Neeni naatettan kunddido wodiyaa hassayay? Ne kushee deshettana woy ne gulbbatay gaarettana danddayees. Ne aayyiyaa nena waata minttettidaakko hassayay? A masunxxidasan deꞌiya suuttaa quccada melissana danddayawusu. Neeni yeekkaasa; shin aayyiyaa nena qoommada minttettiyo wode, woppu gaasa. Naatettan hegaa malabay gakkiyo wode, issi uri sohuwaara nena minttettees.

SHin nuuni gitatiyo wode hanotay naatettaagaa mala gidenna. Nuna gakkiya metoy wolqqaama; qassi minttettuwaa demmanaageekka meto. Darotoo, gasttatu metoy aayyiyaa qoommada gorppin aggiyaaba gidenna. Amarida leemisota beꞌa.

• Oosuwaa xayiyoogee keehi qohiyaabaa. Hegaa malabi nena gakki erii? Huliyani oosuwaappe goodettido wode, keehi unꞌꞌettiis. I, ‘Ta soo asawu koshshiyaabaa waata kunttanee?’ giidi hirggiis; qassi, ‘Taani daro layttawu minna oottikkokka, aynne maaddennabadan ayssi qoodidonaa?’ yaagiis.

• Aqo deꞌoy laalettin neeni azzanennan aggakka. Raakela hagaadan gaasu: “Ta azinay 18 aginappe kase taani qoppennan aggidi bin, keehi azzanaas. Ta wozanay naaꞌꞌu kiyidi phalqqettidabadan tawu siyettiis. Taani keehi azzanidoogaa xalla gidennan, ubba sahettaas. Sinttanaabay tana hirggissiis.”

• Kehanaba milatenna wolqqaama harggiyaa harggana danddayaasa. Neenikka, “Taani ta de7uwaa karaas; taani . . . de7anau koyikke” yaagida Iyyoobaagaadan issi issitoo qoppana danddayaasa. (Iyyooba 7:16) “Issi issitoo taani hayqqanaagaa naagiyaabadan qoppays” yaagida, layttay 80 heera gidido Liyusaagaadan neeyyookka siyettennan aggenna.

• Woy neeni siiqiyo uri hayqqin minttettuwaa koyana danddayaasa. Robertti hagaadan giis: “Ta naꞌay horophilliyaa daafan hayqqin koyro ammanana danddayabeykke. Yaatada mishettiyoogaa doommaas; hegee qara bisoy wozanaa qanxxiyoogan Geeshsha Maxaafay leemisidi yootiyoogaa mala.”—Luqaasa 2:35.

Robertta, Liyusa, Raakelonne Huliyana wolqqaama metoy gakkikkokka minettidosona. Eti Ubbaa Danddayiya Xoossaappe minttettuwaa demmidosona. I waati minttettii? I nenakka hegaadan minttettanee?

Kiitettida PHawuloosi Yihoowaya “minttetto ubbaa Xoossaa” gidiyoogaanne ‘nu waaye ubban i nuna minttettiyoogaa’ yootiis. (2 Qoronttoosa 1:3, 4) Ay metoy gakkikkokka saluwan deꞌiya nu Aaway asa ubbaa minttettana danddayiyoogaa Geeshsha Maxaafay yootees.

Xoossay nuna minttettanaadan koyiyaaba gidikko, nuuni oottana koshshiyaabay deꞌees. Nuuni aakime keetti beennan aakimee nuna waati maaddana danddayii? Geeshsha Maxaafay, “Xoossaakko shiiqite; ikka inttekko shiiqana” yaagiyoy hegaassa.—Yaaqooba 4:8.

Xoossay nuukko shiiqanaagaa waati eriyoo? Koyroy, i nuna maaddanawu koyiyoogaa zaari zaaridi yootidoogaa. (Hagan deꞌiya saaxiniyaa xeella.) Naaꞌꞌanttoy, benikka ha wodiyankka Xoossay minttettido asati yootidobaa.

Ha wodiyan deꞌiya, Xoossay banttana maaddanaadan koyiya darotuugaadan, Kawuwaa Daawitakka daro metoy gakkiis. I issi wode, “‘Maaddo’ gaada taani nena xeesiyo . . . wode, neeni ta watiwatuwaa siya” yaagidi Yihoowa woossiis. Xoossay a maaddidee? Ee. Daawiti, “Taani maadettaas. Hegaa gishshau, ta wozanai an ufaittees” yaagiis.—Mazamure 28:2, 7.

