Naaꞌꞌu Xala Maccaasata

ISRAAꞌEELETI metuwan geliyo wodiyan, Yihoowakko waassoosona. Yihooway eta kaaletti maaddiya asata immiyoogan zaaruwaa immees. Geeshsha Maxaafay he asata daannata yaagi xeesees. Koyro daannay Yaasa; appe kaallidi denddidaageetuppe amaridaageeti Otiniꞌeela, Ehuudanne SHamggaara. SHin Israaꞌeeleta maaddida asatuppe naaꞌꞌati, Debooronne Yaaꞌeelo geetettiyaa maccaasata.

Deboora hananabaa yootiyaaro. Yihooway wodeppe hananabaa issi erissin, hegaappe a asaassi Yihooway giidobaa yootausu. Hegaa bollan qassi, Deboora daanna. A gezze biitan issi zambbaa garssan uttausu; yaatin asay ba metuwaappe kiyanau maaduwaa demmanau ikko yees.

He wode Kanaane kawoy Yaabina. Ayyo 900⁠u ola para gaareti deꞌoosona. A olanchchati keehi wolqqaama gididoogaappe denddidaagan, Israaꞌeeletuppe darota wolqqan ba ashkkara oottiis. Kawuwaa Yaabina olanchchatu halaqay Sisaara.

Issi gallassi Deboora Daannaa Baaraaqqakko: ‘Yihooway yaagees: “Taaboora Deriyaa 10,000⁠u asaa ekkada kiya. Taani Sisaara neekko he sohuwaa ehaana. Neeni anne a olanchchata xoonanaadan taani oottana”’ yaagada kiittaasu.

Baraaqi Deboorissi: ‘Taani, ne tanaara biikko baana’ yaagiis. Deboora aara baasu; shin a Baaraaqayyo: ‘Yihooway Sisaara macca asa kushiyan aatti immana; hegaa gishshau, xoonoy neessa gidenna’ yaagaasu. Hanidabaykka hegaa.

Baraaqi Sisaara wotaaddaratuura gayttanau, Taaboora Deriyaappe duge wodhdhiis. Eti qoppennan Yihooway diꞌuwaa yeddin, wotaaddaratuppe daroti muuketti aggidosona. SHin Sisaari ba para gaariyaappe wodhdhidi woxxi baqatiis.

Guuttaa takkidi, Sisaari Yaaꞌeeli dunkkaaniyaakko gakkiis. A i gelanaadan shoobbada ayyo maattaa immaasu. Hegee i xiskkanaadan oottin, xiskkuwan kayri bayiis. Hegaappe Yaaꞌeela dunkkaaniyaa xishiyaa ekkada he iita bitaniyaa huuphiyan xisha aggaasu. Guyyeppe Baraaqi yin, Sisaari hayqqidaagaa assi bessaasu! Yaatiyo gishshau, Deboora giidoogee polettidoogaa beꞌana danddayaasa.

Wurssettan Kawuwaa Yaabinikka hayqqin, Israaꞌeeleti wodhdhi eqqidi guutta wodiyau saruwaa demmidosona.