Hayquwaappe Denddida Naaꞌꞌu Naata

EENI hayqqada hayquwaappe denddiyaakko, ne aayeyyo aybi siyttaneeshsha? A keehippe ufayttana! SHin hayqqida asi hayquwaappe denddana danddayii? Hegaa malabi hani erii?

Hagan deꞌiya bitaniyaa, maccaasiyoonne guutta naꞌaa beꞌa. Bitanee hananabaa yootiya Eelaasa. Maccaasiyaa Siraafita kataman deꞌiya amꞌꞌiyo; naꞌay qassi i naꞌaa. Issi gallassi naꞌay sahettiis. Ayyo harggee goobi goobi biin wurssettan hayqqi bayiis. Yaatin Eelaasi maccaasiyo: ‘Naꞌaa tayyo hamma’ yaagiis.

Eelaasi hayqqida naꞌaa pude pooqiyaa ekki efiidi arssan zinꞌꞌissiis. Hegaappe: ‘Abeet Yihoowau, ha naꞌay hayquwaappe denddanaadan ootta’ yaagidi woossiis. Hegaappe naꞌay shemppiyoogaa doommiis! Yaatin Eelaasi naꞌaa pooqiyaappe duge wottidi maccaasiyo: ‘Beꞌa, ne naꞌay paxiis!’ yaagiis. Naꞌaa aayyiyaa keehippe ufayttidoy hegaassa.

Yihooway kiittin hananabaa yootiya hara erettida asi Elssaaꞌa. I Eelaasa maaddiyaagaa gididi oottiis. SHin takkidi Yihooway maalaalissiyaaba oottanau Elssaaꞌakka goꞌettiis. Issi gallassi Elssaaꞌi baassi daro kehabaa oottida maccaasiyaa deꞌiyo SHuneema katamaa biis. Guyyeppe he maccaasiyaa attuma naꞌaa yelaasu.

Naꞌay diccidi, issi gallassi maallado gaden oottiya ba aawaakko biis. Qoppennan naꞌay: ‘Woo ta huuphiyau!’ yaagidi waassiis. Soo efi simmin naꞌay hayqqiis. A aayyiyaa ayba azzanadeeshsha! Sohuwaara baada Elsaaꞌa ekkada yaasu.

Elssaaꞌi yi gakkidi, hayqqida naꞌay deꞌiyo kifiliyaa geliis. I Yihoowakko woossidi hayqqida naꞌaa bolli zinꞌꞌiis. Sohuwaarakka naꞌaa bollay hoꞌꞌin, naꞌay laapputoo hedhdhishiis. Naꞌaa aayyiyaa kifiliyaa geliyo wode, i naꞌay paxidaagaa beꞌada ay keenaa ufayttadeeshsha!

Keehi daro asay hayqqiis. Hegee eta soo asaanne eta laggeta keehippe azzanttiis. Hayqqida asaa denttanau nuuyyo wolqqi baawa. SHin Yihoowayyo he wolqqay deꞌees. Takkidi Yihooway daro miilooniyan qoodettiya asaa hayquwaappe deꞌuwau waati ehaanaakko tamaarana.