Phauloosi Roomen

PHAULOOSI sanssalatan qashettidoogaanne Roome wotaaddaray a naagiyaagaa beꞌa. PHauloosi Roomen qashuwan deꞌees. I, Rooma Kawoy Qeesaari pirddana gakkaanashin naagiiddi deꞌees. I qashuwan deꞌiyo wode, asay a oychchennaadan digettibeenna.

PHauloosi Roome gelido heezzantto gallassi, Ayhudatu halaqati amaridaageeti banaara yiidi gayttana mala etau kiittiis. Hegaa gishshau, Roomen deꞌiya daro Ayhudati akko yiidosona. PHauloosi etassi Yesuusabaanne Xoossaa kawotettaabaa sabbakiis. Amaridaageeti ammanidi Kiristtaane gididosona; shin harati ammanibookkona.

PHauloosi bana naagiya dumma dumma wotaaddaratussikka sabbakiis. PHauloosi qashettidi takkido naaꞌꞌu laytta wodiyan demmido asa ubbau sabbakiis. Hegaappe denddidaagan, Qeesaara soo asay attennan Kawotettaa mishiraachchuwaa siyidi, etappe amaridaageeti Kiristtaane gididoosona.

SHin a oychchanau yiidi, uttidi xaafiyaagee hagee oonee? Malana danddayay? Ee, i Ximootiyoosa. Kawotettaabaa sabbakido gishshau, Ximootiyoosikka qashettiis; shin i qashuwaappe birshshettiis. Hagau i PHauloosa maaddanau yiis. Ximootiyoosi ay xaafiiddi deꞌiyaakko eray? Ane beꞌoos.

Taarike 110n deꞌiya Piliphphisiyuusanne Efisoona katamata hassayay? PHauloosi he katamatun Kiristtaane gubaaꞌeti eqqanaadn maaddiis. PHauloosi qashuwan deꞌiiddi, he Kiristtaanetussi dabddaabbiyaa xaafiis. He dabddaabbeti Geeshsha Maxaafaa giddon deꞌoosona; eti Efisoonanne Piliphphisiyuusa geetettoosona. PHauloosi Piliphphisiyuusan deꞌiya bantta Kiristtaane laggetussi Ximootiyoosi xaafanabaa yootiiddi deꞌees.

Piliphphisiyuusan deꞌiya asati PHauloosayyo daro kehidosona. Eti PHauloosi hagan qashuwan deꞌishin assi imotaa kiittin, PHauloosi hegaassi eta galattiiddi deꞌees. He imotaa ehiidaagee Eppafiroditoosa. SHin i keehippe sahettidi hayqqiichchidi attiis. Hegaappe ayyo kehin paxidi, soo simmanau giigiis. I Piliphphisiyuusa simmi biyo wode, PHauloosinne Ximootiyoosi kiittiyo ha dabddabbiyaa etassi efaana.

PHauloosi qasho keettan deꞌiiddi, Geeshsha Maxaafan deꞌiya hara naaꞌꞌu dabddaabbeta xaafiis. Issoy Qolasiyaasan deꞌiya Kiristtaanetussi xaafidoogaa. I ayba geetetti xeegettiyaakko eray? Qolasiyaasa geetettees. Naaꞌꞌanttoy qassi, Qolasiyaasan deꞌiya ba mata laggiyaa Pilimoonassi xaafidoogaa. He dabddaabbee Pilimoona ashkkaraa Anaasimoosabaa xeelliyaagaa.

Anaasimoosi Pilimoonappe baqatidi Roome biis. PHauloosi yan qashuwan deꞌiyoogaa Anaasimoosi auppekko siyiis. Anaasimoosi bana oychchanau yin, PHauloosi ayyo sabbakiis. Anaasimoosikka takkennan Kiristtaane gidiis. Anaasimoosi baqatido gishshau, haꞌꞌi azzaniis. Yaatiyo gishshau, PHauloosi ha dabddaabbiyan Pilimoonassi ay xaafiyakko eray?

PHauloosi, Anaasimoosayyo atto gaanaadan Pilimoona oychchiis. PHauloosi: ‘Taani a neekko zaarada yeddayis. SHin i haꞌꞌi neessi ashkkara xalla gidennan, loꞌꞌo Kiristtaane isha’ yaagidi xaafiis. Anaasimoosi Qolasiyaasa simmidi biyo wode, ha naaꞌꞌu dabddaabbeta ekkidi biis; issuwaa Qolasiyaasa asau haraa qassi Pilimoonassi efiis. Pilimooni ba ashkkaray Kiristtaane gididoogaa eridi, ay keena ufayttidaakko qoppana danddayoos.

PHauloosi Piliphphisiyuusa asaassinne Pilimoonassi xaafiyo wode, i etassi yootiyo mishiraachchoykka deꞌees. PHauloosi Piliphphisiyuusa asaassi: ‘Taani Ximootiyoosa sohuwaara inttekko yeddana. SHin taanikka mata wode inttekko baana’ yaagiis. Qassi Pilimoonayyo i: ‘Ne matan taani shemppanasaa taayyo giigissa’ yaagiis.

PHauloosi birshshettidi, darosan deꞌiya ba Kiristtaane ishatanne michchota oychchiis. SHin takkidi PHauloosi naaꞌꞌanttuwaakka Roomen qashettiis. He wodiyan eti a woranaagaa eriis. Hegaa gishshau, Ximootiyoosi baakko eesuwan yaanaadan dabddaabbiyaa xafiis. PHauloosi: ‘Taani Xoossassi ammanettaas; qassi Xoossaykka taayyo woyituwaa immana’ yaagiis. PHauloosa woridoogaappe guutta layttaa takkidi, Yerusalaamee naaꞌꞌanttuwaakka xayiis; he wode xayidoy Roometuuna.

SHin Geeshsha Maxaafan hara darobi deꞌees. Xoossaa Yihooway, kiitettida Yohaannisi Ajjuutaa maxaafaa gujjin, Geeshsha Maxaafaa wurssetta maxaafata xaafanaadan oottiis. Geeshsha Maxaafaa giddon deꞌiya he maxaafay sinttanaabaa yootees. Sinttaara yiya wodee ay oyqqidaakko ane haꞌꞌi tamaarana.