SHaahuwaa 1

Medhidaagee Asau Gannatiyaa Immiis

Xoossay saluwaanne saꞌaa, qassi saꞌan deꞌoy deꞌiyoobaa medhiis; i polo bitaniyaanne polo maccaasiyo medhidi, loꞌꞌiya gannatiyan wottiis; yaatidi etau azazuwaa immiis

“XOOSSAI salotanne sa7aa koiro medhdhiis.” (Doomettaabaa 1:1) Ha qaalay hanno gakkanau xaafettidabau doometta qofa ubbaappe aadhidi erettiyaagaa. Hegaadan akeekanau metenna, maalaalissiya qaalatun, Geeshsha Maxaafay ayyaanaa kaaletuwan xaafettida xuufetu ubban keehippe xoqqa sohoy imettido Uraabaa, ubbabaa danddayiya Xoossaa, Yihoowabaa yootees. Geeshsha Maxaafan deꞌiya koyro xiqisee, Xoossay saluwaanne saꞌaa Medhidaagaa gidiyoogaa yootees. Hegaappe kaallidi deꞌiya xiqiseti gallassatun leemisettida, keehippe daro wodetun, Xoossay nuuni deꞌiyo saꞌaa medhidoogaa, qassi saꞌan deꞌiya garamissiya ubbabaakka medhidoogaa qonccissoosona.

Xoossay saꞌan medhido ubbabaappe aadhiyaagee asa. He bitanee Xoossaa leemisuwan merettiis; Yihoowayyo deꞌiya eeshshata, giishin a siiquwaanne a aadhida eratettaa bessana danddayees. Xoossay bitaniyaa biittaa baanaappe medhiis. Xoossay a Addaama giidi sunttiis; yaatidi a gannatiyan, giishin Edene ataakiltte sohuwan wottiis. He ataakiltte sohuwaa ayfiyaa ayfiya, loꞌꞌiya mittatun kumanaadan oottidi giigissiday Xoossaa.

Xoossay bitaniyau laggee koshshiyoogaa akeekiis. Xoossay Addaamappe ekkido issi gaylle meqettaa macca asa oottidi medhiis; yaatidi o Addaameyyo macho oottidi immiis; a guyyeppe Hewaano geetettaasu. Addaamee keehippe ufayttidi hagaadan giis: “Hayyashsho! Ha meqettiyaa ta meqettaappe, ha ashiyaakka ta ashuwaappe ekettidaaro.” Xoossay: “Asi ba aawaanne ba aayyiyo aggi bayidi, ba machcheera issippe de7ees; eti naa77ai issi asho gidoosona” yaagiis.—Doomettaabaa 2:22-24; 3:20.

Xoossay Addaameyyoonne Hewaaniyyo naaꞌꞌu azazuwaa immiis. Koyroy, bantta deꞌiyo saꞌaa oottanaadaaninne naaganaadan, qassi wurssettan eta zerettay saꞌaa kumanaadan yootiis. Naaꞌꞌanttoy, he aaho ataakiltte sohuwan deꞌiya mitta ayfetu ubbaappe issuwaa, “lo77uwaanne iitaa erissiya mittaa teeraappe” eti meenna mala yootiis. (Doomettaabaa 2:17) Eti azazettennaba gidikko, hayqqoosona. Bitaneenne maccaasiyaa Xoossay banttana Haariyaagaa gidiyoogaa bessana mala he azazotun etassi injjiyaa immiis. Eti azazettiyoogee a siiqiyoogaanne galatiyoogaakka bessiyo oge. Eti a loꞌꞌo haaruwau ufayttidi haarettiyo daro gaasoy deꞌees. He asatu meretan ayba pacinne baawa. Geeshsha Maxaafay: “Xoossai ba medhdhido ubbabaakka xeelliis; xeellidi daro lo77o gididoogaa be7iis” yaagees.—Doomettaabaa 1:31.

—Doomettaabaa shemppo 1⁠ninne 2n baasettidaagaa.

◼ Asatinne eti deꞌiyo saꞌay merettido hanotaa Geeshsha Maxaafay woygidi qonccissii?

◼ Xoossay bitaniyaayyoonne maccaaseeyyo ay mala deꞌuwaa immidee?

◼ Koyro azinaunne maccaaseeyyo Xoossay ayba azazuwaa immidee?

[Sinttaa 4n deꞌiya saaxiniyaa]

Xoossaa Sunttaa

Geeshsha Maxaafay Xoossaa Medhidaagaanne Ubbabaa Danddayiya Xoossaa giyaagaa mala dumma dumma boncho sunttatun qonccissees. Issi issi boncho sunttati Xoossaa eeshshata, giishin a geeshshatettaa, a wolqqaa, a suure pirddaa, a aadhida eratettaanne a siiquwaa qonccissoosona. Gidikkokka, Xoossay baassi Yihoowa giya dumma sunttaa kessiis. Geeshsha Maxaafay koyro xaafettido doonan, Xoossaa sunttay 7,000 gidiya sohuwan deꞌees; koyroy deꞌiyoy Doomettaabaa 2:4na. Yihoowa giya sunttaa birshshettay, “Hananaadan Oottees” giyoogaa. Xoossay ba halchidobaanne qaalaa gelido ubbabaa poliyoogaa malaatiyo gishshau, hegaa eriyoogee minttettiyaaba.

[Sinttaa 4n deꞌiya misiliyaa]

● Doomettaabaa

Kessaabaa

Wogaabaa

Qoodaabaa

Zaarettido Wogaa

Yaasa

Daannata

Uruto

1 Sameela

2 Sameela

1 Kawotu

2 Kawotu

1 Hanidabaa Odiya

2 Hanidabaa Odiya

Izira

Nahimiyaa

Asttiro

Iyyooba

Mazamure

Leemiso

Eranchchaa

Siiquwaa Sabaa

Isiyaasa

Ermmaasa

Ermmaasa Zilaassaa

Hizqqeela

Daaneela

Hoose7a

Yuu7eela

Amoxa

Abddiyyu

Yoonaasa

Mikiyaasa

Naahooma

Imbbaaqooma

Sofonaasa

Hagga

Zakkaariyaasa

Milkkiyaasa

Maatiyoosa

Marqqoosa

Luqaasa

Yohaannisa

Oosuwaa

Roome

1 Qoronttoosa

2 Qoronttoosa

Galaatiyaa

Efisoona

Piliphphisiyuusa

Qolasiyaasa

1 Tasalonqqe

2 Tasalonqqe

1 Ximootiyoosa

2 Ximootiyoosa

Tiitu

Pilimoona

Ibraawe

Yaaqooba

1 PHeexiroosa

2 PHeexiroosa

1 Yohaannisa

2 Yohaannisa

3 Yohaannisa

Yihudaa

Ajjuutaa