Yesuusi Tamaarissiyo Ogiyaa

ISSI gallassi Yesuusi issi bitanee ba shooruwaa siiqana bessiyoogaa ayyo yootiis. Bitanee Yesuusa: ‘Ta shooroy oonee?’ yaagidi oychchiis. He bitanee ay qoppiiddi deꞌiyaakko Yesuusi erees. Bitanee, ba shooroti banaara ammanuwaaninne zariyan issuwaa gididaageeta giidi qoppiis. Yaatiyo gishshau, Yesuusi ayyo woygidaakko ane beꞌoos.

Yesuusi issi issi wode taarikiyaa yootidi tamaarissees. I haꞌꞌi oottidoykka hegaadaana. I yootidoy issi Ayhudanne issi Samaariyaa asa taarikiyaa. Daro Ayhudati Samaariyaa asaa dosennaagaa kase tamaarida. Yesuusi yootido taarikee hagaappe kaallidi deꞌiyaagaa:

Issi gallassi issi Ayhuda bitanee deretiya ogiyaara Yarkko wodhdhiiddi deꞌees. SHin bonqqiyaageeti a bolli kiyidosona. Eti a miishshaa ekkidi, hayqqidabaa milatana gakkanaashin a shocidosona.

Hegaappe guyyiyan, issi Ayhuda qeesee he ogiyaara aadhdhiis. I he shocettida bitaniyaa beꞌiis. I ay oottidabaa neeyyo milatii? I ubba ogiyau hara bagga gaxaa oyqqidi hemetti aggiis. Hegaappe hara keehippe ammaniyaabaa milatiya bitanee yiis. I Leewa zare. I bitaniyaa beꞌidi eqqideeshsha? CHii, ikka he shocettida bitaniyaa maaddanau eqqibeenna. Qeeseenne Leewa zaree haakkidi ogiyaa duge wodhdhiyaageeta beꞌana danddayaasa.

SHin shocettida bitaniyaara hagan deꞌiya bitaniyaa beꞌa. I Samaare asa. I Ayhuda bitaniyaa maaddiiddi deꞌees. I bitaniyaa masunttan xaliyaa wottiiddi deꞌees. Hegaappe, Ayhuda bitaniyaa, ayyo kehana gakkanaashin shemppiyo sohuwaa ekkidi biis.

Yesuusi taarikiyaa yooti wurssidi, bana oychchida bitaniyaa: ‘Ha heezzu asatuppe shocettida bitaniyau shoorodan haniday augaa gaada qoppay? Qeesee, Leewa zareeyye woykko Samaare bitanee?’ yaagidi oychchiis.

Bitanee: ‘Samaare bitaniyaa. I shocettida bitaniyaayyo qarettiis’ yaagidi zaariis.

Yesuusi: ‘Tumaa gaadasa. Neenikka baada haratussi i oottidoogaadan ootta’ yaagiis.

Yesuusi tamaarissiyo ogiyaa dosikkii? Geeshsha Maxaafan deꞌiya Yesuusi giidobata siyiyaaba gidikko, daro goꞌꞌiyaabaa tamaarana danddayoos; danddayookkonii?