Kawotettay Shaahettiis

A BITANEE ba maayuwaa ayssi pooshshiyaakko eray? Hegaadan i oottana mala Yihooway yootiis. He bitanee Akiiya geetettiya Xoossay kiittin hananabaa yootiyaagaa. Hananabaa yootiyaagee aybakko eray? I sinttappe hanana deꞌiyaabaa kasetidi Xoossay assi yootiyo asa.

Hagan Akiiyi Iyorbbaamassi odiiddi deꞌees. Iyorbbaami, Solomoni ba keexxiyo oosotuppe amaridaageetu bolli sunttido asa. Akiiyi hagan ogiyan Iyorbbaamaara gayttidi, issi oorattabaa oottiis. I ba maayido ooratta maayuwaa qaaridi, 12 kessidi pooshshiis. I Iyorbbaama: ‘Tammu pooshota neeyyo ekka’ yaagiis. Akiiyi Iyorbbaamassi 10u pooshota aybissi immidaakko eray?

Yihooway Solomonappe a kawotettaa ekkanaagaa Akiiyi qonccissiis. Yihooway 10u zareta Iyorbbaamassi immanaagaa Akiiyi yootiis. Hegaa giyoogee, Solomona naꞌaa Robiꞌaami haaranau naaꞌꞌu zaretu xallay attees yaagiyoogaa.

Akiiyi Iyorbbaamassi yootidobaa Solomoni siyidi, keehippe yiillotiis. I Iyorbbaama woranau koyiis. SHin Iyorbbaami Gibxxe biitti baqatiis. Guutta wodeppe guyyiyan Solomoni hayqqiis. I 40u layttaa kawotiis; shin haꞌꞌi a naꞌaa Robiꞌaami kawo gidiis. Iyorbbaami Gibxxen deꞌiiddi Solomoni hayqqidoogaa siyidi, Israaꞌeele biitti simmidi yiis.

Robiꞌaami loꞌꞌo kawo gidenna. I ubba ba aawaa Solomonappekka aadhdhidi asaassi iitiis. Iyorbbaaminne amarida hara erettida asati Kawuwaa Robiꞌaamakko biidi, asaassi kehanaadan a oychchidosona. SHin Robiꞌaami siyennan ixxiis. Ubba i kaseegaappekka aattidi yaa iitiis. Yaatiyo gishshau, asay Iyorbbaama 10u zaretu bolli kawoyidosona; shin Biniyaamanne Yihudaa zareti naaꞌꞌay Robiꞌaami bantta kawo gididi takkanaadan oottidosona.

Iyorbbaami ba asay Yerusalaame Yihoowa beeta maqidasiyaa biidi goynnanaadan koyibeenna. Hegaa gishshau, naaꞌꞌu marata worqqaappe medhdhidi, 10u zaretu kawotettaa asay he maratussi goynnanaadan oottiis. Gamꞌꞌennan biittay danuwaaninne makkalan kumiis.

Naaꞌꞌu zaretu kawotettankka metoy deꞌees. Robiꞌaami kawotoosappe ichchashu laytta kumennan, Gibxxe kawoy Yerusalaame olanau yiis. I Yihoowa beeta maqidasiyaappe daro buquraa ekki efiis. Yaatiyo gishshau, beeta maqidasee keexettido wodeegaadan takkidoy guutta wode xalaalaassa.