Naaꞌꞌantto Yelettiyoogaa—Atotetta Ogee?

“NAAꞌꞌANTTO yelettadii?” yaagiya oyshaa woygada zaaruutee? Ammanays giya, alame yuushuwan deꞌiya miilooniyan qoodettiya asay he oyshaa “Ee!” giidi sirennan zaarees. Naaꞌꞌantto yelettiyoogee tumu Kiristtaanetussi malaata; qassi atotettaa demmiyo ogee hegaa xalla giidi ammanoosona. Eti “issi asi naaꞌꞌantto yelettana xayikko, . . . he uri Kiristtaane gidenna” yaagidi xaafida, haymaanootiyaa erancha gidida Robert C. Ispprola mala haymaanootiyaa kaalettiyaageetu qofaara maayettoosona.

Naaꞌꞌantto yelettiyoogee atotettaa demmanaadan oottees gaada ammanay? Hegaadaana gidikko, ne dabbotinne ne laggeti he ogiyaa demmidi an hemettanaadan neeni eta maaddanau koyanaagee qoncce. Gidikkokka, eti hegaadan oottanaadan, naaꞌꞌantto yelettida uraanne naaꞌꞌantto yelettibeenna uraa giddon deꞌiya dummatettaa shaakkidi erana koshshees. Naaꞌꞌantto yelettiyoogaa giyoogee woygiyoogaakko etau waata qonccissuutee?

Daroti “naaꞌꞌantto yelettiyoogee” Xoossaunne Kiristtoosau oottanau issi uri wozanappe geppiyoogaa malaatees; qassi hegaappe denddidaagan, he uri ayyaana hanotan hayqqidoogaappe deꞌuwau laamettees giidi ammanoosona.

Geeshsha Maxaafay hegaa mala ammanuwaa kaafennaagaa neeni eriyo wode garamettaneeshsha? Naaꞌꞌantto yelettiyoogaa xeelliyaagan Xoossaa Qaalay tumuppe woygiyaakko eranau koyay? Ha allaalliyaa loyttada akeekiyoogan neeni goꞌettanaagee erettidaagaa. Aybissi? Naaꞌꞌantto yelettiyoogaa giyoogee woygiyoogaakko loyttidi eriyoogee, ne deꞌuwaaranne neeni sinttappe naagiyoobaara gayttidaba gidiyo gishshataassa.

Geeshsha Maxaafay Ay Tamaarissii?

Geeshsha Maxaafan “naa77antto yelettiyoogaa” giya qaalay deꞌiyoy Yohaannisa 3:1-12na. Ha sohuwan Yesuusi Yerusalaamen haymaanootiyaa kaalettiya issi bitaniyaara haasayido garamissiya haasayay qoncciis. Geeshsha Maxaafan deꞌiya ha kumetta xiqisiyaa kaallidi deꞌiya saaxiniyan beꞌana danddayaasa. Neeni hegaa akeekan nabbabanaadan minttettoos.

He taarikiyan, Yesuusi naaꞌꞌantto yelettiyoogaa giya qaalaa dumma dumma geluwaa qonccissiis. Yesuusi haasayidobay kaallidi deꞌiya keehippe goꞌꞌiya oyshata zaaranaadan maaddees:

◼ Naaꞌꞌantto yelettiyoogee ay keena koshshiyaabee?

◼ Naaꞌꞌantto yelettiyoogee nu dooruwan baasettidabee?

◼ Hegaa halchoy aybee?

◼ Issi asi waanidi naaꞌꞌantto yelettana danddayii?

Ha oyshata huuphiyan huuphiyan beꞌoos.

[Sinttaa 4n diya misiliyaa]

“Intte Naa77antto Yelettanau Bessees”

