Beba ba aawaa keehi siiqawusu. He qofaa yootiday, eta soo asaara laggetiyaanne etawu loꞌꞌobaa qoppiya ura; shin hegee Bebo minttettibeenna, keehi qohiis. A, “I hayqqidoogee loꞌꞌobaassa gidenna,” gaada zaaretta zaarettada qoppaasu. A he daafaabaa daro layttappe guyyiyan maxaafan xaafido wodekka, kayyottiyoogee qoncce.

Beba akeekidoogaadan, kayyottidaagee hayqqidaagaa keehi siiqiyaaba gidikko, kayyuwaappe minettanawu daro wodiyaa ekkana danddayees. Geeshsha Maxaafay hayqoy ‘wurssetta morkke’ gidiyoogaa qonccissees. (1 Qoronttoosa 15:26) Darotoo nuuni aynne qoppennan nu siiqiyo uri hayqqiyoogee nu deꞌuwaa qohana danddayees. Hayqoy nuna qohennaadan oottana danddayokko. Hegaa gishshawu, issi uri hayqqin hegaara gayttidaagan gakkida qohuwaa waani genccanaakko erennaagee wottin deꞌiyaaba.

Neeni hagaadan qoppana danddayaasa: ‘Taani kayyottiyoogaa agganawu ay keena wodiyaa ekkanee? Issi uri kayyottiyoogaa waatidi genccana danddayii? Kayyottidaageeta waata minttettana danddayiyaanaa? Nuuni siiqiyo hayqqidaageetuyyo hidooti deꞌii?’

Neeni amarida gallassawu sahetta eray? Neeni sohuwaara paxido gishshawu he hanotaa dogana danddayaasa. SHin kayyoy hegaa mala gidenna. Aqo laggee hayqqin azzaniyoogaabaa issi xaafee, “‘Minettanawu’ kayyuwaagaa keena deexxiyaabi baawa” yaagiis. Gidoppe attin, i gujjidi, “Takkidi, harati maaddin neeni kaseegaappe guuttaa guuttaa minettana” yaagiis.

Leemisuwawu, Abrahaami ba machiyaa hayqqido wode waanidaakko qoppa. Geeshsha Maxaafay, “Abrahaami Saariyyo yeekkanaunne kayyottanau biis” yaagees. Kayyuwaappe minettiyoogee ayyo amarida wodiyaa ekkidaba milatees.a Hara leemisoy, a naꞌay Yooseefi doꞌan meetettidi hayqqidabadan qoppanaadan cimettida Yaaqooba. I “daro gallassaa” kayyottiis; qassi a soo asay a minttettana danddayibeenna. Daro layttappe guyyiyankka, i Yooseefa hayquwaabaa qoppiyo wode kayyottiis.—Doomettaabaa 23:2; 37:34, 35; 42:36; 45:28.

Ha wodiyan keehi siiqiyo uri hayqqin azzaniya darotu hanotaykka hegaa mala. Kaallidi deꞌiya naaꞌꞌu leemisota beꞌa.

• “Ta azinay Robertti Isiine 9, 2008n hayqqiis. I hayqqanaadan oottida, he maallado gakkida daafabay hara gallassaagaappe dummatenna. Qanꞌꞌiyaa mi simmin, ubbatoo oottiyoogaadan i oosuwaa biyo wode, nuuni issoy issuwaara yerettida, qoomettida, qassi, ‘Taani nena siiqays’ giidi issoy issuwawu yootida. Usuppun layttay aadhinkka azzaniyoogaa aggabeykke. Taani Roberttawu azzaniyoogaappe awudenne minettiyaaba milatenna.”—Geelo, layttay 60.

• “Ta alꞌꞌo machiyaa hayqqoosappe 18 layttappe daroy aadhikkokka, haꞌꞌikka o laamotaysinne azzanays. Taani loꞌꞌiya meretaa beꞌiyo wode ubbatoo a tawu karhi gawusu; qassi a paxa deꞌada taani beꞌiyoobaa beꞌiyaakko ay keena ufayttanaakko qoppays.”—Etiyana, layttay 84.

