Xoossay Halchchidoy Hagee?
AY GAAZEEXANNE nabbaba; televizhiine xeella; woykko eraadooniyaa ezgga; hegeeti ubbay keehi daro danoy, olaynne shabbirssay deꞌiyoogaa qonccissoosona! Ne bolli gakkiya metuwaakka qoppa. Ne siiqiyo asi harggiyoogee woykko hayqqidoogee, nena geella keehippe azzanttana danddayees. Neeyyookka geella, ‘Taani tuggan mattottaas’ giida loꞌꞌo bitaniyaa Iyyoobaagaadan siyettana danddayees.—Iyyooba 10:15.
Ane ne huuphiyaa:
▪ Xoossay taassinne hara asa ubbau halchchidoy hagee?
▪ Taani ta metuwaa xoona kiyanau maaduwaa awappe demmana danddayiyaanaa?
▪ Saꞌan sarotettay yin beꞌana wodee deꞌanee? yaagada oychcha.
Geeshsha Maxaafay ha oyshatussi aliya zaaruwaa immees.
GEESHSHA MAXAAFAY, XOOSSAY SAꞌAN HA LAAMIYAA EHAANAAGAA TAMAARISSEES
“Xoossai eta aifiyaappe afutta ubbaa quccana. Hagaappe sinttanau haiqoinne kayyoi woi waasoinne sahoi de7enna.”—Ajjuutaa 21:4
“Wobbeti genessadan guppana.” —Isiyaasa 35:6
“Qooqetu aifee dooyettana.”—Isiyaasa 35:5
“Duufuwan de7iyaageeti . . . duufuwaappe gaxi kiyana.”—Yohaannisa 5:28, 29
“Xiyoonen de7iya ooninne, ‘Taani harggais’ yaagenna.”—Isiyaasa 33:24
‘Biittan daro kattay mokkana.’—Mazamure 72:16
GEESHSHA MAXAAFAY TAMAARISSIYOOBAAPPE GOꞌꞌAA DEMMA
Aadhdhida sinttatun deꞌiyaabata coo amo xalla gaada aggaagoppa. Xoossay hegeeta ehanau qaalaa geliis; qassi Geeshsha Maxaafay i hegaa waatidi ehanaakko qonccissees.
SHin Geeshsha Maxaafay hegaappekka aadhdhiyaabaa yootees. Geeshsha Maxaafay, neeni ha wodiyankka tumuuppe ufayssiya duussaa deꞌana danddayiyo waannabaa yootees. Ane nena metiyaabaanne hirggissiyaabaa qoppa ekka. Hegeeti miishshaara, so asaa duussaa metuwaara, payyatettaa pacaara woykko siiqiyo asa hayquwaara gayttidabata gidana danddayoosona. Geeshsha Maxaafay, neeni ha wodiyankka gidin metuwaa xoonanaadan maaddana danddayees; qassi kaallidi deꞌiya oyshata milatiyaageetuyyo zaaruwaa immidi, nena woppissana danddayees:
▪ Nuuni aybissi tuggatiyoo?
▪ Deꞌuwan gakkiya hirggaa waatidi xooni kiyana danddayiyoo?
▪ Nu soo asay deꞌuwan kaseegaappe ufattiyaagaa gidanaadan waatana danddayiyoo?
▪ Nuuni hayqqiyo wode waaniyoo?
▪ Nuuni siiqiyo hayqqida asata zaarettidi beꞌana danddayiyoo?
▪ Xoossay sinttappe ehaanau qaalaa gelidobata polanaagaa waanidi ammanana danddayiyoo?
Neeni ha maxaafaa nabbabiyoogeekka, Geeshsha Maxaafay ay tamaarissiyaakko erananu koyiyoogaa bessees. Ha maxaafay nena maaddana. Menttoti deꞌiyo sinttan, oyshati tohossa baggaara deꞌiyoogaa akeeka. Miilooniyan qoodettiya asay Yihoowa Markkatuura Geeshsha Maxaafaa xannaꞌiyo wode, oyshaanne zaaruwaa goꞌettiyoogaa dosoosona. Neenikka hegaa dosanaagaa ammanettoos. Tumuppe Geeshsha Maxaafay tamaarissiyoobay aybakko neeni tamaariyo wode, he aliya timirttiyan ufayttaydda neeni Xoossaa anjjuwaa demmana mala amottoos!
[Sinttaa 7n diya saaxiniyaa]
NE BUZO GEESHSHA MAXAAFAA ERA
GEESHSHA MAXAAFAY 66n maxaafatanne kiitata oyqqiis. Hegeetikka kessanau metennaadan, shemppotuuninne paydotun shaahettidosona. Ha maxaafan xiqisee xaafettiyo wode, maxaafaa woykko kiitaa sunttaa kaallidi xaafettiya paydoy, shemppuwaa malaatees; qassi hegaa kaallidi xaafettiyaagee payduwaa malaatees. Leemisuwau, “2 Ximootiyoosa 3:16” giya xiqisee, Ximootiyoosassi xaafettida naaꞌꞌantto kiitaa, shemppo 3, paydo 16 giyoogaa.
Ha maxaafan deꞌiya xiqiseta kessa nabbabiyoogan, Geeshsha Maxaafaa sohuwaara meezetana danddayaasa. Hegaa bollan qassi, Geeshsha Maxaafaa ubba gallassi nabbabiyoogaa ayssi doommikkii? Heezzaappe biidi ichchashu shemppo gidiyaagaa galla galla nabbabikko, kumetta Geeshsha Maxaafaa issi layttan nabbaba wurssana danddayaasa.