Haggaazo SHiiquwan Kifiliyaa SHiishshiyaageetussi Kaaletuwaa
Ha aginaa Nu Kawotetta Haggaazuwaappe doommidi, haggaazo shiiquwaa prograamee deexxenna ogiyan giigana. Kaallidi deꞌiya kaaletoynne akeekissoy, “Haggaazuwaa SHiquwau Giigettiyo Ogiyaa” giya huuphe yohuwan, Uddufune 2009 Nu Kawotetta Haggaazuwan kiyida qofaappe ekettidi giigidaagaanne qonccidaagaa.
◼ Haasayaa: Hagee imettida xuufiyan baasettidi ezggiyaageetuura tobbennan shiishshiyo haasayaa qonccissees. Haasayaa shiishshiyaagee gubaaꞌiyaa keehippe maaddiyaabaa qonccissana koshshees.
◼ Oyshaanne Zaaruwaa: Ha kifilee Wochiyo Keelaa Xinaatiyaara daroban issi mala gididi, haasayaa doommiyo wodenne wurssiyo wode keehi guutta qofaa immidi, ubba menttuwan oyshay oyshettees. Kifiliyaa shiishshiyaagee daro qofaa immana koshshenna. Wodee gidiyaaba gidikko waanna qofaa oyqqida xiqiseta nabbabana danddayettees. Nabbabanaadan kaaletuwan odettibeennabaa gidikko, menttoti nabbabettokkona.
◼ Tobbiyoogaa: Ha haasayay ezggiyaageetuppe amaridaageeti qofaa immiyoogan shiiqiya haasayaa. Muleera haasayan woykko muleera oysha-zaaruwan shiiqenna.
◼ Ootti-besuwaanne Oysha-zaaruwaa: Ootti-besuwan shiishshanaadan kaaletoy imettidaba gidikko, haasayaa shiishshiya ishay ootti-besuwaa shiishshiyaageeta giigissana koshshees; i ba huuphe ootti-besuwaa shiishshana koshshenna. I dooriyoogeeti loytti shiishshanau giday deꞌiyoogeetanne leemiso gidiyaageeta gidana koshshees; qassi danddayettiyaaba gidikko, kasetidi etaara loyttidi giigettana koshshees. Oorattatinne meezee baynnaageeti madirakiyaa kiyiyo injjiyaa demmanaadan giidi, ootti-besuwaa shiishshanaadan oottennaagee loꞌꞌo; shin haasayissiyo ura gidanaadan issota issota goꞌettana danddayettees. Ootti-besuwaa shiishshiyaageeti bantta sinttaa ezggiya asaakko zaarana koshshees. Oysha-zaaroy deꞌiyoogeeti uttido sohuwan gidennan, madirakiyan eqqidi bantta qofaa yootana bessees. Ootti-besuwaanne oysha-zaaruwaa shiishshiyo ogiyaa kasetidi beꞌana koshshees. Shiiquwaa saatee wuriiddi deꞌiyaaba gidikko, ishay haasayaa qanttana koshsheesippe attin, ootti-besuwaa woykko oysha-zaaruwaa aggana koshshenna. Gubaaꞌiyau oottiyaageeti ootti-besuwan woykko oysha-zaaruwan shaahettiyaageeta dooranaappe kase, cimata shiishshiyaagaa woykko hara cimaa, oona dooriyaakko loꞌꞌokko oychana koshshees.
Issi kifiliyau dumma kaaletoy deꞌikko, hegaa akeekan kaallana koshshees. Haggaazo SHiiquwaa qommoora qonccidaagaadan shiishshiyoogan, ishati Haggaazo SHiiqoy “wogaaninne maaran” shiiqanaadan oottoosona.—1 Qor. 14:40.