Hegaadan daro wodiyawu keehi azzaniyoogee wottin deꞌiyaaba. Ubba asi azzaniyo ogee issi mala gidenna; qassi hara uri azzaniyo ogiyaa likke gidenna giyoogee bessiyaaba gidenna. Qassi, nuuni hayqqida urawu keehi azzaniyaaba milatikko, nu bolli pirddana koshshenna. Nuuni kayyottiyoogaa waatidi genccana danddayiyoo?

Hegaa xeelliyaagan odettiya daro zoree deꞌees. SHin, he zoriyaappe maaddiyay ubbaa gidenna. Leemisuwawu, amaridaageeti neeni yeekkana bessenna woy neeyyo siyettiyaabaa ayba ogiyankka qonccissana bessenna giidi zoriyoogaa akeekennan waaya aggana. Harati qassi neeni yeekkanaadaaninne neeyyo siyettiyaabaa ubbaa qonccissanaadan denttettana danddayoosona. Geeshsha Maxaafay ha wodiyaa xinaatiyaara maayettiya loꞌꞌo qofaa yootees.

Issi issi wogan attuma asi yeekkenna geetettees. SHin asaa sinttan afuxxiyoogaa xeelliyaagan yeellatana koshshii? Guuggiyaa payyatettaa xannaꞌiya eranchati, afuxxiyoogee azzaniyo ogiyaappe issuwaa gidiyoogaa yootoosona. Nena gakkida qohoy wolqqaama gidikkonne, azzaniyoogee wodeppe neeni hanotaa genccanaadan maaddana danddayees. SHin, azzaniyoogaa qonccissennaagee qoheesippe aattin maaddenna. Azzanidi afuxxiyoogee bala woy shugotetta giyo qofaa Geeshsha Maxaafay kaafenna. Leemisuwawu, Yesuusa qoppa. I keehi siiqiyo laggee Alꞌꞌaazari hayqqido wode, hayqqidaageeta hayquwaappe denttanawu awu wolqqay deꞌiyaaba gidikkonne, Yesuusi yeekkiis!—Yohaannisa 11:33-35.

Qoppennan issi uri hayqqiyo wode, nuuni hanqqettiyoogee darotoo kayyottiyo ogiyaappe issuwaa. Kayyottida uri hanqqettanaadan oottiya daro gaasoy deꞌana danddayees; leemisuwawu bonchiyo uri qoppennan bessennabaa yootiyoogee hanqqetissana danddayees. Tohossa Afirkkan deꞌiya Mayki hagaadan giis: “Ta aaway hayqqiyo wode tawu layttay 14. Baliyan woosa keettaa asttamaaree, Xoossawu loꞌꞌo asay koshshiyo gishshawu, wodee gakkennan eta efiyoogaa yootiis.a Nu aaway nunaara deꞌanaadan keehi koyiyo gishshawu, hegee tana keehi hanqqetissiis. Ta aaway hayqqoosappe 63 layttay aadhiis; shin haꞌꞌikka he haasayay qohees.”

Bana mooranchadan xeelliyoogaabaa shin woygana danddayettii? Ubba qassi asi qoppennan hayqqiyoogee azzanida uri, ‘Taani hagaa woykko hegaa oottidaakko hayqqenna’ giidi zaari zaaridi qoppanaadan oottana danddayees. Woy hayqqida uraara neeni ooyettada sigettennan i hayqqennan aggenna. Hegee neeni keehi mooranchadan nebaa qoppanaadan oottana danddayees.

Neeni nena moorancha giyoogaaninne yiillotiyoogan qohettaydda deꞌiyaaba gidikko, he qofaa coꞌꞌu gaana koshshenna. Neeni yootiyoobaa siyiyaanne hagaa mala bessenna qofay azzaniya darotuyyo siyettiyoogaa yootidi nena minttettiya laggiyawu oda. Geeshsha Maxaafay, “Laggee mule wodekka siiqees; ishaikka metuwaa wode maaddanaassi yelettees” yaagees.—Leemiso 17:17.

