Yerusalaamee Xayiis

KAWUWAA Naabukadanaxoori xoqqa timirttiyaa tamaarida Israa⁠ꞌeeleta ubbaa Baabiloone efoosappe 10u layttappe dariyaagee aadhdhiis. Haꞌꞌi aybi haniiddi deꞌiyaakko beꞌa! Yerusalaamee taman xuugettiiddi deꞌees. Hayquwaappe attida Israaꞌeeleti qassi qashuwau Baabiloonee biiddi deꞌoosona.

Asay bantta iita ogiyaappe simmana xaykko, hananabaa yootiya Yihoowa asati gakkana giidoobay hagaa gidiyoogaa akeeka. SHin Israa⁠ꞌeeleti hananabaa yootiyaageeti giidobaa siyibookkona. Eti Yihoowa aggidi eeqatussi goynniyoogaa aggibookkona. Yaatiyo gishshau, asay qaxxayettana bessees. Hegaa nuuni erana danddayidoy, Xoossay kiittin hananabaa yootiya Hizqqeeli Israaꞌeeleti he wode oottiyo iitabaa yootido gishshataassa.

Hizqqeeli oonakko eray? Yerusalaame gakkida ha wolqqaama bashshaappe 10u layttaa kasetidi, Kawuwaa Naabukadanaxoori Baabiloone efiido yelaga naatuppe i issuwaa. Daaneelinne a heezzu laggeti Sidiraaqi, Misaaqinne Abddanaagoy Baabiloone biidoy aara issi wodiyaana.

Hizqqeeli Baabiloonen deꞌiyaaba gidikkokka, Yihooway Yerusalaamen deꞌiya beeta maqidasiyan ayba iitabay hanettiiddi deꞌiyaakko a bessiis. Yihooway hegaa oottidoy maalaalissiyaa ogiyaana. Hizqqeeli Baabiloonen deꞌiyoogee qoncce; shin Yihooway beeta maqidasiyan hanettiiddi deꞌiyaabaa ubbabaa a bessiis. Hizqqeeli beꞌidobay keehippe daganttiyaaba!

Yihooway Hizqqeelayyo: ‘Asay ha beeta maqidasiyan oottiyo sheneyiyaabaa beꞌa. SHooshshatunne hara doꞌatu misiliyan goday kumidaagaa beꞌa. Israaꞌeeleti qassi etassi goynniyaageeta beꞌa!’ yaagiis. Hizqqeeli he ubbabaa beꞌiisinne hanettiyaabaa ubbaa xaafiis.

Yihooway Hizqqeela: ‘Israaꞌeele asaa kaalettiyaageeti geeman ay oottiyaakko beꞌay?’ yaagidi oychchiis. Ee, i hegaakka beꞌiis. Hegan 70u attuma asay deꞌees; eti ubbaykka eeqatuyyo goynniiddi deꞌoosona. Eti: ‘Yihooway nuna beꞌenna. I ha biittaa aggiis’ yaagoosona.

Hegaappe Yihooway beeta maqidasiyau huuphessa bagga penggiyan deꞌiya amarida maccaasata Hizqqeela bessiis. Eti yan uttidi eeqa xoossaa Tamuuzayyo goynnoosona. Yihoowa beeta maqidasiyaa geliyoosan deꞌiya he attuma asatakka beꞌa! Eta qooday 25 gidana. Hizqqeeli eta ­beꞌiis. Eti away kiyiyo baggi simmidi awaassi goynnoosona!

Yihooway: ‘Ha asati tana bonchchokkona. Eti iitabaa oottiyoogaa xalla gidennan, yiidi hegaa ta beeta maqidase giddon oottoosona!’ yaagiis. Hegaa gishshau, Yihooway: ‘Eti ta suulo hanqquwaa beꞌana. Taanikka eti xayiyo wode qarettikke’ yaagidi caaqqiis.

Israaꞌeeleti Kawuwaa Naabukadanaxoora bolli makkalidoy, Yihooway Hizqqeelassi hagaa bessi simmin, mexi heezzu laytta gidiyaagee aadhdhiina. Yaatin, i etaara olettanau biis. Issi layttanne baggaappe guyyiyan, Baabilooneti Yerusalaame dirssaa gimbbiyaa mentti gelidi katamaa taman xuuggi xayssidosona. Asaappe dariyaagee woy hayqqiis woy omooddettidi Baabiloone biis.

Israaꞌeeletu bolli hagaa mala iita bashshay gakkanaadan Yihooway oottidoy aybissee? Ee, eti Yihoowa siyibeennanne a higgiyaukka azazettibeenna gishshataassa. Hagee, nuuni oottanaadan Xoossay odiyobaa ubbatoo oottiyoogee ay keena koshshiyaabakko bessees.

Koyro heeran Israaꞌeele biittan deꞌanaadan wottido asati keehi guutta. Kawuwaa Naabukadanaxoori Gadaaliyaa geetettiya issi Ayhuda bitaniyaa he asatu bolli sunttiis. SHin amarida Israaꞌeeleti Gadaaliyaa woridosona. Haꞌꞌi asay hegaa mala iitabay hanido gishshau, Baabilooneti yiidi banttana ubbaa xayssoosona yaagidi yayyidosona. Yaatiyo gishshau, eti wolqqan Ermmaasakka banttanaara ekkidi Gibxxe betidosona.

Hegaappe denddidaagan, Israaꞌeele biittay ay asinne baynnasa gidiis. He biittan 70u layttau ayba asinne deꞌibeenna. Biittay muleera asi baynnasa kiyiis. SHin Yihooway 70u layttappe guyyiyan, ba asaa zaaridi he biitti ehaanau qaalaa geliis. Hegee hegaadan deꞌishin, Baabiloone biitti efiido Xoossaa asay yan waaniiddi deꞌiyoonaa? Ane beꞌoos.