“Parisaawetu baggan Aihudatuyyo halaqa gidiya Niqoodimoosa giyo issi bitanee de7ees. Niqoodimoosi qammi Yesuusakko yiidi, ‘Tamaarissiyaagoo, neeni Xoossai kiittido tamaarissiyaagaa gidiyoogaa nuuni eroos; aissi giikko, Xoossai aara de7iyo asappe attin, ha neeni oottiyo wolqqaama malaatata oottanau danddayiya asi baawa’ yaagiis. Yaagin Yesuusi zaaridi, ‘Taani neeyyo tumaa odais; ooninne naa77antto yelettana xayikko, Xoossaa kawotettaa be7anau danddayenna’ yaagiis. Niqoodimoosi, ‘Cima asi waanidi naa77antto yelettanau danddayii? Ba aayee uluwaa simmi gelidi, naa77anttuwaa yelettanau asi danddayii?’ yaagiis. Yesuusi zaaridi, ‘Taani neeyyo tumaa odais; ooninne haattaappenne Geeshsha Ayyaanaappe yelettana xayikko, Xoossaa kawotettaa gelanau danddayenna. Asappe yelettidaagee asa; Ayyaanaappe yelettidaagee ayyaana; “Intte naa77antto yelettanau bessees” gaada taani intteyyo odido gishshau, neeni garamettoppa. Carkkoi ba koyidosaa carkkees. Neeni a kooshinchchaa siyaasa; shin i auppe yiyaakko woi au biyaakko, neeni erakka. Ayyaanaappe yelettida ubbai hegaa mala’ yaagiis. Yaagin Niqoodimoosi, ‘Hagee waanidi hananau danddayii?’ yaagidi oichchiis. Yesuusi zaaridi [hagaadan giis:] ‘Neeni Israa7eelata tamaarissiyaagaa gidaidda hagaa erikkii? Taani neeyyo tumaa odais; nuuni eriyoogaa haasayoosinne be7idoogaa markkattoos; shin nuuni markkattiyoogaa intte ekkekketa. Taani intteyyo sa7aabaa yootin, intte ammanennaageeta gidikko, saluwaabaa yootin waani ammanuuteetii?’”—Yohaannisa 3:1-12.

Naaꞌꞌantto Yelettiyoogaa—Ay Keenaa Koshshiyaabee?

YESUUSI Niqoodimoosaara haasayido haasayaa wurssana gakkanaashin, naaꞌꞌntto yelettiyoogee keehippe koshshiyoogaa qonccissiis. Hegaa waatidi qonccissidee?

Yesuusi Niqoodimoosaara haasayido haasayan naaꞌꞌantto yelettiyoogee keehippe koshshiyoogaa qonccissidoogaa hassaya. I: “Ooninne naa77antto yelettana xayikko, Xoossaa kawotettaa be7anau danddayenna” yaagiis. (Yohaannisa 3:3) “Xayikko” giyaanne “danddayenna” giya qaalati naaꞌꞌantto yelettiyoogee koshshiyaaba gidiyoogaa akeekissoosona. Hegaa leemisuwan yootanau: Issi uri, “Away kiyana xayikko, gallassa pooꞌoy deꞌana danddayenna” yaagiyo wode, away kiyiyoogee gallassa pooꞌuwau keehippe koshshiyaaba gidiyoogaa yootana koyiis. Hegaara issi mala hanotan, naaꞌꞌantto yelettiyoogee Xoossaa Kawotettaa beꞌanau keehippe koshshiyaaba gidiyoogaa Yesuusi yootiis.

Wurssettan, he allaalliyaa xeelliyaagan denddiya ayba sireenne deꞌennaadan koyidaba milatiya ogiyan, Yesuusi: “Intte naa77antto yelettanau bessees” yaagiis. (Yohaannisa 3:7) Yesuusi yootidobaappe akeekiyoogaadan, issi uri “Xoossaa kawotettaa gelanau” naaꞌꞌantto yelettiyoogee koyettiyaabanne bessiyaaba.—Yohaannisa 3:5.

Naaꞌꞌantto yelettiyoogaa Yesuusi keehippe koshshiyaaba oottidi xeellido gishshau, Kiristtaaneti ha allaalliyaa loyttidi eriyaakkonne akeekana koshshees. Leemisuwau, issi Kiristtaanee naaꞌꞌantto yelettanau doorana danddayees gaada qoppay?

[Sinttaa 5n deꞌiya misiliyaa qonccissuwaa]

“Away kiyana xayikko, gallassa pooꞌoy deꞌana danddayenna”

Naaꞌꞌantto Yelettiyoogaa—Issi Aawu Bau Kuuyiyoobee?