YESUUSIKKA AZZANIYA UBBAA MINTTETTEES

Xoossay Yesuusikka asaa minttettanaadan koyees. Xoossay Yesuusayyo immido oosuwaappe amaridaagee ‘wozanay meqqidoogeeta kooliyoogaanne azzaniyaageeta ubbaa minttettiyoogaa.’ (Isiyaasa 61:1, 2) Hiraagan odettidaagaadan, Yesuusi ‘daafuranchatanne toohoy deexxidoogeeta’ wozanappe maaddiis.—Maatiyoosa 11:28-30.

Yesuusi loꞌꞌobaa zoriyoogan, kehabaa oottiyoogan, ubba issi issitoo harggiyaappe pattiyoogan asaa minttettiis. Inchirichay oyqqido bitanee issi galla Yesuusa, “Neeni koyikko, tana pattanau danddayaasa” yaagidi woossiis. Yesuusi ayyo qarettidi, “Taani koyais; paxa!” yaagiis. (Marqqoosa 1:40, 41) Yaatin bitanee paxi aggiis.

Ha wodiyan, Xoossaa Naꞌay nuukko yiidi minttettanawu saꞌan deꞌenna. SHin a Aaway, “minttetto ubbaa Xoossaa” Yihooway metootiyaageeta ubba wode maaddees. (2 Qoronttoosa 1:3) Xoossay asaa minttettiyo oyddu waanna ogeta beꞌa.

• Geeshsha Maxaafaa. “Xoossaa maxaafai nuuyyo immiyo genccaaninne minttettuwan nuuni demmana giidi ufaissan naagi uttidoogee de7ana mala, Xoossaa maxaafan xaafettida ubbabai nuna tamaarissanau xaafettiis.”—Roome 15:4.

• Xoossaa Geeshshaa Ayyaanaa. Yesuusi hayqqi simmin daro takkennan, Kiristtaane gubaaꞌe ubbay sarotettan deꞌiis. Aybissi? ‘Yihoowassi yayyiyoogaaninne Geeshsha Ayyaanaa maaduwan’ woykko minttettuwan hemettido gishshataassa. (Oosuwaa 9:31) Xoossaa wolqqa gidida geeshsha ayyaanay keehi wolqqaama. Xoossay ay hanotankka deꞌiya asaa he ayyaanan minttettana danddayees.

• Woosaa. Geeshsha Maxaafay, “Issibaukka hirggoppite” yaagidi zorees. Gujjidikka hagaadan gees: ‘Inttena koshshiyaabaa ubbawu woossite; qassi asa eratettaa ubbaappe aadhiya Xoossaa sarotettay intte wozanaanne intte qofaa naagana.’—Piliphphisiyuusa 4:6, 7.

• Nu Mala Kiristtaaneti meto wodiyan mintettana danddayiya, ammanettiya tumu laggeta. Kiitettida PHawuloosi bana gakkida ‘waayiyaaninne tuggan’ laggeti ‘a daro maaddidoogaa’ woy minttettidoogaa yootiis.—Qolasiyaasa 4:11; 1 Tasalonqqe 3:7.

SHin neeni, ‘Metoy gakkiyo wode hegee waati maaddii?’ gaada qoppana danddayaasa. Kasetiya huuphe yohuwan odettida metota genccida asatu hanotaa ane loytti pilggoos. Yaatiyo wode, neenikka etaagaadan, “Aayyiyaa ba na7aa minttettiyoogaadan, taanikka inttena minttettana” yaagida Xoossay ba qaalaa naagiyoogaa akeekana danddayaasa.—Isiyaasa 66:13.

OOSUWAA XAYIYO WODE

Seetia hagaadan giis: “Taanikka ta machiyaakka issi wode oosuwaa xayida. Naaꞌꞌu layttawu so asaa maaduwan, qassi wolqqa oosuwaa oottidi deꞌida. Hegaappe denddidaagan, ta machiyaa Prisila unꞌꞌettaasu; taanikka hidootaa qanxxaas.

