Yesuusi Ataakiltte Sohuwan

YESUUSINNE i kiittidoogeeti pooqiyan deꞌiya kifiliyaappe kiyidi, Geetesamaane ataakiltte sohuwaa biidosona. Hegaappe kase ha sohuwaa darotoo yiidosona. Yesuusi eti xiskkennan woossiiddi takkanaadan yootiis. Hegaappe guuttaa haakki biidi, woossanau biittan gufanniis.

Takkidi, Yesuusi simmidi ba kiittidoogeeti deꞌiyoosaa yiis. Eti ay oottiiddi deꞌiyaabaa neeyyo milatii? Eti xiskkidosona! Eti beegotti naaganau bessiyoogaa Yesuusi heezzutoo yootiis; shin i simmi yiyo wode ubban eti xiskkiiddi deꞌiyaageeta demmiis. Heezzanttuwan Yesuusi simmi yiidi: ‘Hagaa mala wodiyan waani xiskkeetii? Tana ta morkketuyyo aattidi immiyo wodee gakkiis’ yaagiis.

Sohuwaarakka daro asay wocamiyoogee siyettiis. Beꞌa! Asay bisuwaanne dullaa oyqqidi yees! Etau pooꞌana mala xomppiyaakka oyqqidosona. Eti matattido wode, issi bitanee asaa giddoppe kiyidi Yesuusakko yiis. Hagan neeni beꞌiyoogaadan, i Yesuusa yeriis. He bitanee Asqqorootu Yihudaa! I Yesuusa aybissi yerii?

Yesuusi: ‘Yihudaa, tana yerada aatta immay?’ yaagiis. Ee, he yeroy malaata. He malaatay Yihudaara deꞌiya asati eti koyiyo bitaniyaa Yesuusa eranaadan oottees. Yaatiyo gishshau, Yesuusa morkketi a oyqqanau shiiqidosona. SHin PHeexiroosi eti Yesuusa ekkidi biyo wode coꞌꞌu giidi xeellana koyibeenna. I ba oyqqido bisuwaa shoohuwaappe kessidi, ba matan deꞌiya bitaniyaa qanxxiis. Bisoy bitaniyaa huuphiyaa halidi, ushachcha hayttaa duutti oliis. SHin Yesuusi bitaniyaa hayttaa bochchidi patti aggiis.

Yesuusi PHeexiroosassi: ‘Ne bisuwaa a sohuwan zaarada wotta. Tana ashshanau daro shaꞌan qoodettiya kiitanchchata kiittanaadan taani ta Aawaa oychchana danddayiyoogaa erikkii?’ yaagiis. Ee, i oychchana danddayees! SHin Yesuusi ba morkketi bana oyqqiyo wodee gakkidoogaa eriyo gishshau, issi kiitanchchanne kiittanaadan Xoossaa oychchibeenna. Yaatiyo gishshau, eti bana ekki baanaadan coꞌꞌu giis. Ane haꞌꞌi Yesuusa gakkidabaa beꞌoos.