SHaahuwaa 4

Xoossay Ba Halchchuwaabaa Nuna Erissees

1, 2. Wozanappe eranau oychchiyaageetuyyo Xoossay zaaruwaa immiyoogaa nuuni waati eranee?

SIIQIYA Xoossay bana koyiya ashkke aasatuyyo, ba halchchuwaa tumuppe qonccissees. Eranau oychchiya asau, tuggay deꞌishin Xoossay coꞌꞌu giidi xeelliyoy aybissakkonne qassi hegaa mala hara oyshaukka zaaruwaa immees.

² Geeshsha Maxaafay: “Neeni a [Xoossaa] koyikko, i neeyyo beettana.” “Xuurata qonccissiya issi Xoossai saluwan de7⁠ees.” “Ubbaa Haariya GODAI ba xuuraa hananabaa yootiya ba ashkkaratussi kasetidi qonccissennan de7⁠iiddi, aibanne oottenna” yaagidi qonccissees.—1 Hanidabaa Odiya 28:9; Daaneela 2:28; Amoxa 3:7.

Zaaruwa Demmanay Awappee?

3. Xoossay tuggay deꞌishin aybissi coꞌꞌu giidi xeelliyaakko nuuni zaaruwaa demmana danddayiyoy awappee?

³ Xoossay tuggay deꞌishin aybissi coꞌꞌu giidi xeelliyaakkonne tuggaa i waatanau deꞌiyaakko, qassi hegaa mala denddiya hara oyshatuuyyo zaaroy beettiyoy i nu goꞌꞌaayyo xaafissido, geeshsha ayyaanan kaaletettidi xaafettida xuufe garssaana. He xuufee a Qaalaa, Geeshsha Maxaafaa. “Xoossaa maxaafa ubban Xoossaa Ayyaanai de7⁠ees. Qassi he maxaafati Xoossau oottiya asi kumettanne lo77⁠o ooso ubbau giigidaagaa gidana mala, tumatettaa tamaarissanau, balaa seeranau, mooruwaa suurissanaunne xillotetta de7⁠uwau zoriyaa immanau maaddoosona.”—2 Ximootiyoosa 3:16, 17.

4, 5. Geeshsha Maxaafaa dumma maxaafa oottiyaabi aybee?

⁴ Geeshsha Maxaafay tumuppe dumma maxaafa. I keehippe tuma gidida, asaa naatu taarikiyaanne qassi asa naati merettanaappe kase deꞌiyaabaakka oyqqiis. A garssan deꞌiya hiraagati nu wodiya hanotatanne sinttappe matan hanettiyaabaakka gujjiyo gishshau, Geeshsha Maxaafay ha wodiyaukka goꞌꞌiyaagaa.

⁵ Taarikiyaa suure ogiyan yootiyoogan, aara laggetiya ay maxaafikka baawa. Leemisuwaassi, beni wode hara xaafetun kushiyan xaafettida xuufetuppe amaridaageetu xallay deꞌoosona. Giddoppe attin, amaridaageeti kumettanne amaridaageeti bagga gidida kushiyan xaafettida daro Geeshsha Maxaafaa xuufeti: Ibrayssixe Geeshsha Maxaafaappe 6,000 gidiya (39 Maxaafay “Galꞌꞌa Maachchaa”), Giriike Geeshsha Maxaafaappe 13,000 gidiya (27 Maxaafay “Ooratta Maachchaa”) maxaafati deꞌoosona.

6. Ha wodiyan deꞌiya Geeshsha Maxaafay oyqqido qofay, koyro Xoossaa ayyaanan kaaletettidi xaafettidaagaara issi mala gidiyoogaa ammanana danddayiyoy aybissee?