Azzanidaageetussi Dabbo gidana danddayiya ooppenne aadhiyaagee nuna medhida, Xoossaa Yihoowa. ‘I neeyyo qoppiyo gishshawu,’ ne wozanan deꞌiyaabaa ayyo woosan yoota. (1 PHeexiroosa 5:7) Hegaa bollikka, hegaadan oottiya ubbaa qofaanne etawu siyettiyaabaa ubbaa “eratettaa ubbaappe aadhdhiya Xoossaa sarotettai” woppu oottanaagaa i qaalaa geliis. (Piliphphisiyuusa 4:6, 7) Qassi, Xoossay minttettiya ba Qaalaa, Geeshsha Maxaafaa baggaara minttettidi nena maaddanaadan eeno ga. Minttettiya xiqiseta xaafa. (Saaxiniyaa xeella.) Neeni hegeetuppe amaridaageeta hassayanawu koyana daddayaasa. Hegaa mala qofaa wotta denttada qoppiyoogee qammi neeni nerkka deꞌiyo wodenne xiskkoy efeennan ixxiyo wode keehi maaddana danddayees.—Isiyaasa 57:15.

Layttay 40 gidido Jaaki, i siiqiyo machiyaa mata wode kansseriyaa harggada hayqqaasu. Jaaki issitoo issitoo keehi boorasiyoogaa yootiis. SHin woossiyoogee a maaddiis. I hagaadan giis: “Taani Yihoowa woossiyo wode, mule boorasikke. Taani qammi darotoo xiskkuwaappe beegottays; qassi simmada xiskkikke. Geeshsha Maxaafaappe minttettiya qofaa nabbabada, hegaa wotta dentta qoppa simmada, ta wozanan deꞌiyaabaa woosan yootiyo wode, taani woppu giyoogaanne ubbaappe aadhiya sarotettaa demmiyoogaa akeekays; hegee ta qofaynne ta wozanay woppu gaanaadaaninne taani xiskkanaadan maaddees.”

Venesso giyo yelagee aayyiyaa sahettada hayqqaasu. Akka woosay maaddiyoogaa akeekaasu. A, “Taani keehi metootiyo wode, Xoossaa sunttaa xeesada yeekkays. Yihooway ta woosaa siyidi, ubbatoo tawu koshshiya wolqqaa immiis” yaagaasu.

Kayyottiyaageeta zoriyaageetuppe amaridaageeti kayyottiyaageeti hara ura maaddana woy deretettan koshshiyaabaa asaara oottana bessiyoogaa zoroosona. Hegaadan oottiyoogee ufayttanaadaaninne kayyottiyoogaappe minttanaadan oottana danddayees. (Oosuwaa 20:35) Azzanida daro Kiristtaaneti harata maaddiyaabaa oottiyoogee eti keehi minettanaadan oottiyoogaa akeekidosona.—2 Qoronttoosa 1:3, 4.

Siiqiyo uri hayqqin kayyottiya ura beꞌada waatanaakko metoota eray? Nuuni issi issitoo ay haasayanaakko woy ay oottanaakko erennan aggana danddayoos; yaatiyo gishshawu, aynne haasayokko woy oottokko. SHin, nuuni oottana danddayiyo maaddiya darobay deꞌees.

Darotoo, koshshiya waannabay yaa biidi azzanidoogaa yootiyoogaa. Daro wogatun, qoommiyoogee etawu qoppiyoogaa bessiyo loꞌꞌo oge. Azzanida uri haasayanawu koyikko, qarettada siya. Ubbaappe aaruwan, azzanida so asawu issi issibaa ootta; kayyottidaageeti oottana danddayenna oosota hegeetikka, qumaa kattiyoogaa, naatuyyo koshshiyaabaa kunttiyoogaa, koshshiyaaba gidikko baliyaa kessiyoogaara gayttidabaa oottiyoogaa. Hegaa mala oosoy ililo qaalaa haasayiyoogaappe aadhiyaagaa gidana danddayees.