NAAꞌꞌANTTO yelettanaadan oottiyay oonee? Issi issi sabaaketi eti yootiyoobaa ezggiya asay naaꞌꞌantto yelettida Kiristtaane gidanaadan minttettiiddi, Yesuusi: “Intte naa77antto yelettanau bessees” giido qaalaa goꞌettoosona. (Yohaannisa 3:7) He sabaaketi he qaalaa azazodan goꞌettidi, “Naaꞌꞌntto yelettite!” yaagoosona. Hegaa gishshau, eti ammaniya asa ubbay Yesuusau azazettanaunne naaꞌꞌantto yelettanau koshshiya tangguwaa ekkana bessees giidi sabbakoosona. Asay naaꞌꞌantto yelettanau bari huuphe doorana danddayees giidi tamaarissoosona. SHin he qofay Yesuusi Niqoodimoosau yootidobaara moggiyaabee?

Yesuusa qaalata akeekan nabbabiyoogee issi asi naaꞌꞌantto yelettanau bari huuphe kuuyana danddayees giidi i tamaarissibeennaagaa bessees. Nuuni hegaadan giyoy aybissee? “Naaꞌꞌantto yelettiyoogaa” geetettidi birshshettida Giriiketto qaalay “bollappe yelettana koshshees” geetettidikka birshshettana danddayees.a Yaatiyo gishshau, he qaalaa maaraadan, naaꞌꞌantto yelettiyoogee “bollappe” yees; hegaa giyoogee “saluwaappe” woykko “Xoossaappe” yees giyoogaa. (Yohaannisa 19:11; Yaaqooba 1:17) Ee, naaꞌꞌantto yelettanaadan oottiyay Xoossaa.—1 Yohaannisa 3:9.

Nuuni “bollappe” giya qonccissuwaa hassayiyaaba gidikko, issi uri bari huuphe naaꞌꞌantto yelettana danddayennaagaa akeekanau metootokko. Asa gidada yelettido hanotaa ane qoppa. Neeni ne huuphe koyada yelettadii? Akkay! Neeni yelettidoy ne aaway nena yelido gishshataassa. Hegaadankka, nuuni naaꞌꞌantto yelettana danddayiyoy Xoossay, saluwan deꞌiya nu Aaway nuuni yelettanaadan oottiyaaba gidikko xallaana. (Yohaannisa 1:13) Kiitettida PHeexiroosi: “Kiristtoosa Aawaa, ba maarotettaa daruwaadankka nuna naa77anttuwaa yelidaagaa . . . galatoos” yaagidi qoncciyan yootidoy hegaassa.—1 PHeexiroosa 1:3.

Hegee Azazoo?

Gidikkokka, issoti issoti ‘Ooninne naaꞌꞌantto yelettanau bari huuphe kuuyennaba gidikko, Yesuusi: “Intte naa77antto yelettanau bessees” giidi azazidoy aybissee?’ yaagidi oychana danddayoosona. Hegee keehippe bessiya oysha. Yesuusa qaalay tumuppe azazo gidikko, nuuni oottana danddayennabaa azaziis giyoogaa. Hegee bessiyaaba milatenna. Yaatikko, intte “naaꞌꞌantto yelettanau” bessees giya qaalaa nuuni ayba ogiyan akeekana koshshii?

He qofay koyro xaafettido doonan azazodan gidennan azazoppe dumma gidida ogiyan qoncciis. Hara guussan, Yesuusi intte “naaꞌꞌantto yelettanau” bessees giido wode, azaziiddi gidennan issi tuma gidida yohuwaa yootiiddi deꞌees. I: “Intte bollappe yelettiyoogee bessiyaaba” yaagiis.—Yohaannisa 3:7, Modern Yang’s Literal Transileeshin.

Qommoora deꞌiya qofaa leemisuwan qonccissanau, kaallidi deꞌiya qofaa beꞌa. Amarida timirtte keettati deꞌiyo issi katamaa qoppa. He timirtte keettatuppe issoy he katamaappe haakkidi deꞌiya sohuwaappe yiya, he biittaa naati tamaariyoogaa. Issi gallassi he biittaa asa gidenna issi yelagay he timirtte keettaa dilekteriyau, “Taani intte timirtte keettan mazggabettanau koyays” yaagiis. Yaatin, dilekteree, “Mazggabettanau, neeni ha biittaa asa gidanau bessees” yaagiis. Dilekteree haasayidobay azazo gidennaagee qoncce. I he tamaariyaa, “Ha biittaa asa gida!” giidi azaziiddi deꞌenna. Dilekteree issi tuma gididabaa, he timirtte keettan tamaaranau koyettiyaabaa yootiiddi deꞌees. Hegaara issi mala ogiyan, Yesuusi “Intte naa77antto yelettanau bessees” yaagido wode, tuma gidida issibaa, “Xoossaa kawotettaa gelanau” issi urappe koyettiyaabaa yootiiddi deꞌees.

