Baabiloonen Deꞌiya Oyddu Naata

KAWUWAA Naabukadanaxoori Xoqqa timirttiyaa tamaarida Israaꞌeeleta ubbaa Baabiloone ekki efiis. Hegaappe kawoy eta giddoppe meraaninne eran aadhdhiyaa yelaga naata dooriis. Hegeetuppe oyddati hagan neeni beꞌiyoogeeta. Issoy Daaneela, hara heezzati qassi Sidiraaqa, Misaaqanne Abddinaaga yaagidi Baabilooneti xeegiyoogeeta.

Naabukadanaxoori ha yelaga attuma naati ba kawo keettan oottanaadan loohissana koyiis. Heezzu layttaa loohissoogaappe guyyiyan, keehippe eranchcha gididaageeta, metuwaappe kiyiyo hayyuwaa immiyoogan bana maaddanaadan dooranau deꞌees. He yelagati tamaariyo wodiyan, minonne payya gidana mala kawoy koyiis. Yaatiyo gishshau, ba ashkkarati eta ubbaassi, inne a soo asay miyogaanne uyiyoogaa mala loꞌꞌo qumaanne eessaa immana mala azaziis.

Yelaga Daaneela beꞌa. Naabukadanaxoora ashkkaratu halaqaa Ashifanaazassi i woygiiddi deꞌiyaakko eray? Daaneeli kawuwaassi giigiyaagaa mala loꞌꞌo qumaa maanau koyennaagaa ayyo yootiiddi deꞌees. SHin Ashifanaazi hirggiis. I: ‘Intte maanabaanne uyanabaa kawoy azazi wottiis. Intte hara yelaga naatuppe gilqqi beettikko, i tana worana’ yaagiis.

Yaatin, Daaneeli bananne ba heezzu laggeta naagana mala Ashifanaazi hadaraa immido bitaniyaakko biis. Biidi: ‘Hayyana 10u gallassatun nuna paacca. Nuuyyo maanau amarida ataakilttiyaanne uyanau haattaa imma. Hegaappe, kawuwaa qumaa miya yelaga asatu somꞌꞌuwaanne nu somꞌꞌuwaa xeellada ooni loꞌꞌokko beꞌa’ yaagiis.

Eta naagiyaagee hegan mayiis. Tammu gallassa gidin, Daaneelinne a laggeti heezzati, hara yelagatu ubbaappekka payyidinne loꞌꞌidi beettidosona. Yaatiyo gishshau, eta naagiyaagee eti kawuwaa qumaa aggidi ataakilttiyaa maanaadan eeno yaagiis.

Heezzantta layttaa wurssettan yelaga naati ubbay Naabukadanaxoorakko shiiqidosona. Eta ubbaa haasayissidoogaappe guyyiyan, Daaneelinne a heezzu laggeti eta ubbaappekka eranchcha gidiyoogaa kawoy akeekiis. Yaatiyo gishshau, kawo keettan bana maaddanaadan eta wottiis. Kawoy awudenne gidin oychchiyo oyshatanne metiya yohota zaariyoogan Daaneeli, Sidiraaqi, Misaaqinne Abddinaagoy a qeesetuppenne eranchchatuppe 10u kushiyaa aadhdhidosona.