Hegaappe simmin deꞌiya aginatun, Hitoshi hara oosuwaa waaya demmana giidi unꞌꞌettiis. Leemisuwawu, issitoo oosuwawu qaxaranawu a oychiyo wode, Hitoshi worddobaa aybanne oottennaagaa yootiis. A oychiyaagee, “Neeni hara asaagaappe dumma gididabaa qoppaasa!” yaagiis. Hitosha so asaynne laggeti i ubbatoo ammanettidi deꞌanaadan minttettidosona; shin i issi issibaa siriyoogaa doommiis. Leemisuwawu i, “Taani ammaniyoobaa aynne qottennan yootiyoogee loꞌꞌokkonne siraas” yaagiis.

Hitosha gakkidabay ammanettiyoogaa ubba asay xoqqu oottidi xeellennaagaa bessiya azzanttiyaaba. Ubba issoti issoti, ubba qassi zalꞌꞌe oosuwaa oottiyaageeti ammanettiyoogee meton yeggiyaaba giidi qoppana danddayoosona. Tohossa Afirkkan oottiya issi maccaasiyaa, “Ta yuushuwan ammanettenna asay kumiis; ubba eti issi issitoo taakka etadan hananaadan denttettoosona” yaagaasu.

Ha wodiyan daro asay ammanettennaagaa bessiya harabay worddotiyoogaa. Gastta asatuppe xeetaappe 60 kushe gidiyaageeti issoy issuwaara haasayiyo wode tammu daqiiqan baa giishin issitoo worddotiyoogaa Massashusetts Amherst Yuniversttiyaa eranchay Robert Feldmani amarida layttappe kase xannaꞌidobay qonccissiis. Feldmani, “Hegee keehi daganttiyaaba. Daro asay ba deꞌuwan galla galla hegaadan darotoo worddotees giidi qoppibookko” yaagiis. Daro asay hara uri bawu worddotanaadan koyenna; shin ha wodiyan worddotiyoogaa keena keehi meeze gididabi darenna.

Worddotiyoogee, wuuqqiyoogeenne ammanettennaagaa bessiya hegaa malabay ha wodiyan meeze gididoy aybissee? Ammanettennan aggiyoogee kumetta deriyaa waati qohii? Qassi nuuni balbakkiyoobaa oottennaadan waani naagettana danddayiyoo?

Neeni he qofaa maayay? Samantiigaadan nunakka dumma dumma wodiyan metiyaabay gakkees. Ammanettennaadan paacciyaabay gakkiyo wode nuuni oottiyoobay nuuni xoqqu oottidi xeelliyoobay aybakko bessees. Leemisuwawu, nuuni asan nashettiyoogaa hara aybippenne xoqqu oottidi xeelliyaaba gidikko, worddotiyoogee bessiyaaba giidi qoppana danddayoos. Gidikkokka, tumay qoncciyaa kiyiyo wode, wordduwaa haasayidoogee darotoo iitabaa kaalettees. Kaallidi deꞌiyaabaa beꞌa.

AMMANETTENNAAGEE DABBOTAA MOOREES

Ammanettiyoogee issippetettawu keehi koshshiyaaba. Naaꞌꞌu asati issoy issuwawu ammanettikko, woppu giidi deꞌoosona. SHin hegaadan ammanettiyoogee issi kutti haniyaaba gidenna. Asay worddotennan haasayiiddinne kehiiddi issoy issuwaara wodiyaa aattiyo wode, issoy issuwaa ammanees. SHin issitoo worddotikko, eti issoy issuwaa ammanettiyoogaa aggana danddayoosona. Issi uri ammanettenna asa gidiichikko, zaarettidi a ammananaagee deexxiyaaba gidana danddayees.

Neeni loꞌꞌo lagge gaada ammaniyo uri nena cimmi erii? Yaatin neeyyo aybi siyettidee? Hegan qohettennan, ubba qassi nena kaddidabadan qoppennan aggakka. Hegaadan qoppiyoogee wottin deꞌiyaaba. Ammanettennan aggiyoogee alꞌꞌo dabbotaa mooriyaaba gidiyoogee aynne sirissenna.

AMMANETTENNAAGEE HARAYKKA AMMANETTENNAADAN OOTTEES

Kaliforniyaa Yuniversttiyaa profeeseree Robert Inesi, “ammanettennan aggiyoogee asaappe asaa oyqqiya hargge mala” gidiyoogaa akeekiis. Hegaa gishshawu, ammanettenna uraara darotoo wodiyaa aattiyaaba gidikko, neenikka ammanettenna ura gidana danddayaasa.

