Yihoowa Markkata—Mishiraachuwaa Yootanau Giigettidaageeta

Yihoowa Markkati giigettidi 100ppe dariya layttau mishiraachuwaa yootiiddi takkidosona. Alamiyan hagaappe kase hani erenna wolqqaama sibikate zamachan, ha kiitaa daro xeetan qoodettiya qaalan, 230ppe dariya biittan sabbakiiddi deꞌoos. (Maa. 24:14) Ha oosoy keehippe koshshiyaaba gididoy aybissee? Hagee alame yuushuwan oosettiiddi deꞌiyoy ayba ogiyaanee? Yihoowa Markkata—Mishiraachuwaa Yootanau Giigettidaageeta giya biidoy, alame yuushuwan oosettiya nu oosuwaabaa loytti qonccissiyoogan he oyshata zaarees. He biiduwaa beꞌi simmidi, kaallidi deꞌiya oyshata zaarite.

Ha biidoy intte kaallidi deꞌiyaabata akeekanaadaaninne kaseegaappe aaruwan nashshanaadan oottidoy ayba ogiyaanee? (1) Yihoowa dirijjitee mishiraachuwaa yootanau oottiyoobaa, (2 Xim. 4:2) (2) alame yuushuwan deꞌiya Beeteele keettaa asaa, (3) misoonaawetanne bollaara xeelliyaageeta loohissiyoogaa, (2 Xim. 2:2) (4) Geeshsha Maxaafaappe issi xiqisiyaa galla galla pilggiyoogan doommiyoogaa, qassi ubba saaminttan gubaaꞌe shiiquwau giigettiyoogee demissiyo goꞌꞌaa, (Oos. 17:11) (5) Kiristtaane shiiqotun beettiyoogaa goꞌꞌaa, (Ibr. 10:24, 25) (6) saꞌay Gannate gidiyo wode intte demmana anjjuwaabaa, (Isi. 11:9) (7) oosettiiddi deꞌiya cahaa oosuwan intte oottiyo maataa—Yoh. 4:35.

Ha biidoy alame yuushuwan Yihoowa Markkati oottiiddi deꞌiyo oosuwaa oorattati eranaadan keehippe maaddees. (8) Nuuni Geeshsha Maxaafaa xannaꞌissiyoogeeta, nu dabbotanne harata ha biiduwaa awude bessiyaakko loꞌꞌoo? (9) Intte hegaa bessiyo wode asay ayba loꞌꞌo zaaro immidee?

Yihooway oottiiddi deꞌiyoobaa qoppiyo wode, “Abeet GODAU, ta Xoossau, neeni daro maalaalissiyaabaa oottadasa; nenaara likkettiyai ooninne baawa! Neeni nuuyyo qoppido lo77o qofaa ooninne qoodanau danddayenna” yaagida, Mazamuraawiyaagaadan gaanaadan nuna denttettees. (Maz. 40:5) Harati Yihoowanne a dirijjitiyaa nashshanaadan maaddanau, ha biiduwaa loyttidi goꞌettoos!