Sabbakanau Gidaa Kunttidanaa?

1. Sabbakanau nuuyyo giday baynnabadan qoppana bessennay aybissee?

¹ Hegaa mala oyshay ne qofan merettiyaaba gidikko, hirggoppa! Haggaazanau nuuyyo giday deꞌanaadan oottiyay, nu timirtte xekkaa woykko yeletan demmido eraa gidenna. Beni wode erissiyo ashkkaratuppe issoti issoti “tamaaribeenna coo asa” geetettidosona. Gidikkokka, eti Yesuusa leemisuwaa kaallanau murttido gishshau, mishiraachuwaa muruta ogiyan sabbakidosona.—Oos. 4:13; 1 PHe. 2:21.

2. Yesuusi tamaarissido ogetuppe issoti issoti awugeetee?

² Yesuusi Tamaarissido Ogiyaa: A timirttee qoncce, tumanne akeekanau metennaagaa. I oychido oyshay, yootido leemisoynne haasayaa doommanau goꞌettido qoncce qofay, asay i yootiyoobaa ezgganaadan oottiis. (Maa. 6:26) I asau wozanappe qoppiyoogaa bessiis. (Maa. 14:14) Hegaa bollikka, Yihooway bana sunttidoogaanne bau imettida oosuwaa polanaadan maataa immidoogaa eriyo gishshau, Yesuusi ammanettidi, qassi alaafetettay deꞌiyo asadan tamaarissiis.—Luq. 4:18, 19.

3. Nu haggaazuwaa polanau Yihooway maaddiyoy ayba ogetuunee?

³ Yihooway Nuna Maaddees: Nu Gita Asttamaaree ba Qaalaanne ba dirijjitiyaa baggaara nuuni mishiraachuwaa muruta ogiyan sabbakanaadan loohissees. (Isi. 54:13) Yesuusi tamaarissido ogiyaa Yihooway xaafissido gishshau, hegaa akeekanaunne kaallanau danddayoos. Yihooway nuuyyo ba ayyaanaa immees; qassi gubaaꞌiyaa shiiqotun nuna loohissees. (Yoh. 14:26) Hegaa bollankka, nuuni haggaazuwan murutanaadan maaddiya, meezee deꞌiyo aassiyaageeta giigissiis.

4. Haratuyyo mishiraachuwaa yootanau nuuyyo giday deꞌiyoogee siyettiyoy aybissee?

⁴ Nu ‘danddayay Xoossaappe yiidaagaa’ gidiyo gishshau, sabbakanau nuuyyo giday deꞌiyoogee siyettanaadan oottiya mino gaasoy deꞌees. (2 Qor. 3:5) Nuuni Yihoowan zemppiyo wodenne ammanettidaageeta gididi, i siiquwan giigissidobaa loytti goꞌettiyo wode, “kumettanne lo77⁠o ooso ubbau” giigidaageeta gidoos.—2 Xim. 3:17.