Ha wurssetta qofay, giishin Xoossaa Kawotettay naaꞌꞌantto yelettiyoogaara gayttida hara allaalle. Hegee naaꞌꞌantto yelettiyoogaa halchoy aybee? yaagiya oyshaa zaarees. He oyshaa zaaruwaa eriyoogee naaꞌꞌantto yelettiyoogee woygiyoogaakko loytti akeekanau keehippe koshshiyaaba.

[Tohossa qofata]

[Sinttaa 6n deꞌiya misiliyaa]

Naaꞌꞌantto yelettiyoogaanne asa gididi yelettiyoogaa issi mala oottiyay aybee?

Naaꞌꞌantto Yelettiyoogaa—Hegaa Halchoy Aybee?

DAROTI issi uri merinaa atotettaa demmanau naaꞌꞌantto yelettanau bessees giidi ammanoosona. SHin Yesuusi naaꞌꞌantto yelettiyoogaa halchuwaa xeelliyaagan woygidaakko akeeka. I: “Ooninne naa77antto yelettana xayikko, Xoossaa kawotettaa be7anau danddayenna” yaagiis. (Yohaannisa 3:3) Yaatiyo gishshau, issi uri naaꞌꞌantto yelettana koshshiyoy atotettaa demmanaassa gidennan, Xoossaa Kawotettaa gelanaassa. Issoti issoti, ‘shin ha naaꞌꞌu qofati, giishin Xoossaa Kawotettaa geliyoogeenne atotettaa demmiyoogee issi mala woyto gidennee?’ giidi oychana danddayoosona. Issi mala woyto gidenna. Eta giddon deꞌiya dummatettaa akeekanau, ane kasetidi “Xoossaa Kawotettaa” giyoogee aybakko beꞌoos.

Kawotettay ayso. Yaatiyo gishshau, “Xoossaa Kawotettaa” giyoogee “Xoossaa ayso” giyoogaa. Geeshsha Maxaafay Yesuus Kiristtoosi, ‘asa naꞌay,’ Xoossaa Kawotettaa Kawo gidiyoogaanne Kiristtoosaara issippe haariyaageeti deꞌiyoogaa yootees. (Daaneela 7:1, 13, 14; Maatiyoosa 26:63, 64) Hegaa bollankka, kiitettida Yohaannisi beꞌido ajjuutan Kiristtoosaara issippe haariyaageeti “qommo ubbaappe, dumma dumma biitta qaala ubbaappe, yara ubbaappenne zare ubbaappe” doorettidaageeta gidiyoogaanne eti ‘saꞌaa haaranaagaa’ qonccissiis. (Ajjuutaa 5:9, 10; 20:6) Geeshsha Maxaafay gujjidikka, kawo gididi haariyaageeti “sa7aappe wozettida” 144,000 asati deꞌiyo ‘amarida dorssa wude’ gididodoogaa qonccissees.—Luqaasa 12:32; Ajjuutaa 14:1, 3.

Xoossaa Kawotettay deꞌiyoy awaanee? ‘Xoossaa Kawotettay’ “saluwaa kawotettaa” geetettidikka xeegettiis; hegee Yesuusinne aara issippe haariyaageeti saluwan uttidi haariyoogaa bessees. (Luqaasa 8:10; Maatiyoosa 13:11) Yaatiyo gishshau, Xoossaa Kawotettay Yesuusinne asaa naatuppe doorettidaageeti issippe haariyo saluwaa ayso.

Yaatin, Yesuusi issi uri “Xoossaa Kawotettaa gelanau” naaꞌꞌantto yelettanau bessees giido wode, woyganau koyidee? Issi uri Kiristtoosaara saluwan haaranau naaꞌꞌantto yelettanau bessees gaanau koyiis. Qanttan qonccissanau, naaꞌꞌantto yelettiyoogaa halchoy asaa naatuppe amaridaageeta saluwaa haaruwau giigissanaassa.