Hara wode, hayqqida uraabaa amarida a loꞌꞌo eeshshaabaa woy issippe aattido ufayssiya wodiyaabaa denttada haasayana danddayaasa. Hegaa mala haasayay azzanida uray ufayttanaadan oottana danddayees. Leemisuwawu, i azinay Iyani hayqqoosappe usuppun layttay aadhin Pama hagaadan gaasu: “Taani mule erennabaa Iyani oottido loꞌꞌobaa asay tawu issi issitoo yootees; qassi hegee taani ufayttanaadan oottees.”

Azzanida darota koyro heeran asay keehi maaddiyoogaa eranchati yootoosona; shin eta laggeti bantta oosuwawu simmiyo wode azzanidaageeta maaddiyaabi baynnaagaa qonccissidosona. Hegaa gishshawu, azzanida laggiyaa yeehoy aadhi simmin aggennan oychanawu baaxeta.a Kayyottiya daroti hegee eti daro wodiyawu kayyottennaadan maaddido gishshawu hegaa keehi nashshoosona.

I aayyiyaa hayqqa simmin 15 aginappe guyyiyan ippe bayra michiyaakka hayqqido gishshawu keehi kayyottida Jaappaane biittaa yelagee, Kaꞌori leemisuwaa qoppa. Ammanettida laggeti aggennan o maaddido gishshawu galatawusu. Kaꞌorippe keehi bayratiya Ritisuko giyoora iyyo mata laggee gidaasu. Kaꞌora hagaadan gaasu: “Taani hegan ufayttabeykke. Oonikka ta aayee mala gidana danddayenna; qassi oonikka i mala gidana gaada qoppikke. Ritisuka tana keehi maaddido gishshawu, taani iyyo lagge gididabadan tawu siyettiis. Saaminttan saaminttan, haggaazanawu issippe boos; qassi gubaaꞌiyaakka issippe boos. A tana shayiyaa shoobbawusunne taassi qumaa immawusu, qassi darotoo dabddaabbiyaa xaafawusunne karddiyaa immawusu. Ritisukiyyo deꞌiya loꞌꞌo xeelay tana maaddiis.”

Kaꞌori aayyiyaa hayqqoosappe 12 layttay aadhiis; anne i azinay haꞌꞌi kumetta wodiyaa haggaazoosona. Kaꞌora, “Ritisuka taayyo qoppiyoogaa aggabeykku. Taani soo biyo wode, o ubbatoo oychays; qassi iira ufayssiya wodiyaa aattays” yaagaasu.

Pola Qophiroosan deꞌiya Yihoowa Markka; harati o aggennan minttettido gishshawu a goꞌettaasu. Poli azinay Sozosi keha, siiqiyaagaanne leemiso gidiya gubaaꞌe cima; aawi aaya baynna naatuuranne amꞌꞌetuura wodiyaa issippe aattanawunne etaara qumaa maanawu darotoo soo shoobbees. (Yaaqooba 1:27) Sozosawu layttay 53 gidiyo wode, guuggiyan xiiꞌee kiyin hayqqidoogee azzanttiyaaba. Pola, “Taani 33 layttawu issippe deꞌido ammanettida ta azinaappe hayquwan shaahettaas” yaagaasu.

Yeehuwaappe simmin, Pola layttay 15 gidido ba kaalo naꞌaa Daaneelaa ekkada Kanaada baasu. Eti yan Yihoowa Markkatuura shiiqiyoogaa doommidosona. Pola hagaadan gaasu: “Ta ooratta gubaaꞌiyan deꞌiya laggeti nuna gakkidabaanne nuuni deꞌiyo metiya hanotaa erokkona. SHin hegaa erennaagee eti nuukko shiiqennaadaaninne minttettiya qaalaa kehatettan haasayidi koshshiyaaban maaddennaadan diggibeenna. Ta naꞌay ba aawaara deꞌanawu keehi koyiyo he wodiyan, hegee keehi maaddiis! Gubaaꞌiyaa cimati Daaneela keehi dosoosona. Gubaaꞌiyaa yameti issippe wodiyaa aattiyo wode woy kuwaasiyaa kaaꞌiyo wode issi cimay Daaneela hassayidi xeesees.” Ayyiyaakka naꞌaykka haꞌꞌi loꞌꞌo hanotan deꞌoosona.

