Haggaaziya Kiristtaaneti Woossana Koshshees
1. Nu haggaazuwaa polanau koshshiyaabay aybee?
1 Haggaazuwaa nu wolqqan polana danddayokko. Nuuni he oosuwaa oottanaadan Yihooway wolqqaa immees. (Pili. 4:13, NW) Dorssan leemisettida asata nuuni demmanaadan maaddanau i ba kiitanchata goꞌettees. (Ajj. 14:6, 7) Nuuni tokkiyoonne haattaa ushshiyo tumaa puutee diccanaadan oottiyaagee Yihoowa. (1 Qor. 3:6, 9) Haggaaziya Kiristtaaneti saluwan deꞌiya nu Aawaakko woossiyoogan an ammanettiyoogee ay keena koshshiyaabee!
2. Woossana koshshiya allaalletuppe amaridaageeti awugeetee?
2 Nuuyyo: Nuuni sabbakiyo wode ubban woossana koshshees. (Efi. 6:18) Woossana koshshiya allaalletuppe amaridaageeti awugeetee? Haggaaziyo moottaa xeelliyaagan nuuyyo loꞌꞌo xeelay deꞌanaadaaninne xala gidanaadan woossana danddayoos. (Oos. 4:29) Geeshsha Maxaafaa xannaꞌissana danddayiyo ashkke asatukko nuna kaalettanaadan Yihoowa oychana danddayoos. Keettaaway nuna oyshaa oychiyo wode, suure zaaruwaa immanau maaddanaadan qantta woosan Yihoowa oychana danddayoos. (Nah. 2:4) Ubbatoo haggaazuwaa nu deꞌuwan kaseyanaadan, aadhida eratettaa immanaadankka oychana danddayoos. (Yaaq. 1:5) Hegaa bollankka, ayyo haggaaziyaageeta gidanaadan nuuyyo dumma maataa immido gishshau galatiyo wode Yihooway ufayttees.—Qol. 3:15.
3. Haratuyyo woossiyoogee sabbakiyo oosoy aakkanaadan waati maaddii?
3 Haratuyyo: Nuuni “issoi issuwaayyo,” ubba koshshiyo wode, nu mala Kiristtaanetu sunttaa xeesidi woossana koshshees. (Yaaq. 5:16; Oos. 12:5) Sabbakiyo oosuwan neeni koyiyoogaa keenaa oottennaadan payyatettaa pacay diggii? Yaatikko, payya gidida hara Kiristtaaneti loytti haggaazanaadan woossa. Ne woosay harata ay keena maaddiyaakko mule guuttada xeelloppa! Nu ishantti “sarotettaaninne ashkketettan de7ana mala,” deretettaa sunttati sabbakiyo oosuwaa loꞌꞌo ayfiyan xeellanaadan woossiyoogeekka bessiyaaba.—1 Xim. 2:1, 2.
4. Nuuni aggennan woossana koshshiyoy aybissee?
4 Saꞌan ubban mishiraachuwaa awaajjiyoogee nuuni nu wolqqan oottana danddayenna ooso. Nuuni aggennan ‘ubba wode Xoossaa woossiyaaba’ gidikko, Yihoowa maaduwan he oosuwaa polana danddayoos.—Roo. 12:12.