Godaa Bolli Kushiyan Xaafettidabaa

HAGAN hanettiiddi deꞌiyaabay aybee? Asay gita gibiran miiddinne uyiiddi deꞌees. Baabiloone kawoy erettida issi shꞌau imattata shoobbiis. Eti Yerusalaamen deꞌiya Yihoowa beeta maqidasiyaappe yiida, worqqaappenne biraappe oosettida wanccatuuninne saynetun goꞌettiiddi deꞌoosona. SHin asa kushe biradhdheti qoppennan auppekko kiyidi, godaa bolli xaafiyoogaa doommidosona. Asay ubbay keehippe yayyiis.

Naabaukadanaxoora naꞌaa naꞌa gidida Belshshaaxaari he wode kawo. I ba qaalaa xoqqu oottidi, ba eranchcha asata baakko ehaanaadan yootiis. Kawoy: ‘Ha xifatiyaa nabbabidi, a birshshettaa tau yootiya uri ooninne, daro imotaa ekkananne ta kawotettan haariya aadhdhida maatay deꞌiyoogeetuppe heezzantto asa gidana’ yaagiis. SHin eranchchatuppe issoynne godaa bolli deꞌiya xifatiyaa nabbabanaunne a birshshettaakka yootanau danddayibeenna.

Kawuwaa aayyiyaa wocamaa siyada qumaa miyo he gita kifiliyaa yaasu. A kawuwaassi: ‘Hayyanaa keehi dagammoppa. Ne kawotettaa giddon geeshsha xoossata eriya issi asi deꞌees. Ne aawaa aaway Naabukadanaxoori kawo gididi deꞌiyo wode, ba eranchchatu ubbaa bolli a halaqa oottiis. A sunttay Daaneela. Kiittada a ehiissikko, i neessi ha ubbabaa birshshettaa yootana’ yaagaasu.

Yaatin Daaneela sohuwaara ehiidosona. Ayba imotakka gidin ekkennaagaa Daaneeli odi simmidi, Yihooway Balshshaaxaara aawaa aawaa Naabukadanaxoora issi wode kawo gididi deꞌiyoogaappe ayssi wottidaakko yootiyoogaa doommiis. Daaneeli: ‘I keehippe otorettiis. Yaatin Yihooway a qaxxayiis’ yaagiis.

Daaneeli Belshshaxaarassi: ‘SHin neeni a bolli gakkidabaa ubbaa eraydda, Nabukadanaxooraagaadan otorettadassa. Neeni Yihoowa beeta maqidasiyaappe yiida wanccatanne sayneta ehiissada etan goꞌettadasa. Qassi mittaappenne shuchchaappe oosettida xoossata galatada, Medhdhida Gita Xoossaa bonchchabaakka. Xoossay ha qaalata xaafanaadan he kushiyaa kiittidoy hegaassa.

Daaneeli: ‘Xifateekka, MANE, MANE, TAQEEL, UUFARSSIN yaagiyaagaa’ yaagiis.

‘MANEE giyoogee Xoossay ne kawotaa layttaa qoodidi, wuranaadan oottiis giyoogaa. TAQEEL giyoogee meezaanan mazzanettada, kauyyada beettadasa giyoogaa. PAREES giyoogee ne kawotettay shaahettidi, Meedoonatuyyoonne Parssetuyyo imettiis giyoogaa’ yaagiis.

Ubba Daaneeli hegaa yootiiddi de⁠ꞌishin, Parssetinne Meedooneti Baabiloonetu bolli qohuwaa gattiyoogaa doommidosona. Eti katamaa oyqqidi Belshshaxaara woridosona. Godaa bolli kushiyan xaafetidabay he qamman poletti aggiis! SHin Israaꞌeeleti haꞌꞌi waananau deꞌiyoonaa? Hegaa takkennan tamaarana; shin kasetidi Daaneeli waanidaakko ane beꞌoos.