Hanno gakkanau, naaꞌꞌantto yelettiyoogee keehippe koshshiyaaba, Xoossaappe imettiyaabanne asaa naatuppe amaridaageeta saluwaa haaruwau giigissanaassa gidiyoogaa beꞌida. SHin issi uri waanidi naaꞌꞌantto yelettanau danddayii?

[Sinttaa 7n deꞌiya misiliyaa qonccissuwaa]

Naaꞌꞌantto yelettiyoogaa halchoy asaa naatuppe amaridaageeta saluwaa haaruwau giigissanaassa

[Sinttaa 7n deꞌiya misiliyaa qonccissuwaa]

Yesuus Kiristtoosinne asaa naatuppe doorettidaageeti Xoossaa Kawotettan issippe haaroosona

Naaꞌꞌantto Yelettiyoogaa—Hegee Waanidi Polettii?

YESUUSI naaꞌꞌantto yelettiyoogee keehippe koshshiyoogaa, hegaa oottiyay oonakkonne hegaa halchoy aybakko xalla gidennan, issi uri waanidi naaꞌꞌantto yelettanau danddayiyaakkokka Niqoodimoosayyo yootiis. Yesuusi: “Ooninne haattaappenne Geeshsha Ayyaanaappe yelettana xayikko, Xoossaa kawotettaa gelanau danddayenna” yaagiis. (Yohaannisa 3:5) Yaatiyo gishshau, issi uri naaꞌꞌantto yelettiyoy haattaappenne geeshsha ayyaanaappe. SHin ‘haattaanne geeshsha ayyaanaa’ giya qofay ay malaatii?

‘Haattaanne Geeshsha Ayyaanaa’ —Eti Aybee?

Niqoodimoosi Ayhuda haymaanootiyaa erancha gidiyoogaadan, asay issi gitabaa polanaadan oottiya ‘Xoossaa ayyaanaa’—Xoossaa wolqqaa, Ibraysxxe Geeshsha Maxaafaa xuufeti ayba ogiyan goꞌettiyaakko i eriyoogee sirissenna. (Doomettaabaa 41:38; Kessaabaa 31:3; 1 Sameela 10:6) Yaatiyo gishshau, Yesuusi ‘geeshsha ayyaanaa’ yaagiya qaalaa goꞌettido wode, Niqoodimoosi hegee Xoossaa ayyaanaa, Xoossaa wolqqaa gidiyoogaa akeekana danddayees.

Yesuusi yootido haattay shin? Yesuusi Niqoodimoosaara haasayido haasayaappe kasenne hegaappe simmin xaafettidabaa qoppa. Hegee Xammaqiya Yohaannisinne Yesuusi erissiyo ashkkarati asaa haattan xammaqiyoogaa bessees. (Yohaannisa 1:19, 31; 3:22; 4:1-3) Ha hanotay Yerusalaamen keehippe erettiyaaba. Hegaa gishshau, Yesuusi haattaabaa yootido wode, Yesuusi coo haattaabaa gidennan, xammaqiyo haattaabaa yootiiddi deꞌiyoogaa Niqoodimoosi akeekana danddayees.a

“Geeshsha Ayyaanan” Xammaqettiyoogaa

‘Haattaappe yelettiyoogee’ haattan xammaqettiyoogaa malaatikko, ‘geeshsha ayyaanaappe yelettiyoogee’ woygiyoogee? Niqoodimoosi Yesuusaara haasayanaappe kase, Xammaqiya Yohaannisi haattaa xalla gidennan, ayyaanaykka xammaqanau goꞌꞌiyaaba gidiyoogaa yootiis. I: “Taani inttena haattan xammaqais; shin i [Yesuusi] inttena Geeshsha Ayyaanan xammaqana” yaagiis. (Marqqoosa 1:7, 8) Wonggeliyaa xaafida Marqqoosi hegaa mala xinqqatee polettido koyro wodiyaa yootiis. I kaallidi deꞌiyaagaadan xaafiis: “Yesuusi he wode Galiila biittan de7iya Naazireete katamaappe yin, Yohaannisi Yorddaanoosa SHaafan a xammaqiis. Yesuusi haattaappe kiyosaara saloi dooyettishiininne Geeshsha Ayyaanai ba bolli haraphphedan wodhdhishin be7iis.” (Marqqoosa 1:9, 10) Yesuusi Yorddaanoosa SHaafan xammaqettido wode, i haattan xammaqettiis. Saluwaappe ayyaanay a bolli wodhido wode, i geeshsha ayyaanan xammaqettiis.

