Yesuusi Hayquwaappe Denddiis

HA MACCAASIYAANNE ha naaꞌꞌu attuma asati oonakko eray? Maccaasiyaa Yesuusa kaalliya, Magddala Mayraamo. Bootta maayuwaa maayida asati qassi kiitanchchata. Mayraama a giddo xeelliyo he guutta kifilee Yesuusi hayqqin a ahaa wottido sohuwaa. He sohoy duufuwaa geetettees. SHin haꞌꞌi a ahay baawa! Oone efiiday? Ane beꞌoos.

Yesuusi hayqqoogaappe guyyiyan qeeseti PHilaaxoosassi: ‘Yesuusi paxa deꞌiiddi, i heezzu gallassappe guyyiyan denddanaagaa yootiis. Yaatiyo gishshau, duufoy naagettanaadan azaza. Yaatikko a erissiyo ashkkarati a ahaa wuuqqidi, i hayquwaappe denddidobadan haasayana danddayokkona!’ yaagidosona. PHilaaxoosi duufauwaa naagissanau wotaaddarata kiittanaadan qeesetussi yootiis.

SHin Yesuusi hayqqido heezzantto gallassi wonttimaattan, qoppennan Yihoowa kiitanchchay yiis. I duufuwaa doonaappe shuchchaa gonddorssiis. Wotaaddarati keehippe yayyido gishshau, qaaxxananne danddayibookkona. Wurssettan, eti duufo giddo xeelliyo wode, ahay baawa! Wotaaddaratuppe amaridaageeti katamaa biidi qeesetussi yootidosona. He iita qeeseti waatidaakko eray? Worddotanaadan wotaaddaratussi miishshaa immidosona. Qeeseti wotaaddaratussi: ‘Nuuni qammi xiskkidaashin, a erissiyo ashkkarati yiidi a ahaa wuuqqidosona yaagite’ yaagidosona.

Hegee hegaadan deꞌishin, Yesuusa kaalliyaageetuppe amarida maccaasati duufuwaa beꞌanau yiidosona. Eti duufoy mela deꞌiyaagaa beꞌidi ay keena dagammidonaashsha! Hegaappe qoppennan bootta maayuwaa maayida naaꞌꞌu kiitanchchati beettidosona. Eti: ‘Yesuusa hagan ayssi koyeetii? I hayquwaappe denddiichchiis. Eesuwaara biidi erissiyo ashkkaratussi yootite’ yaagidosona. Maccaasati ay keena eesoti woxxidonaashsha! SHin eta ogiyan issi bitanee essiis. I oonakko eray? I Yesuusa! I: ‘Biidi ta erissiyo ashkkaratussi yootite’ yaagiis.

Maccaasati erissiyo ashkkaratussi Yesuusi denddidoogaanne eti a beꞌidoogaa yootin, erissiyo ashkkarati hegaa ammananau metootidosona. PHeexiroosinne Yohaannisi bantta huuphen beꞌanau duufuwaakko woxxi biidosona, shin duufoy mela deꞌees! PHeexiroosinne Yohaannisi biichchin, Magddala Mayraama guyye attaasu. Duufo giddo xeellada naaꞌꞌu kiitanchchata a beꞌidoy he wode.

Yesuusa ahay waanidaakko eray? He ahaa Xoossay xayssiis. Xoossay Yesuusa denttidoy hayqqiiddi i maayido asho bollaara gidenna. I Yesuusayyo, saluwan deꞌiya kiitanchchatuugaa mala ayyaana bollaa immiis. Gidoppe attin, nuuni tamaaranau deꞌiyoogaadan, Yesuusi i haquwaappe denddidoogaa ba erissiyo ashkkaratussi bessanau, asay beꞌana danddayiyo bollaa maayana danddayees.