Yesuusi Hayqqida Asata Denttiis

HA NE beꞌiyo naꞌiyaa 12u laytta naꞌa. Yesuusi i kushiyaa oyqqi uttiis; qassi i aayyiyaanne i aaway matan eqqidosona. Eti keehi ufayttidaba milatiyoy aybissakko eray? Ane beꞌoos.

Naꞌee aaway Yaaꞌiroosa geetettiya erettida asa. Issi gallassi a naꞌiyaa sahettin, hiixan zinꞌꞌissidosona. SHin issi aynne kehana danddayibeenna. Issi sahoy goobi goobi biis. Bantta guutta naꞌiyaa hayqqana haniyaabaa milatin, Yaaꞌiroosinne a machchiyaa keehi hirggidosona. Etau ippe hara naꞌi baawa. Hegaa gishshau, Yaaꞌiroosi Yesuusa koyanau biis. I Yesuusi oottiyo maalaalissiyaabatubaa siyiis.

Yaaꞌiroosi Yesuusakko gakkiyo wode, a matan keehi cora asay deꞌees. SHin Yaaꞌiroosi cora asaa giddoora kantti biidi, Yesuusau tohuwan kunddiis. I: ‘Ta naꞌiyaa keehippe sahettausu. Hayyanaa baada o pattarkkii?’ yaagidi woossiis. Yesuusi baanau eeno giis.

Eti biishin, asay a mata shiiqanau, sugettiiddi dees. Qoppennan Yesuusi eqqi aggiis. I: ‘Tana bochchiday oonee?’ yaagidi oychchiis. Yesuusi baappe wolqqay kiyidoogaa erido gishshau, bana bochchida uray deꞌiyoogaa eriis. SHin a oonee bochchiday? Bochchidaara 12u layttaa keehippe harggada deꞌida issi maccaasiyo. A yaada Yesuusa maayuwaa bochchaanne paxa aggaasu!

Issi ura pattanaagee Yesuusa metennaagaa Yaaꞌiroosi erꞌidoogee a keehi minttettiis. SHin issi bitanee kiitaa ekkidi yiis. I Yaaꞌiroosa: ‘Yesuusa coo daafurssoppa. Ne naꞌiyaa hayqqaychchaasu’ yaagiis. Eti haasayishin Yesuusi siyidi Yaaꞌiroosassi: ‘Dagammoppa, a paxana’ yaagiis.

Eti wurssettan Yaaꞌiroosa soo gakkiyo wode, asay keehippe azzanidi yeekkiiddi deꞌees. SHin Yesuusi: ‘Yeekkoppite; naꞌiyaa xiskkausuppe attin, hayqqabeykku’ yaagiis. SHin eti naꞌiyaa hayqqidoogaa eriyo gishshau, miccidosonanne Yesuusa bolli qilliccidosona.

Hegaappe Yesuusi naꞌee aayyiyonne aawaa qassi ba kiittidoogeetuppe heezzata ekkidi, naꞌiyaa zinꞌꞌido kifiliyaa geliis. Yesuusi i kushiyaa oyqqidi: ‘Dendda!’ yaagiis. Ne hagan beꞌiyoogaadan, naꞌiyaa hayquwaappe dendda aggaasu. Qassi dendda eqqada yaa haa hemettaasu! I aayyiyaanne i aaway keehippe ufayttidoy hegaassa.

Yesuusi hayquwaappe denttido koyro asi ha naꞌiyo gidukku. Koyro i denttidoy Nayna kataman deꞌiya issi amꞌꞌee naꞌaa gidiyoogaa Geeshsha Maxaafay yootees. Hegaappe takkidi, Yesuusi Marttinne Mayraami ishaa Alꞌꞌaazaarakka hayquwaappe denttiis. Yesuusi Xoossan sunttettida kawo gididi haariyo wode, hayqqida keehi daro asaa deꞌuwau zaaridi ehaana. Hegan nuuni ufayttana bessennee?