Yesuusi xammaqettoosappe heezzu laytta gidiyaagee aadhi simmin: “Guutta wodiyaappe guyyiyan, Geeshsha Ayyaanan intte xammaqettana” yaagidi ba erissiyo ashkkarata minttettiis. (Oosuwaa 1:5) Hegee awude polettidee?

PHenxxaqosxxe gallassi 33 K.S., Yerusalaamen issi keettan 120 gidiya, Yesuusi erissiyo ashkkarati issippe shiiqi uttidosona. “Gagantti yeggiya gotiyaadan guummiya gunttai akeekennan saluwaappe yiidi, eti uttido keettaa ubbaa kumiis. Qassi tama laco milatiya inxxarssati etassi beettidi, . . . , eta ubbaa bolli wodhdhidosona. Eta ubban Geeshsha Ayyaanai” kumiis. (Oosuwaa 2:1-4) He gallassi, Yerusalaamen deꞌiya hara asay haattan xammaqettanaadan minttettoy imettiis. Kiitettida PHeexiroosi asau: “Intte nagarai atto geetettana mala, nagaraappe simmidi, intte huuphiyan huuphiyan Yesuus Kiristtoosa sunttan xammaqettite. Xoossai immiyo Geeshsha Ayyaanaa intte ekkana” yaagiis. Asay hegau ayba zaaro immidee? “PHeexiroosi yootidoogaa ekkidaageeti xammaqettidosona; he gallassi heezzu sha7u gidiya asai ammaniis.”—Oosuwaa 2:38, 41.

Naaꞌꞌu Qommo Xinqqatiyaa

Ha xinqqateti naaꞌꞌantto yelettiyoogaa xeelliyaagan ay qonccissiyoonaa? Eti issi uri naaꞌꞌantto yelettanau naaꞌꞌu qommo xinqqatee koshshiyoogaa bessoosona. Yesuusi koyro haattan xammaqettidoogaa akeeka. Hegaappe simmidi, geeshsha ayyaanay a bolli wodhiis. Hegaara issi mala ogiyan, beni wode erissiyo ashkkarati koyro (issoti issoti Xammaqiya Yohaannisan) haattan xammaqettidosona; hegaappe simmin, geeshsha ayyaanay eta bolli wodhiis. (Yohaannisa 1:26-36) Hegaadankka, 3,000 ooratta erissiyo ashkkarati koyro haattan xammaqettidosona; hegaappe simmidi, geeshsha ayyaanaa ekkidosona.

PHenxxaqosxxe gallassi 33 K.S. polettida xinqqatiyaa hassayiyoogan, naaꞌꞌantto yelettiyoogee ha wodiyan waanidi polettees giidi naagana koshshii? Kiristtoosi kiittidoogeetinne beni wode erissiyo ashkkarati naaꞌꞌantto yelettidoogaadan polettees giidi naagana koshshees. Koyro, issi asi ba nagaraappe simmees, iitabaa oottiyoogaa aggees, Yihoowayyo goynnanaunne ayyo oottanau ba huuphiyaa geppeesinne hegaa asaa sinttan haattan xammaqettiyoogan bessees. Hegaappe simmin, Xoossay Ba Kawotettan haaranaadan a dooridaba gidikko, i geeshsha ayyaanan tiyettees. Ha naaꞌꞌu xinqqatetuppe koyroy (haattan xammaqettiyoogee) issi aawu koyin oosettiyaaba; naaꞌꞌanttoy (ayyaanan xammaqettiyoogee) Xoossay oottiyooba. Issi asi ha naaꞌꞌu xinqqateta xammaqettiyo wode, i naaꞌꞌantto yelettees.

Ha naaꞌꞌu qommo xinqqatiyaa xammaqettiyaageeti woykko naaꞌꞌantto yelettidaageeti Kiristtoosaara saluwan haarana deꞌoosona. Hegaadaana gidikko, o bolli haaranau deꞌiyoonaa? Kaalliya huuphe yohoy ha oyshaa zaarees.

