaabaa issoy issuwawu yootiyo wode eta dabbotay minnees. Qassi issoy issuwawu maaddiyaabaa oottiyo wode, eta dabbotay kaseegaappe yaa minnees. Xoossawu mata dabbo gidiyoogaara gayttidaagankka hegaadan gaana danddayettees. Hegee waanidi asay dabbotiyoogaa malakko ane beꞌoos.

Neeni a sunttaa erenna mata dabboy neessi deꞌii? Baynnaagee qoncce. Bulggaariyaa biittaa maccaasiyaa Irina giidoogaadan, “Xoossaa sunttaa erana xayikko, ayyo dabbo gidana danddayokko.” Hagaappe kasetiya huuphe yohuwan beꞌidoogaadan, neeni akko shiiqanaadan Xoossay koyiyoogee ufayssiyaaba. Hegaa gishshawu i, “Taani GODAA [“Yihoowa,” NW]; hegee ta sunttaa” yaagiyoogan, Geeshsha Maxaafaa baggaara ba sunttaa neessi yootiis.—Isiyaasa 42:8.

Neeni Yihoowa sunttaa eriyoogee woy qassi a sunttaa goꞌettiyoogee a tumuppe qofissiyaabee? Ane hagaa qoppa: Tetragramaten geetettiya Ibraawetto oyddu guttuma pitaletun xaafettiya Xoossaa sunttay koyro xaafettida Ibraawetto Geeshsha Maxaafan 7,000 gidiya sohuwan deꞌees. Geeshsha Maxaafan deꞌiya hara ay sunttaagaappenne he qooday keehi daro. Yihooway nuuni a sunttaa eranaadaaninne goꞌettanaadan koyiyoogaa hegee bessiyoogee erettidaba.a

Gidoppe attin, Xoossay geeshshanne ubbaa danddayiyaagaa gidiyo gishshawu, a sunttaa goꞌettiyoogee a bonchennaagaa bessiyaaba giidi issoti issoti qoppana danddayoosona. Neeni ne mata laggiyaa sunttaa bessenna ogiyan xeesennaagaadan, Xoossaa sunttaa bessenna ogiyan xeesennaagee erettidaagaa. SHin, Yihooway bana siiqiyaageeti ba sunttaa bonchanaadaaninne erissanaadan koyees. (Mazamure 69:30, 31; 96:2, 8) Yesuusi bana kaalliyaageeti, “Saluwan de7iya nu Aawau, ne geeshsha sunttai anjjetto” yaagidi woossanaadan tamaarissidoogaa hassaya. Xoossaa sunttay erettanaadan oottiyoogan a sunttaa geeshshana danddayoos. Yaatiyoogee nuuni akko shiiqanaadan maaddees.—Maatiyoosa 6:9.

Xoossay ‘a sunttaa bonchiyaageeta’ keha ayfiyan xeelliyoogaa Geeshsha Maxaafay yootees. (Milkkiyaasa 3:16) Hagaa mala uraa xeelliyaagan Yihooway, “I ta sunttaa erido gishshau, taani a naagana. I tana xeegiyo wode, taani ayyo koyana. Metuwan taani aara issippe gidana” yaagees. (Mazamure 91:14, 15) Nuuni Yihoowawu mata dabbo gidanawu a sunttaa eriyoogeenne goꞌettiyoogee keehi koshshiyaaba.

Mata laggeti issippe gayttidi, silkkiyan, imeeliyan, biiduwan woy dabddaabbiyan darotoo issoy issuwaara haasayoosona. Yaatiyo gishshawu, nuuni Xoossaakko shiiqanawu, ubbatoo aara haasayana koshshees. SHin hegaadan waatidi haasayanee?

Nuuni woosan Yihoowaara haasayana danddayoos. Gidikkokka, Xoossaakko woossiyoogee nu laggiyaara coo haasayiyoogaa mala gidenna. Nuuni woossiyo wode, nuna Medhida Ubbaappe Xoqqiya Xoossaa haasayissiyoogaa akeekidi, a keehi bonchidi woossana koshshees. Nu woosaa Xoossay siyanaadan, nuuppe koyettiya issi issibaa polana koshshees. Hegeetuppe heezzati hagaappe kaallidi deꞌiyaageeta.

