Issi Haruuruwan Markkabee Meqqiis

XEELLA! Markkabee meto bolli deꞌees! I meqerettiiddi deꞌees! Haattan guppi gelida asata beꞌay? Etappe amaridaageeti haattaappe gaxaa kiyiiddi deꞌoosona. Hegee PHaulooseeyye? A bolli aybi gakkidaakko ane beꞌoos.

PHauloosi naaꞌꞌu layttau Qiisaariyan qashetti takkidoogaa hassaya. Hegaappe anne hara qashettida asata markkabiyan gelissin, Roome biyoogaa doommidosona. Eti Qarxxeesa giyo haruuruwaa mataara aadhdhishin, wolqqaama gotee eta sugiis. Carkkoy keehippe carkkiyo gishshau, markkabiyaa eti koyidosaa laaggana danddayibookkona. Eti gallassan awa ayfiyaa woykko qamman xoolinttiyaa beꞌana danddayibookkona. Wurssettan, daro gallassaappe guyyiyan, markkabiyaa giddon deꞌiya asay attana giyo hidootaa xayiis.

Hegaappe PHauloosi denddi eqqidi: ‘Intte giddoppe ooninne hayqqenna; shin markkabe xallay meqqana. Ayssi giikko, zino qammi Xoossaa kiitanchchay taakko yiidi tana: “PHauloosaa yayyoppa! Neeni Roome biittaa haariya Qeesaare sinttan eqqana. Qassi nenaara markkabiyan deꞌiya asaa ubbaa Xoossay ashshana” yaagido gishshataassa’ yaagiis.

Gotee denddido 14tta gallassi qammaappe 6n saate heeran, markkabiyaa laaggiyaageeti haattay ciimmatennasaa gakkidoogaa akeekidosona. Eti qamman markkabee zaallaara domꞌꞌettidi meqqana giidi yayyido gishshau, markkabee beenna mala oyqqiya birataa haatta giddo yeggidosona. Wonttetta gallassi maallado eti haattay biittaakko gelidosaa beꞌidosona. Eti markkabiyaa he haatta gaxa biittaakko laagganau qofaa qachchidosona.

Eti gaxaakko kiyanau matattishin, markkabee abba giddon kuurettida shafiyan xishetti aggiis. Hegaappe beetay a shociyoogaa doommin, markkabee meqerettiyoogaa doommiis. Naagiya wotaaddaratu halaqay: ‘Haattaa waraa eriya ubbati haattan guppi gelidi gaxi kiyite. Harati qassi eta geeduwaa guppi gelidi, markkabiyaappe meqqidabaa oyqqidi gaxaa kiyite’ yaagiis. Etikka oottidoy hegaadaana. Hegaadan oottidi markkabe giddon deꞌiya 276n asay ubbay kiitanchchay qaalaa gelidoogaadan, haattaappe gaxi saruwan kiyidosona.

He haruuroy Maltta geetettees. Yan deꞌiya asay daroppe keha; eti markkabiyaappe kiyida asata mokki ekkidosona. Carkkoy woppu giido wode, PHauloosa hara markkabiyan Roome efiidosona.