[Tohossa qofata]

[Sinttaa 9n deꞌiya misiliyaa]

Yohaannisi bantta nagaraappe simmida Israaꞌeeleta haattan xammaqiis

Amaridaageeti Haaroosona; Daroti Goꞌettoosona

KIITETTIDAAGEETU wodiyaappe doommidi, Xoossay asaa naatuppe ammanettida amarida Kiristtaaneta, ba naata oottidi dooriiddi takkiis. Xoossaa naata gididaageetu deꞌuwan gita laamee merettido gishshau, Xoossaa Qaalay hegaa naaꞌꞌantto yelettiyoogaa yaagees. Naaꞌꞌantto yelettiyoogaa halchoy Xoossau oottiya hegeeta saluwan haaranaadan giigissanaassa. (2 Ximootiyoosa 2:12) Haariyaageeta gidanau, saluwan deꞌanau eti hayquwaappe denddoosona. (Roome 6:3-5) Eti Kiristtoosaara saluwan uttidi, “sa7an haarana.”—Ajjuutaa 5:10; 11:15.

Gidikkokka, naaꞌꞌantto yelettidaageetuppe haratikka merinaa atotettaa demmanaagaa Xoossaa Qaalay yootees. Geeshsha Maxaafay (Ibraysxxenne Giriike Geeshsha Maxaafaa xuufeti) Xoossay naaꞌꞌu cita asaa ashshanau halchidoogaa yootees; keehi guutta qooday deꞌiyo haariyaageetu citay, saluwan deꞌanaagaanne daro qooday deꞌiyo haarettiyaageetu citay, saꞌan deꞌanaagaa yootees. Leemisuwau, kiitettida Yohaannisi naaꞌꞌantto yelettida ba mala Kiristtaanetuyyo ay xaafidaakko akeeka. Yesuusa xeelliyaagan i: “nuuni nu nagaraa atto geetettaa Kiristtoosa baggaara demmeettees; Kiristtoosi yarshshettidoogee asa ubbaa [daro qooday deꞌiyo citaa] nagaraassappe attin, nu [guutta qooday deꞌiyo citaa] nagaraa xalaalaassa gidenna” yaagiis.—1 Yohaannisa 2:2.

Hegaadankka, kiitettida PHauloosi: “Xoossai medhdhido mereta ubbai [daro qooday deꞌiyo citay] Xoossaa naati [guutta qooday deꞌiyo citay] qonccanaagaa daro laamoti uttiis” giidi xaafiis. (Roome 8:19-21) Kiitettida Yohaannisanne PHauloosa qaalata waati akeekana koshshii? Hagaadaana: Naaꞌꞌantto yelettidaageeti saluwan haariyaageetu yame gidoosona. Ayba halchuwaassi? Xoossaa aysuwau haarettiya, saꞌan deꞌana miilooniyan qoodettiya asau merinaa goꞌꞌaa demissanaassa. Hegaa gishshau, Yesuusi ba erissiyo ashkkarata: “Ne kawotettai yo; ne shenee saluwan hanidoogaadan, sa7ankka hano” yaagidi woossanaadan tamaarissiis.—Maatiyoosa 6:10.

Atotettay naꞌꞌu citau imettaanaagaa xeelliya ha qofay Ibraysxxe Geeshsha Maxaafaanikka deꞌees. Leemisuwau, Yihooway Yesuusayyo mayzza aawa gidida Abrahaamassi yootidobaa akeeka: “Ha sa7aa kawotettati ubbai [daro qooday deꞌiyo citay] ne zerettaa [guutta qooday deꞌiyo citaa] baggaara anjjettana.” (Doomettaabaa 22:18) Ee, kawotettati ubbay Abrahaama “zerettaa” baggaara anjjuwaa demmana.

He ‘zerettay’ oonee? Yesuus Kiristtoosanne Xoossaa naata gididi naaꞌꞌantto yelettidaageeta. Kiitettida PHauloosi: “Intte Kiristtoosabaa gidikko, simmi intte Abrahaama zare” yaagidi qonccissiis. (Galaatiyaa 3:16, 29) Yaatin, kawotetta ubbau he “zerettaa” baggaara yaana anjjoy aybee? Xoossaa ufayssiyaageeta gididi an bonchettiyoogaanne gannate gidiya saꞌan merinaa deꞌuwaa demmiyoogaa. Mazamuraawee Daawiti: “Xilloti biittaa laattananne yan merinau de7ana” yaagidi hananabaa yootiis.—Mazamure 37:29; Isiyaasa 45:18; Ajjuutaa 21:1-5.

