Urutonne Naaꞌoomo

GEESHSHA MAXAAFAN Uruto geetettiya maxaafaa demmaasa. He maxaafay Israaꞌeele biittaa, daannati ayssiyo wode deꞌida issi keettaa asaa taarikiyaa yootees. Uruta Mooꞌaaba biittappe yiida yelaga maccaasa; a Xoossaa asa gidida Israaꞌeele zare gidukku. SHin Uruta tumu Xoossaa Yihoowabaa tamaarada, Yihoowa keehippe siiqiya asa gidaasu. Naaꞌooma Uruta Yihoowabaa tamaaranaadan maaddida cima maccaasa.

Naaꞌooma Israaꞌeele biitta maccaasa. Naaꞌooma, i keettaawaynne i naaꞌꞌu attuma naati, Israaꞌeele biittan namisay gelin, Mooꞌaaba biitti deꞌanau biidosona. Hegaappe, issi gallassi Naaꞌoomi azinay hayqqiis. Takkidi Naaꞌoomi naaꞌꞌu naati Urutonne Orppo geetettiya Mooꞌaaba biittaa macca naata ekkidosona. Hegaappe 10⁠u laytta gidiyaagaa takkidi, Naaꞌoomi naaꞌꞌu naati hayqqidosona. Naaꞌoomanne he naaꞌꞌu macca naati ay keenaa azzanidonaasha! Naaꞌooma haꞌꞌi waananau deꞌay?

Naaꞌooma issi gallassi ba asaakko guyye haaho biitti simmanau qofaa qachchaasu. Urutanne Orppa iira deꞌanau koyido gishshau, etikka iira baanau denddidosona. SHin eti guutta ogiyaa bi simmin, Naaꞌooma naatukko simmada: ‘Guyye intte soo simmi biidi intte aayetuura deꞌite’ yaagaasu.

Naaꞌooma he macca naata saro deꞌite gaada yeraasu. Eti Naaꞌoomo keehippe siiqiyo gishshau, yeehuwaa doommidosona. Eti: ‘CHii! Nuuni nenaara ne asaakko baana’ yaagidosona. SHin naaꞌooma: ‘Hay ta naatoo, simmite. Intte intte son deꞌiyoogee inttessi loꞌꞌo’ yaagaasu. Yaatin Orppa simmada guyye biyoogaa doommaasu. SHin Uruta simmabeykku.

Naaꞌooma ikko simmada: ‘Orppa baychchaasu. Neenikka iira ba’ yaagaasu. SHin Uruta: ‘Neeppe shaahettanaadan tana waayissooppa! Taani nenaara baana. Taani neeni biyoosaa baana; neeni deꞌiyosan deꞌana. Ne asay ta asa gidana; qassi ne Xoossay ta Xoossa gidana. Ne hayqqiyoosan taani hayqqana; qassi ta moogettanaykka yaana’ yaagaasu. Uruta hegaadan gin, Naaꞌooma o guyye simmanaadan zaarettada waayissabuukku.

Wurssettan he naaꞌꞌu maccaasati Israaꞌeele biitti gakkidosona. Yan deꞌiyoogaa doommidosona. Eti gakkidoy banggaa cakkiyo wode gidiyo gishshau, Uruta sohuwaarakka bangga gadetun oottiyoogaa doommaasu. Booꞌeeza giyo bitanee ba gadiyaappe a banggaa shiishshanaadan oottiis. Booꞌeeza aayyiyaa oonakko eray? A Yarkko katamaa maccaasiyo Raꞌaabo.

Issi gallassi Booꞌeezi Urutiyyo: ‘Neeni Naaꞌoomiyyo ay keena kehidaakko, taani nebaa ubbabaa siyaas. Neeni ne aawaanne ne aayyiyo qassi ne biittaa aggada, kase ne erenna asaara deꞌanau waanada yiidakko erayis. Yihooway neeyyo keho!’ yaagiis.

Uruta: ‘Ta godau, neeni taayyo daro kehadasa. Taayyo kehabaa haasayada, tana minttettadasa’ yaagada zaaraasu. Booꞌeezi Uruto keehippe dosiisinne gamꞌꞌennan o machchiis. Hegee Naaꞌoomo ayba ufayssidee! SHin Naaꞌooma hegaappekka aaruwaa ufayttidoy, Urutanne Booꞌeezi bantta koyro naꞌaa Yoobeeda yelido wode. Guyyeppe Yobeedi Daawita aawaa aawa gidiis. Nuuni takkidi Daawitabaa darobaa tamaarana.