Koyruwan, nuuni Yesuusakko, “geeshshatukko” woy misiliyaakko gidennan, Xoossaa Yihoowa xallaakko woossana koshshees. (Kessaabaa 20:4, 5) Geeshsha Maxaafay, “Xoossaa intte woossiyo woosa ubban a keehi galatiiddi, inttena koshshiyaabaa ubbau [woossite]” yaagees. (Piliphphisiyuusa 4:6) Naaꞌꞌanttuwan, Xoossaa Naꞌaa Yesuus Kiristtoosa sunttan woossana bessees. Yesuusi, “Ta baggaarappe attin, ooninne ta Aawaakko baanau danddayenna” yaagiis. (Yohaannisa 14:6) Heezzanttuwan, nu woossay Xoossaa sheniyaara maayettana bessees. Geeshsha Maxaafay, “Xoossai koyiyoogaadan, ainne nuuni a woossikko, i [siyees]” yaagees.a—1 Yohaannisa 5:14.

Issi ura xallay haasayiyaaba gidikko, mata dabbotay minnennaagee qoncce. Laggeti issoy issuwaara haasayiyoogaadan, nuuni Xoossay nuussi yootanaadan eeno gaana koshshees; qassi i yootiyo wode nuuni siyana bessees. Xoossay nuuyyo waatidi yootiyaakko eray?

Ha wodiyan, Xoossaa Yihooway nuussi ba Qaalaa, Geeshsha Maxaafaa baggaara “haasayees.” (2 Ximootiyoosa 3:16, 17) Nuuni hegaadan giyoy aybissee? Leemisuwawu, ne mata laggee neessi dabddaabbiyaa kiittiis gaada qoppa. Neeni hegaa nabbabiyoogee ne laggee ne matan deꞌana xayikkonne aara haasayiyoogaa mala. Gidikkonne i neessi yootidoy doonaana gidennan, dabddaabbiyaana. Hegaadan, Geeshsha Maxaafaa nabbabiyoogan, Yihooway neessi haasayanaadan eeno gaasa. Ha maxeetiyaa doometta huuphe yohuwan ibay odettido Jina, “Xoossay tana ba dabbodan xeellana mala koyikko, taani i nuussi xaafido dabddaabbiyaa Geeshsha Maxaafaa xannaꞌana koshshees gaada qoppays” yaagaasu. A qassi gujjada, “Geeshsha Maxaafaa galla galla nabbabiyoogee taani Xoossaakko shiiqanaadan oottiis” yaagaasu. A Qaalaa, Geeshsha Maxaafaa galla galla nabbabiyoogan, Yihooway neessi ubba gallassi haasayanaadan eeno gay? Yaatiyoogee neeni Xoossaa dabbo gididabadan neessi siyettanaadan maaddees.

“Neeni dosiyoobay ayba gidikkonne, neeni yootikko taani hegaa ufayttada oottana.” Neeni mule erenna urawu woy coo erettiyo urawu hegaadan gaada yootanawu mammottennan waaya aggana. SHin, neeni siiqiyo laggiyawu hegaadan yootanawu waaya metootana. Mata laggee ba laggee oychidobaa polanawu koyiyoogee erettidaba.

Yihooway baassi goynniyaageeta ufayssiyaabaa ubbatoo oottiyoogaa Geeshsha Maxaafay yootees. Leemisuwawu, Xoossawu mata dabbo gidida Kawuwaa Daawiti, “Abeet GODAU, ta Xoossau, neeni daro maalaalissiyaabaa oottadasa; . . . Neeni nuuyyo qoppido lo77o qofaa ooninne qoodanau danddayenna” yaagiis. (Mazamure 40:5) Hegaappekka aaruwan, Yihooway bana erennaageetussikka ‘qumaa immidi, eta daro ufayssiyoogan’ etawu loꞌꞌobaa oottees.—Oosuwaa 14:17.