Saluwan haariyo maatay amaridaageetussi giigiis; shin saluwaa haaruwaa goꞌꞌay, giishin saꞌan demmana merinaa deꞌoynne hegaara gayttida hara anjjo ubbay darotussi giigiis. Neeninne ne soo asay Xoossaa Kawotettay ehiyo merinaa anjjuwaa demmiyaageeta gidanaadan amottoos.

[Sinttaa 10n deꞌiya misiliyaa]

Miilooniyan qoodettiya asay saꞌan merinaa deꞌuwaa demmiyoogan anjjettana. Neeni hegeetu giddon deꞌanee?

Iyyoobi Yihoowa Sunttaa Bonchiis

“GODAA [“Yihoowa,” NW] sunttai galatetto.”—IYYOOBA 1:21.

1. Iyyooba maxaafaa xaafidabadan qofettiyay oonee? Awude xaafettidabadan qofettii?

MUUSEE Paarooni worennaadan baqatidi Midiyaama biittan deꞌanau biido wode ayyo layttay 40 heera. (Oosuwaa 7:23) Yan deꞌiiddi, matan deꞌiya Uuxa giyo biittan deꞌida Iyyooba gakkida waayiya a siyennan aggenna. Daro layttay aadhi simmin, Muuseenne Israaꞌeela asay bazzuwaa hemetaa wurssettaa heeran Uuxa mata gakkiyo wode, Iyyooba deꞌuwan wurssettan hanidabaa Muusee siyennan aggenna. Ayhudatu wogan odettiyaagaadan, Muusee Iyyooba maxaafaa xaafidoy Iyyoobi hayqqi simmiina.

2. Iyyooba maxaafay ha wodiyan deꞌiya Yihoowa ashkkaratu ammanuwaa minttiyoy ayba ogetuunee?

² Iyyooba maxaafay ha wodiyan deꞌiya Xoossaa ashkkaratu ammanuwaa minttees. Ayba ogiyan? He taarikee nuuni saluwan hanettida issi gita allaalliyaa akeekanaadan maaddees; hegee Xoossay ubbabaa haariyo maataa bolli denddida gita oyshaa qonccissees. Qassi Iyyooba taarikee nuuni suuretetta equwaa naagiyoogee ay gujjiyaakko loyttidi akeekanaadaaninne Yihooway ba ashkkarati waayettanaadan issi issitoo ayssi paqqadiyaakko akeekanaadan maaddees. Hegaa bollikka, Iyyooba maxaafay Seexaanaa Dabloosi Yihoowaara eqettiya waannaa gidiyoogaanne asaa naatu morkke gidiyoogaa yootees. Qassi he maxaafay Iyyooba mala polo gidenna asaa naati wolqqaama paacee gakkishinkka Yihoowayyo ammanettidi deꞌana danddayiyoogaa qonccissees. Iyyooba maxaafan qonccida issi issi hanotata ane pilggoos.

Iyyooba Seexaanay Paacciis

3. Iyyoobi ay mala asee? Seexaanay a bolli zambbidoy aybissee?

³ Iyyoobi ba soo asaa loꞌꞌo ogiyan ayssiya, durenne erettida asa. I metootidaageeta maaddiya, asaa zoriya bonchettida asa gidiyoogee qoncce. Ubbabaappekka aaruwan, Iyyoobi Xoossau yayyiya asa. Iyyoobi “boree bainnanne suure asa; Xoossaassi yayyidi, iitabaappekka haakkida asa” geetettiis. Seexaanay Iyyooba qohanau zambbidoy, a duretettaanne i erettida asa gidiyoogaa gishshataassa gidennan, Xoossau aqidaagaa gidiyo gishshataassa.—Iyyooba 1:1; 29:7-16; 31:1.

4. Suuretetta eqoy aybee?

⁴ Iyyooba maxaafaa doomettan deꞌiya taarikee, kiitanchati saluwan Yihoowa sinttan shiiqido shiiquwaabaa yootees. Seexaanaykka he sohuwan beettidi Iyyooba mootiis. (Iyyooba 1:6-11 nabbaba.) Seexaanay Iyyooba aquwaabaa denttidaba gidikkonne, i xeelaa wottidoy Iyyooba suuretetta