Gordda Deꞌiya Kifiliyaa Geliis

PHEEXIROOSINNE Yohaannisi Yesuusa ahay moogetto sohuwaappe biichchin, Mayraama yan barkka attaasu. A yeekkiyoogaa doommaasu. Hegaappe, a aadhdhida misiliyan nuuni beꞌidoogaadan, hokkada duufo giddo xeellaasu. Hegan a naaꞌꞌu kiitanchchata beꞌaasu! Eti o: ‘Ayssi yeekkay?’ yaagidi oychchidosona.

Mayraama: ‘Ta Godaa efiichchidosona, eti a awan wottidaakkonne erikke’ yaagada zaaraasu. Hegaappe Mayraama guyye simma xeellada issi bitaniyaa beꞌaasu. I o: ‘Neeni koyiyoy oonne?’ yaagidi oychchiis.

Mayraama bitanee ataakilttiyaa naagiyaagaa, qassi Yesuusa ahaa geella i ekkennan aggenna yaagada qoppaasu. Hegaa gishshau a bitaniyaayyo: ‘A neeni ekkidabaa gidikko, awan wottidaakko tau yootarkkii’ yaagaasu. SHin tumuppe he bitanee Yesuusa. I Mayraama erenna bollaa mayiis. SHin i, i sunttaa xeesin, Mayraama i Yesuusa gidiyoogaa eraasu. A woxxa baada erissiyo ashkkaratussi: ‘Taani Godaa beꞌaasi!’ yaagaasu.

He gallassi guuttaa takkidi, naaꞌꞌu erissiyo ashkkarati Emaahusa giyo katamaa biishin, issi bitanee etaara issippe biis. Asay Yesuusa worido gishshau, he erissiyo ashkkarati keehippe azzanidosona. SHin eti ogiyan biishin, he bitanee eta minttettiya darobaa Geeshsha Maxaafaappe qonccissiis. Wurssettan, eti kattaa maanau uttido wode, erissiyo ashkkarati he bitanee Yesuusa gidiyoogaa eridosona. Hegaappe Yesuusi etappe geemmi aggin, he naaꞌꞌu erissiyo ashkkarati kiitettidaageetussi abaa yootanau sohuwaara bantta yiido ogiyaara guyye simmidi Yerusalaame biidosona.

Hegee hegaadan deꞌishin, Yesuusi PHeexiroosayyokka beettiis. Harati hegaa siyidi garamettidosona. Hegaappe he naaꞌꞌu erissiyo ashkkarati Yerusalaame biidi kiitettidaageeta demmidosona. Yesuusi banttasikka ogiyan waanidi beettidaakko etassi yootidosona. Eti hegaa yootiiddi deꞌishin, issi garamissiyaabi aybi merettidaakko eray?

Ha misiliyaa beꞌa. Karee gorddetti uttidabaa gidikkokka, Yesuusi he kifiliyan kiyi wodhdhiis. Erissiyo ashkkarati ayba ufayttidonaashsha! Hegee keehi ufayssiya gallassa gidennee? He wode gakkanaashin, Yesuusi ba erissiyo ashkkaratussi apputoo beettidaakko qoodana danddayay? Ichchashaa qoodadii?

Kiitettida Toomaasi Yesuusi beettiyo wode etaara issippe deꞌenna. Yaatiyo gishshau, erissiyo ashkkarati assi: ‘Nuuni Godaa beꞌida!’ yaagidosona. SHin Toomaasi i ba huuphe Yesuusa beꞌennan deꞌiiddi, hegaa ammanennaagaa yootiis. Hegaappe hosppun gallassappe guyyiyan, erissiyo ashkkarati haranttuwaakka gorddettida kifiliyan issippe deꞌoosona; he wode Toomaasikka etaara deꞌees. Eti qoppennan Yesuusi he kifliyan kiyi wodhdhiis. He wode Toomaasi ammaniis.