Yihooway harata ufayssiyaabaa oottiyoogan ufayttiyo gishshawu, Xoossaa dabbo gidanawu koyiyaageeti ‘a ufayssiyaabaa’ oottoosona giidi qoppiyoogee bessiyaaba. (Leemiso 27:11) SHin, neeni Xoossaa ufayssanawu ay oottana danddayay? Geeshsha Maxaafay, “Lo77obaa oottiyoogaanne issoi issuwaa maaddiyoogaa dogoppite. Aissi giikko, Xoossaa ufaissiyaagee hegaa mala yarshshuwaa” yaagees. (Ibraawe 13:16) Hegee loꞌꞌobaa oottiyoogaanne harata maaddiyoogaa xallay Yihoowa ufayssees giyoogee?

Geeshsha Maxaafay, “Ammanoi bainnan ooninne Xoossaa ufaissanau danddayenna” yaagees. (Ibraawe 11:6) ‘Abrahaami Xoossaa ammani’ simmidi, ‘a dabbo geetettidi xeesettiis.’ (Yaaqooba 2:23) Nuuni Xoossay ehaana anjjuwaa demmanawu ‘Xoossaa ammanana’ koshshiyoogaa Yesuus Kiristtoosikka yootiis. (Yohaannisa 14:1) Hegaa gishshawu, Xoossay baakko shiishshiyoogeetuppe koyettiya ammanoy deꞌiyo asa waana gidana danddayay? Xoossaa Qaalaa, Geeshsha Maxaafaa ubbatoo xannaꞌiyoogan hegaa mala asa gidana danddayaasa. Yaatiyoogan, ‘Xoossaa sheniyaa eraasa’; hegaadan oottiyoogan, “a ufaissiyaabaa” waatada oottanaakko tamaaraasa. Neeni Yihoowabaa likke gididabaa gujja gujjada tamaariyo wode, qassi a xillotettaa maaraa kaallada i nena oychiyoobaa oottiyo wode, ne ammanoy minnees; qassi i neekko kaseegaappe aaruwan shiiqees.—Qolasiyaasa 1:9, 10.

Xoossaa dabbo gidanawu ay oottana danddayay? Xoossawu mata dabbo gidanawu neeni oottana danddayiyo amaridabaa beꞌida.

1. Yihoowa giyo Xoossaa sunttaa era, qassi a sunttaa goꞌetta.

2. Woossiyoogaaninne a Qaalaa Geeshsha Maxaafaa xannaꞌiyoogan ubba gallassi aara haasaya.

3. Muletoo Yihoowa ufayssiyaabaa ootta.

Hagaa maaran, neeni Xoossaa dabbo gidanaadan koshshiyaabaa oottaydda deꞌays gaana danddayay? Neeni giigissana koshshees giyoobi deꞌii? Hegawu baaxetana koshshiyoogee erettidaba gidikkonne, demmiyo anjjuwaa qoppa.

Amarkkan deꞌiya Jenifera hagaadan gaasu: “Xoossawu mata dabbo gidanawu, baaxetiyo ubbabay keehi maaddiyaaba. He dabbotay kaseegaappe aaruwan Xoossan ammanettiyoogaa, kaseegaappe aaruwan a eeshshaa akeekiyoogaa, ubbaappekka aaruwan, kaseegaappe loyttidi a siiqiyoogaa mala daro anjjuwaa demissees. Hegaappe kehiya deꞌoy baawa!”

Neeni Xoossawu mata dabbo gidanawu koyikko, Yihoowa Markkati nena maaddiyoogan ufayttoosona. Eti miishshaa qanxxissennan nena Geeshsha Maxaafaa tamaarissoosona. Eti Kawotettaa Addaraashan Geeshsha Maxaafaa tamaariyo shiiquwaa neenikka shiiqiyaakko ufayttoosona; yaatikko, banttawu Xoossaara deꞌiya dabbotaa xoqqu oottidi xeelliya asaara neeni dabbotana.a Neeni yaatiyo wode, “Taassa gidikko, taani Xoossaa matan de7iyoogee taayyo lo77o” yaagida mazamuraawiyaagaadan neessi siyettana.—Mazamure 73:28.