Ammanettennan aggiyoogee nena piredan oyqqennaadan waatana danddayay? Geeshsha Maxaafay nena maaddana danddayees. Hegaara gayttida amarida Geeshsha Maxaafaa maarata beꞌa.

Geeshsha Maxaafan issi issitoo “ammanettiyoogaa” geetettidi birshshettida Giriiketto qaalay “loꞌꞌo gididabaa” giyoogaa. Kandduwaara gayttidaagan loꞌꞌo gididabaa qonccissanawukka he qaalaa goꞌettoos.

Kiitettida PHawuloosi geeshsha ayyaanay denttettin, ‘Nuuni ubba wode [“ubbaban,” NW] loꞌꞌobaa oottanawu koyoos’ giidoogaa Kiristtaaneti xoqqu oottidi xeelloos. Hegee woygiyoogee?

KEEHI BAAXEYIYAABAA

Daro asay asaara gayttanaappe kase, guuraara bana heregan beꞌees. Aybissi? Eti danddayido keenan loꞌꞌidi beettanawu koyiyo gishshataassa. SHin huuphiyaa loytti giigissiyoogaappe woy keehi loꞌꞌiya maayuwaa maayiyoogaappe aattidi qoppana bessiya harabay deꞌees. Nu garssa oonatettay kareera beettiya nu puulaa loyttees woy moorees.

Nuuni darotoo iitabaa oottanawu koyiyoogaa Xoossaa Qaalay geeshshidi yootees. Doomettaabaa 8:21, “Naatettaasappe doommin, asi wozanan qoppiyoobai ubbai iita” yaagees. Hegaa gishshawu, nagarancha gidiyoogaappe denddidaagan nuuni qoppiyo iitabaa agganawu baaxetana bessees. Nagaraa xoonanawu baaxetiyoogee wolqqaamaba gidiyoogaa kiitettida PHawuloosi hagaadan giidi qonccissiis: “Aissi giikko, taani ta wozana giddon Xoossaa higgiyan ufaittais; shin ta bollaa giddon de7iya ta wozanaa qofaa higgiyaara warettiya dumma higgiyaa be7ais; he higgee ta bollaa giddon de7iya nagaraa ootissiya higgiyan tana qashissees.”—Roome 7:22, 23.

Leemisuwawu, nu wozanay nuuni iitabaa oottanaadan sugiyo wodenne ammanettennaagaa bessiyaabaa oottanawu paacettiyo wode, nu wozanay denttettiyoobaappe harabaa aynne oottana danddayennabadan qoppana bessenna. Hegaa mala hanotankka ay oottanaakko doorana danddayoos. Iita qofaa eqettikko, nu yuushuwan deꞌiya asay ammanettennaagaa gidinkka ammanettidi deꞌana danddayoos.

BAAXIYAN XOONANA DANDDAYOOS

Xoqqu oottidi xeelliyo kandduwaa maaray deꞌiyoogee nuuni ammanettidi deꞌanawu keehi maaddees. Gidikkokka, daro asay kandduwaa maaraa qoppiyoogaappe aattidi maayuwaabaanne meraabaa qoppiiddi daro wodiyaa aattiyoogee azzanttiyaaba. Hegaappe denddidaagan, bantta hanotaara maayiya oge xallan ammanettana koyoosona. Ammanettennaagaa giyoogee aybakko qonccissiya issi maxaafay hagaadan giis: “Nuuni ammanettiyaageeta giidi qoppikko, worddotikkokka aykko baa giidi qoppoos” yaagees. SHin ammanettiyoogaara gayttidaagan nuuni ubbatoo kaallana bessiya maaray deꞌii? Ee, deꞌees.

Kumetta saꞌan deꞌiya miilooniyan qoodettiya asati Geeshsha Maxaafan hegaara gayttidaagan bali baynna maaray deꞌiyoogaa akeekidosona. Hara aybiiranne geeddarssana danddayenna kandduwaa maaray Geeshsha Maxaafan deꞌees. (Mazamure 19:7) So asaa deꞌuwaara, oosuwaara, kandduwaaban geeshsha gidiyoogaaranne ayyaanaabaara gayttidaagan an deꞌiya zoriyaa ubbatoo ammanettana danddayoos. Hegee tuma gidiyoogee daro wodiyawu erettiis. An deꞌiya higgeenne maaray dumma dumma biittaa asawu, zariyawunne sheeshshawu haniyaagaa. Geeshsha Maxaafaa loytti xannaꞌiyoogan, i giyoobaa wotti dentti qoppiyoogaaninne an deꞌiya zoriyaa oosuwan peeshshiyoogan nu wozanay ammanettiyaagaanne xillo gidanaadan loohissana danddayoos.