Nuuni azzanidaageeta koshshiyaaban maaddananne minttettana danddayiyo daro ogee deꞌees. Qassi Geeshsha Maxaafay ufayssiya sinttanaa hidootaa yootiyoogan nuna minttettees.

Kasetidi ibay qonccido Geela ba azinay Robi hayquwaappe waayi denddana gaada siridoogaa hassayennan aggakka. SHin, a Xoossay qaalaa gelido ooratta alamiyan aara zaarettada gayttanawu hidootan naagawusu. A, “Taani keehi dosiyo xiqisee Ajjuutaa 21:3, 4” yaagaasu. Xiqisee hagaadan gees: “I eta Xoossaa gidana. Xoossai eta aifiyaappe afutta ubbaa quccana. Hagaappe sinttanau haiqoinne kayyoi woi waasoinne sahoi de7enna. Aissi giikko, ceegabai xayiis.”

Geela hagaadan gaasu: “Ha xiqisee yootiyoobay qoncce. Bantta siiqiyo uri hayquwaappe denddanaagaa erennaageetussi taani keehi qarettays.” Sinttappe Xoossay ehanawu qaalaa gelido ‘hayqoy deꞌenna’ wodiyaabaa aginan aginan 70 saatiyaa mishiraachuwaa yootiyoogan Geela ba ammanuwaara maayettiyaabaa oottawusu.

‘Hegee ammananawu metiyaaba!’ gaana danddayaasa. SHin Iyyoobabaa qoppa. I keehi sahettiis. (Iyyooba 2:7) Iyyoobi hayqqanawu amottikkokka, a hayquwaappe denttidi saꞌan deꞌanaadan oottanawu Xoossawu wolqqay deꞌiyoogaa ammaniis. I ammanettidi hagaadan giis: “Abeet Xoossau, neeni tana duufo giddon [gentta]. . . . Neeni medhdhido tanakka be7anau neeni laamotiyo wode, neeni tana xeesana; xeesin taani neeyyo koyana.” (Iyyooba 14:13, 15) Iyyoobi Xoossay a laamotiyoogaanne hayquwaappe denttanaagaa ammanettiis..

Matan, saꞌay gannate gidiyo wode, Xoossay Iyyoobayyoonne hara darotuyyo hegaa oottana. (Luqaasa 23:42, 43) Geeshsha Maxaafay Oosuwaa 24:15n, asay ‘hayquwaappe denddanaagaa’ geeshshidi yootees. Yesuusi, “Hagan garamettoppite; aissi giikko, duufuwan de7iyaageeti [ta] cenggurssaa siyiyo wodee yees. Siyidi eti duufuwaappe gaxi kiyana” yaagiis. (Yohaannisa 5:28, 29) Iyyoobi hegee polettin beꞌana. ‘A yelagatetta wolqqay simmana’; qassi a bollay merinawu ‘yelaga’ gididi deꞌana. (Iyyooba 33:24, 25) Hayquwaappe denddidi saꞌan deꞌiyo hidootaa nashshiya ubbawu hegaadan hanana.

Neeni siiqiyo uri hayqqin qohettidaba gidikko, ha qofay neeni kayyottiyoogaa muleera teqqennan aggana danddayees. Gidoppe attin, Geeshsha Maxaafay yootiyo, Xoossay qaalaa gelidobaa wotta dentta qoppiyoogan tumu hidootaanne minotettaa demmana danddayaasa.—1 Tasalonqqe 4:13.

Kayyuwaappe waani genccana danddayiyaakko gujjada eranawu koyay? Woy qassi hegaara gayttiya, “Xoossay iitabaynne metoy deꞌishin coo giyoy aybissee?” gaada qoppay? Geeshsha Maxaafay yootiyo minttettiyaanne maaddiya zaaruwaa demmanawu, jw.org weyb saytiyaa xomoosa.