OYSHA 7
Laggeti Asho Gaytotettawu Denttettiyo Wode Waata Eqettoo?
NEENI AY OOTTANEE?
Ha hanotaa qoppa: Helena Mikaaꞌeela beꞌoosappe biron naaꞌꞌu agina; shin beniisappekka a eriyaabadan qoppawusu. Moobayle malaban darotoo issoy issuwawu kiitaa yeddoosona, issi issitoo daro saatiyawu silkkiyan haasayoosona, ubba issoy haasayanawu doommido qofaa haray wurssana danddayees! SHin haꞌꞌi Mikaaꞌeeli hegaappekka harabaa koyees.
Aadhida naaꞌꞌu aginatun, Mikaaꞌeelinne Helena issoy issuwaa kushiyaa oyqqiyoogaappenne yerettiyoogaappe harabaa oottibookkona. Helena hegaappe harabaa oottanawu koyabeykku. SHin a Mikaaꞌeeli ippe halana malakka koyabeykku. Aara laggetiyoogee puulanchanne dumma gididabadan iyyo siyettanaadan oottees. A baassi hagaadan gawusu: ‘Qassi, Mikaaꞌeelinne taani siiqettoos . . . ’
Neeni ekkanawu woy gelanawu gakkidaba, qassi ne hanotay Heleniigaa mala gidiyaakko, waatuutee?
TAKKI GA QOPPA!
Asho gaytotettay aqo oyqqidaageetu xallawu Xoossay immido imota. Aqo oyqqennan hegaadan oottiyoogee he imotaa bessenna ogiyan goꞌettiyoogaa bessees. Yaatiyoogee, issi uri neeyyo immido loꞌꞌiya maayuwaa baanaa quccanawu goꞌettiyoogaa mala
Neeni mittaa xeeraappe guppada kafodan paalla wodhanawu malikko, qohettanaagee attenna. ‘Intte giddon shaaramuxiyoogee mule siyettoppo’ yaagiyaagaa mala kandduwaa maaraa kaallennaageekka hegaadan qohiyaaba.—Efisoona 5:3.
He higgiyawu azazettennaagee ay kaalettii? Geeshsha Maxaafay, “SHaaramuxiyaagee ba bolli nagaraa oottees” yaagees. (1 Qoronttoosa 6:18) Hegee tumee?
Aqo oyqqennan hegaadan shori baynnabaa oottiya yelagatu bolli kaallidi deꞌiyaabaappe issoy woy hegaappe darobay gakkiyoogaa xannaꞌiyaageeti akeekidosona.
ZILꞌꞌETTIYOOGAA. Aqo oyqqennan asho gaytotettaa gayttiya daroti hegaappe simmidi zilꞌꞌettiyoogaa yootoosona.
AMMANETTENNAAGAA. Eti hegaadan gaytti simmidi, ‘A woy i hagaappe kase oonaara gayttadee woy gayttidee?’ giidi qoppoosona.
HIDOOTAA QANXXIYOOGAA. Daro macca naati, attuma laggeti eta qohiyaabaappe teqqanaadan koyoosonappe attin, bantta goꞌꞌawu giidi etakko shiiqanaadan koyokkona. Qassi daro attuma naati, issi yelageera bantta koyidobaa hani simmidi, o zaarettidi koyokkona.
Qoppana koshshiyaabaa: Aqo oyqqennan asho gaytotettaa gayttiyaaba gidikko, neeppe issi alꞌꞌobay haliyo gishshawu ne huuphiyaa karaasa. (Roome 1:24) Ne bollay alꞌꞌoba gidiyoogaa xaasayada xeelloppa!
‘Intte giddon shaaramuxiyoogee mule siyettoppo’ yaagiya azazuwaa azazettanawu murttidoogaa bessa. (Efisoona 5:3) Neeni aqo oyqqiyo wode, ne aqo laggiyaara gayttana danddayaasa. Aqo oyqqennan shori baynnabaa poliyaageetuugaappe dumma hanotan hirggennaaninne zilꞌꞌettennan ufayttana danddayaasa.—Leemiso 7:22, 23; 1 Qoronttoosa 7:3.
NE QOFAY AYBEE?
Nena tumuppe siiqiya uri asatettaaninne qofan nena qohanee?
Neeyyo tumuppe qoppiya uri Xoossaara deꞌiya dabbotaa mooriyaabaa neeni oottanaadan paaccanee?—Ibraawe 13:4.