“Nuuni waani genccidoo? Prisila Yesuusi yootido, Maatiyoosa 6:34n deꞌiya qofaa ubbatoo hassayawusu. Yesuusi gallassa ubbawu gidiya a huuphe waayee deꞌiyo gishshawu wonttobawu hirggennaadan yootiis. Qassi a darotoo wozanappe woossidoogee hidootaa qanxxennaadan maaddiis. Tana qassi Mazamure 55:22y minttettiis. Mazamuraawiyaagaadan taanikka ta toohuwaa Yihoowan wottaas; yaatin i tana minttettiis. Haꞌꞌi taani ooso demmaas; shin nuuni Maatiyoosa 6:20-22n deꞌiya Yesuusa zoriyaa maaran nuuyyo deꞌiyaabay gidana giidi deꞌoos. Ubbaappe aaruwan, Xoossaakkonne issoy issuwaakko kaseegaappe aaruwan shiiqida.”

Jonatani hagaadan giis: “Nu soo asaa zalꞌꞌee kasaarido gishshawu hirggaas. Nu biittay ikkonoomiyan qohettido gishshawu, 20 layttawu daafuridobay mela attiis. Taaninne ta machiyaa miishshaaban palamettiyoogaa doommida. Nuussi talꞌꞌokkona gi yayyidi kiredit karddiyan shammiyoogaakka aggida.

“SHin Xoossaa Qaalaynne a ayyaanay nuuni suurebaa kuuyanaadan maaddiis. Ay qommo oosuwaakka oottiyoogaa meezetaas; qassi darin koshshennabawu miishsha kessokko. Nuuni Yihoowa Markka gidiyo gishshawu, nu mala Kiristtaanetikka nuna minttettidosona. Eti nuuni hidootaa qanxxennaadan minttettidosona; koshshiya harabankka nuna maaddidosona.”

AQO DEꞌOY LAALETTIYO WODE

Raakela hagaadan gaasu: “Ta azinay taani qoppennan tana aggidi bin, keehi yiillotaasinne qohettaas. Qassi keehi azzanaas. SHin taani Xoossaakko shiiqaas; ikka tana minttettiis. Taani galla galla Xoossaakko woossiyo wode, a sarotettay ta wozanaa naagiis. I meqqida ta wozanaa koolidabadan tawu siyettees.

“Qassi a Qaalaa Geeshsha Maxaafay taani yiillotennaadaaninne uluwan lancce oyqqennaadan maaddiis. Roome 12:21n deꞌiya, ‘Iitabaa lo77oban xoonappe attin, iitabai nena xoonoppo’ yaagiya zoriyaa wozanan wottaas.

“Issi loꞌꞌo laggee taani ta kase azinaabaa qoppiyoogaa agganaadan minttettiis. I Eranchchaa 3:6 (NW) bessidi, ‘bayiis giidi agganawu’ wodee deꞌiyoogaa kehatettan yootiis. Hegee deexxiya zore gidikkokka, tawu koshshiyaabay hegaa. Haꞌꞌi taani hegaa qoppiyoogaa aggada, ufayssiyaabaa oottiyoogaa doommaas.”

Elizabeta hagaadan gaasu: “Aqo deꞌoy laalettiyo wode maaduwaa koyiyoogee attenna. Ubba galla tana koshshiyaaban maaddida siiqo laggiyaa deꞌawusu. A tanaara yekkawusu, tana minttettawusu, qassi taani ixettida asa gidennan asi siiqiyo asa gidiyoogaa akeekanaadan maaddaasu. Yihooway meqqida ta wozanaa i baggaara koolidabadan tawu siyettees.”

SAHETTIYO WODE WOY CIMIYO WODE

Koyro huuphe yohuwan abaa yootido Liyusi wozanaa keehi sahettees; ubba naaꞌꞌutoo hayqqiichi attiis. Ha wodiyan, i gallassan gallassan 16 saatiyawu maashiniyaappe oksijjiniyaa ekkana bessees. I hagaadan giis: “Taani ubbatoo Yihoowakko woossays. Xoossaakko woossa simmada, a ayyaanay tana minttettiyoogaa akeekays. Taani a ammaniyoonne i taassi qoppiyoogaa eriyo gishshawu, woosay taani hidootaa qanxxennaadan maaddees.”

