Issi Kiitanchchay Mayraamikko Yiis

HA LOꞌꞌIYA maccaasiyaa Mayraamo. A Naazireete kataman deꞌiya Israaꞌeele asa. A keehippe loꞌꞌo asa gidiyoogaa Xoossay erees. O haasayissana mala i ba kiitanchchaa Gabreela kiittidoy hegaassa. Gabreeli Mayraamissi ay odanau yiidaakko eray? Ane beꞌoos.

Gabreeli iyyo: ‘Daro anjjettidaaree, saro; Yihooway nenaara deꞌees’ yaagiis. Mayraama he bitaniyaa kase mule beꞌa erukku. I woygiyaakko a erabeenna gishshau dagammaasu. SHin sohuwaara Gabreeli o minttettiis.

I: ‘Mayraamee yayyoppa. Yihooway nenan keehi ufayttiis. I issi garamissiyaabaa neessi oottana haniyoy hegaassa. Neeni mata wode naꞌa yelada, a Yesuusa yaagada sunttana’ yaagiis.

Gabreeli gujji qonccissiiddi: ‘He naꞌay gita gidana; qassi Ubbaappe Bolla Xoossaa Naꞌa geetettana. Yihooway a Daawitaagaadan kawo oottana. SHin Yesuusi merinau kawotana; a kawotettau mulekka wurssetti baawa!’ yaagiis.

Mayraama: ‘Ha ubbabay waani hananee? Ta ubba gelannebeykke. Taani attuma asaara deꞌa erikke; yaatin, waanada naꞌa yelana danddayiyaanaa?’ yaagada oychchaasu.

Gabreeli: ‘Xoossaa wolqqay ne bolli gidana. Hegaa gishshau, naꞌay Xoossaa Naꞌaa geetettana’ yaagidi zaariis. Hegaappe i Mayraamiyyo: ‘Ne dabbiyo Elssaabeexo hassaya. Asay kase a keehippe cimido gishshau, naꞌa yelanau danddayukku yaagees. SHin haꞌꞌi mata wode a naꞌa yelana. Yaatiyo gishshau, beꞌa; Xoossay oottana danddayennabi baawa’ yaagiis.

Sohuwaarakka Mayraama: ‘Taani Yihoowa aylliyo! Ne giidoogaadan, taassi hano’ yaagaasu. Hegaappe kiitanchchay biis.

Mayraama eesuwaara Elssaabeexo oychchanau baasu. Elssaabeexa Mayraami sarotaa siyido wode, i uluwan deꞌiya naꞌay ufayssan qaaxxiis. Elssaabeexin Xoossaa ayyaanay kumin, Mayraamo: ‘Neeni maccaasa ubbaappe dummatada anjjettidaaro’ yaagaasu. Mayraama Elssaabeexi matan heezzu agina gidiyaagaa takkada, Naazireete ba soo simmaasu.

Mayraama Yooseefa giyo bitaniyaa gelanau giiga uttaasu. SHin Yooseefi Mayraama shahaara gidiyoogaa eridi, o ekkennan aggi bayanau qoppiis. Yaatin Xoossaa kiitanchchay ayyo: ‘Mayraamo neessi machcho oottada ekkanau yayyoppa. Iyyo naꞌa immidaagee Xoossaa’ yaagiis. Hegaa gishshau, Yooseefi Mayraamo ekkiis; yaatidi eti Yesuusi yelettanaagaa naagidosona.