Gidikkokka, ammanettidi deꞌennaadan paacciyaabaa xoonanawu, Geeshsha Maxaafaa tumaa eriyoogaa xallay gidenna. Hegaa bollikka, asay kandduwaaban keehi moorettidanne nuunikka etaagaadan qoppanaadan denttettiya asay kumido alamiyan deꞌoos. Xoossay nuna maaddana mala akko woossana koshshiyoy hegaassa. (Piliphphisiyuusa 4:6, 7, 13) Yaatikko, likke gididabawu exatananne ubbaban ammanettiyaageeta gididi deꞌana danddayoos.

AMMANETTIYOOGEE DEMISSIYO ANJJUWAA

Koyro huuphe yohuwan abaa denttido Hitoshi ammanettiya oosancha gidiyoogan loꞌꞌo sunttaa demmidoogee a guyyeppe maaddiis. Haꞌꞌi i ammanettiya asa gidiyoogaa nashshiya bitaniyawu oottees. Hitoshi, “Ta zoriya wozanay ubbatoo geeshsha gididi deꞌanaadan maaddiya oosuwaa demmido gishshawu keehi ufayttays” yaagiis.

Aagaadan qoppiya haratikka deꞌoosona. Bantta oottiyo ‘ubbaban loꞌꞌo zoriya wozanay banttawu deꞌanaadan’ oottiyoogan goꞌettida issi issi asatu leemisuwaa beꞌa.

• Geeshsha Zoriya Wozanaa

  

  “Tawu layttay 13 gidiyo wode, kaysotuura oottanawu gaada timirttiyaa aggaas. Hegaa gishshawu, taani demmiyo miishshaappe xeetaappe 95 kushe gidiyaagaa bessennabaa oottada demmays. Guyyeppe, azinaa gelaas; yaatin taaninne i Yihoowa Markkatuura Geeshsha Maxaafaa xannaꞌiyoogaa doommida. Xoossaa Yihoowaya iita oosuwaa ixxiyoogaa eridi, nu deꞌuwaa laammanawu murttida. Nuuni 1990n nu huuphiyaa geppidinne xammaqettidi Yihoowa Markka gidida.—Leemiso 6:16-19.

  “Kase ta son wuussa miishshi kumiis; shin haꞌꞌi hegaa malabi ta son baawa; hegee qassi ta zoriya wozanay geeshsha gidanaadan oottees. Kase taani iita oosuwaa oottiyoogaa qoppiyo wode, Yihooway tana maarido gishshawu a keehi galatays. Yihooway tanan ufayttiyoogaa qoppaydda ubbatoo xiskkiyoogee ufayssiyaaba.”—SHerilo, Ayerlande.

  

  “Nu dirijjitiyawu dambbaynna gidida uri taassi mattaayiyaa immin ixxidoogaa ta alaafee siyidi, ‘Ne Xoossay neeni hagaadan ammanettiya ura gidanaadan oottiis! Ne ha dirijjitiyan deꞌiyoogee nuussi gita anjjo’ yaagiis. Taani ubbaban ammanettada deꞌiyoogee Xoossaa Yihoowa sinttan tawu loꞌꞌo zoriya wozanay deꞌanaadan oottees. Qassi ta soo asaynne harati hegaadan oottanaadan maaddanaadankka oottees.”—Sona, Hong Konge.

• Woppaa

  

  “Keehi erettida bankkiyan alaafiyaa maaddiyaagaa gidada oottays. Ha oosuwan asay darotoo ammanettiyoogaappe aattidi dure gidiyoogaa qoppees. Daro asay, ‘Miishshaa demmanawunne dure gidanawu maaddiyaaba gidikko guuttaa worddotin ay metoy deꞌii?’ giidi qoppees. SHin taani ammanettiya asa gidiyo gishshawu woppu gaada deꞌays. Taani ubbatoo ammanettada deꞌanawunne hegee ta bolli kaalettiyo aybanne genccanawu murttaas. Tana ootissiyaageeti taani etawu gidin hara ooyyoonne worddotennaagaa eroosona.”—Toma, Amarkkaa.

• Bonchettiyoogaa

  

  “Nu ooso keettan wuuqettidabaa xeelliyaagan taani worddotanaadan ta alaafee oychiis; shin taani ixxis gaas. SHin guyyeppe kaysoti erettin ta alaafee tana nashshiis. Hara asay ammanettenna wodiyan ammanettidi deꞌanawu keehi xalana bessees. Gidikkokka, guyyeppe harati nena ammanananne bonchana.”—Kaꞌoro, Jaappaane.

Geeshsha zoriya wozanaa, woppaanne bonchettiyoogaa mala anjjoti ammanettiyoogee tumuppe koshshiyaaba gidiyoogaa bessoosona. Neeni he qofaa maayikkii?