Layttay 80 heera gidido Petra hagaadan gaasu: “Taani darobaa oottana koyays, shin oottana danddayikke. Ta wolqqay laafiyoogaa akeekiyoogee keehi azzanttees. Taani keehi daafurays; qassi xaliyaa ekkennan deꞌana danddayikke. Taani darotoo, metiya issibaa ba Aaway diggana mala oychida Yesuusaagaadan qoppays. SHin Yihooway Yesuusa minttettiis; i tanakka minttettees. Woosay tawu galla galla ekkiyo xale mala. Xoossaakko woossa simmada woppu gays.”—Maatiyoosa 26:39.

Goobi goobi biya wolqqaama harggiyaa 30 gidiya layttawu harggida Huliyanawukka hegaadan siyettees. I hagaadan giis: “Taani kase ooso keettan alaafe gidada wombbaran uttays shin, haꞌꞌi asi sugiyo gaariyan uttays. SHin harata maaddiyaabaa oottiyo gishshawu, tana mule pattennabadan xeellikke. Haratuyyo immiyoogee metuwaappe woppissees; qassi Yihooway nuna koshshiya wodiyan minttettanawu gelido qaalaa ubbatoo naagees. Taanikka PHawuloosadan, Yihooway ‘taayyo immiyo wolqqan ubbabaa oottana danddayays’ gays.”—Piliphphisiyuusa 4:13.

SIIQIYO URI HAYQQIYO WODE

Antoniyoy hagaadan giis: “Ta aaway kaamiyaa daafan hayqqido wode, koyro he hanotaa ammanana danddayabeykke. I ogiyaara biya saro asa gidiyo gishshawu hegee a bolli gakkidoogee keehi azzanttiyaaba. SHin taani aybanne oottana danddayabeykke. I hayqqanaappe kase ichashu gallassaa bana erennan takkiis. Ta aayee sinttan yeekkennan agganawu keehi baaxetaas; shin tarkka deꞌiyo wode keehi mishettays. Ubbatoo, ‘Hegee hanidoy aybissee?’ gaada ta huuphiyaa oychays.

“He keehi azzanttiya wodiyan taani kayyottennaadaaninne sarotettaa demmanaadan maaddana mala Yihoowa zaara zaarada oychaas. Yaatada, loddan loddan woppu gaas. O bollikka ‘qoppibeennabay’ gakkana danddayiyoogaa Geeshsha Maxaafay yootiyoobaa hassayaas. Xoossay worddotenna gishshawu, ta aaway hayquwaappe denddin zaarettada beꞌanaagaa ammanettays.”—Eranchchaa 9:11; Yohaannisa 11:25; Tiitu 1:2.

Abay koyro huuphe yohuwan odettido Robertta qofaykka hegaa mala. I hagaadan giis: “Taaninne ta machiyaa Piliphphisiyuusa 4:6, 7n odettida sarotettay nu qofaa naagiyoogaa akeekida. Nuuni Yihoowakko woossidoogee hegawu maaddiis. Ha sarotettaa demmidoogee oduwaa xaafi giigissiya asatuyyo dendduwaa hidootaabaa yootanaadan maaddiis. Horophilliyaa daafan nu naꞌay hayqqikkokka, nuuni issippe aattido keehi ufayssiya daro wodiyaabaa qoppana danddayoos. Nuuni ubbatoo hegaabaa qoppanawu baaxetoos.

“Nuuni woppu giidi nu ammaniyoobaa yootishin televizhiiniyan beꞌidoogaa nu mala Kiristtaaneti yootiyo wode, nuussi keehi daro asay woossidoogee hegawu maaddidoogaa etawu yootoos. Daroti nuuni minettanaadan maaddiya qofaa xaafidi yeddanaadan oottiyoogan Yihooway nuna maaddidoogaa ammanettays.”

Qommoora qonccida leemisoti bessiyoogaadan, Xoossay dumma dumma metoy gakkiyoogeeta minttettana danddayees. Nena shin minttettanee? Nena ay metoy gakkikkokka, he wodiyan minttettana danddayiyaabay deꞌees.b He minttettuwaa demmanawu Yihoowakko xeella. I “minttetto ubbaa Xoossaa.”—2 Qoronttoosa 1:3.