Away Wullennan Takkiis

YAASA beꞌa. I: ‘Awau wullennan taakka!’ yaagiiddi deꞌees. Awaykka wullennan takkiis. Away kumetta gallassaa saluwau giddo ginan takkiis. Hegee hananaadan oottiday Yihoowa. SHin away wullennan takkanaadan Yaasu koyidoy aybissakko ane beꞌoos.

He ichchashu iita Kanaane kawoti Gabaaꞌoonatuura olettiyoogaa doommin, Gabaaꞌoonati maaduwaa demmanau issi bitaniyaa Yaasukko kiittidosona. Bitanee: ‘Eesuwan nuukko ya! Nuna ashsha! Gezze biittan deꞌiya kawoti ubbay ne ashkkarata olanau yi uttidosona’ yaagiis.

Yaasunne a olanchchati ubbay sohuwaara denddidi biidosona. Kumetta qammaa hemettidosona. Eti Gabaaꞌoona gakkin, he ichchashu kawotu wotaaddarati yayyidi, baqatiyoogaa doommidosona. Hegaappe Yihooway wolqqaama shachchaa saluwaappe bukissin, Yaasu olanchchati worido wotaaddaratuppe shachchay woridoogeeti daridosona.

Away gamꞌꞌennan wullanagaa Yaasu eriis. Qammiyo wode, he iita ichchashu kawotu wotaaddaratuppe daroti baqatana. Yaatin Yaasu Yihoowakko woossi simmidi: ‘Awau, wullennan takka!’ yaagidoy hegaassa. Away wullennan takkiyaaba gidikko, Israaꞌeeleti olan wurssi xoonana danddayoosona.

Xoossaa asaa ixxiya hara daro iita kawoti Kanaanen deꞌoosona. Yaasunne a olanchchati he biittan deꞌiya 31 kawota xoonanau, usuppun laytta gidiyaagaa ekkiis. Hegee hani simmin, Yaasu gadee biron imettana koshshiyo zaretuyyo Kanaane biittaa shaakki immanau deꞌees.

Daro layttay aadhdhi simmin, wurssettan Yaasu 110⁠u layttan hayqqiis. Inne a laggeti deꞌido wode ubban, asay Yihoowayyo azazettiis. SHin ha loꞌꞌo asati hayqqin, asay iitabaa oottiyoogaa doommidi metuwan geliis. Xoossaa maadoy eta tumuppe koshshidoy he wodiyaana.