⁶ Ubbaa Haariya Xoossay, Geeshsha Maxaafaa geeshsha ayyaanan kaalettissidi xaafissidaagee, Geeshsha Maxaafaa suuretettay kushiyan xaafettida xuufetun naagetidi, takkanaadan oottiis. Yaatiyo gishshau, ha wodiyan deꞌiya Geeshsha Maxaafati oyqqido qofay koyro geeshsha ayyaanan kaaletettidi xaafettida maxaafaara issi mala. Ha yohuwaa nuuni nashshanaadan maaddiya hara gaasoy, ha kushiyan xaafettida maxaafatuppe amarida Kiristtaane Giriike Xuufeti, koyro xuufeti xaafetoogaappe guyyiyan issi xeetan qoodettiya layttaappe simmin gidiyoogaa. Beni wode hara asati kushiyan xaafido xuufetuppe hanno gakkanau deꞌiyaageeti guutta gidishshin, hegeetuppekka koyro xuufetukko unddenna xeetan qoodettiya layttankka matattiyaageeti guutta.

Xoossaa Imotaa

7. Geeshsha Maxaafay ay keena aahotettan gakkidee?

⁷ Asaa naata keehippe aahuwan gakkiyoogan Geeshsha Maxaafaara laggetiya maxaafi taarkiyan baawa. Oyddu biilooneppe dariya maxaafay attamettiis. Qooday hagaayyo matattiyo hara ay maxaafinne baawa. Qassi 2,250⁠ppe dariya doonan, kumetta woy bagga Geeshsha Maxaafay birshshettiis. Yaatiyo gishshau, saꞌan deꞌiya asaappe Geeshsha Maxaafaa demmana danddayiyay xeetaappe 90⁠u kushe gidana geeteti qofettees.

8-10. Geeshsha Maxaafaa pilgganau koshshiyoogaa bessiya gaasotuppe issooti issooti awugeetee?

⁸ Kareeranne soora deꞌiya naqaashsha ubbay a tumatettaa bessiyo, ba huuphenkka Xoossaa maxaafa gidiyoogaa yootiya maxaafaa pilgganau koshshiyoogau siree baawa.a Geeshsha maxaafay asay deꞌiyoy aybissakko, alamiyan hanettiyaabay aybissi haniyakkonne sinttaara yiya wodee ay oyqqidaakko yootees. Hara ay maxaafinne hegaa yootana danddayenna.

⁹ Ee, Geeshsha Maxaafay Xoossay asau ba qofaa erissiyo maxaafa. I 40 gidiya asata Geeshsha Maxaafaa xaafanaadan ba wolqqan woy ayyaanan kaalettiis. Yaatiyo gishshau, Xoossay nuuyyo haasayiyoy, ba Qaalaa Geeshsha Maxaafaa baggaara. Yesuusi Kiittido PHauloosi: “ Intte nuuppe Xoossaa qaalaa tuma gididoogaadan ekkido wode, Xoossaa kiitadan ekkidoogaappe attin, asa kiitadan ekkibeenna gishshau, nuuni Xoossaa ubba wode hegaa gaasuwan galatoos” yaagidi xaafiis.—1 Tasalonqqe 2:13.

¹⁰ Abrahaam Linkkolin geetettiya, 16^ntta Amerkka Pirezddanttee, Geeshsha Maxaafay “Ayba wodiyaaninne gidin Xoossay immido hara ayba imotaappekka aadhdhiya imota. . . I baynnaakko nuuni iitaa kehaappe shaakki eranau danddayokko” yaagidi qonccissiis. Haꞌꞌi yaatin, ha ubbabaappe aadhdhiya Xoossaa imotay tuggay waani doommidaakko, Xoossay tuggay deꞌishin aybissi coꞌꞌu giidi xeelliyakkonne i hegaa waatanau deꞌiyakko odiyoobay aybee?

[Tohossa qofaa]

[Sinttaa 10n deꞌiya misiliyaa]

Geeshsha Maxaafay xaafettidoy, Xoossay ba ayyaanan kaalettiina; Xoossay asau ba qofaa erissiyoy aana