Geeshsha Maxaafaa Pilggana Bessiyoy Aybissee?

Geeshsha Maxaafaa loyttada eray? Taarike wode ubban Geeshsha Maxaafaadan daro asaa gakkida maxaafi baawa. Geeshsha Maxaafaa giddon deꞌiya qofay minttettuwaunne hidootau kane gidiyoogaanne an deꞌiya zoree galla galla deꞌuwau keehippe goꞌꞌiyoogaa ubba wogan deꞌiya asay akeekiis. Gidikkonne, ha wodiyan deꞌiya daroti Geeshsha Maxaafaabaa erokkona. Neeni haymaanootee deꞌiyo asa gidin aggin, Geeshsha Maxaafaabaa eranau keehippe koyennan aggakka. Ha brooshuree Geeshsha Maxaafaa giddon deꞌiya waanna qofaa neeni qanttan eranaadan giigiis.

NEENI Geeshsha Maxaafaa nabbabiyoogaa doommanaappe kase, he maxaafaa xeelliyaagan amaridabaa eriyoogee maaddees. Geeshsha Maxaafay Doomettaabaa maxaafaappe biidi Ajjuutaa maxaafaa gakkanaashin deꞌiya, 66n maxaafata oyqqiis.

Geeshsha Maxaafau aawatiyay oonee? Hegee denttana bessiyo oysha. Geeshsha Maxaafaa 1,600 gidiya laytta giddon, 40 gidiya asati xaafidosona. He asati Geeshsha Maxaafau aawatoos gibeennaagee akeekana bessiyaaba. Xaafida asatuppe issoy: “Xoossaa maxaafa ubban Xoossaa Ayyaanai de7ees” yaagiis. (2 Ximootiyoosa 3:16) Haray qassi: “GODAA Ayyanai ta baggaara haasayees; a qaalai ta inxxarssan de7ees” yaagiis. (2 Sameela 23:2) Xaafida asati hegaadan giidi, Geeshsha Maxaafau Aawatiyay Ubbabaa Haariya, Xoossaa Yihoowa gidiyoogaa yootidosona. Geeshsha Maxaafaa xaafida asati, asaa naati bana loytti eranaadan Xoossay koyiyoogaa qonccissidosona.

Geeshsha Maxaafaa loytti eranau koshshiya harabay deꞌees. Geeshsha Maxaafay issi waanna qofaa yootees; hegeekka, asaa naata haarana bessiyay Xoossaa gidiyoogaa saluwan deꞌiya ba Kawotettaa baggaara i boxooxissiyoogaa. Kaalliya sinttatun, Doomettaabaappe biidi Ajjuutaa gakkanaashin he waanna qofay Geeshsha Maxaafan ubbasan deꞌiyoogaa neeni akeekana.

Qommoora deꞌiya qofaa hassayada, alamiyan keehi erettida maxaafan, Geeshsha Maxaafan deꞌiya waanna qofaa ane beꞌa.

[Box on page 3]

Geeshsha Maxaafaa Xeelliyaagan Maaddiya Qofata

◼ I xaafettidoy 1513 K.K. biidi 98 M.L. gakkanaashin deꞌiya 1,610u laytta giddoona.a

◼ Koyro 39n maxaafatuppe daro baggay Ibraysxxe qaalan, amaridaagee qassi Aramaykke qaalan xaafettiis; he maxaafati Ibraysxxe Geeshsha Maxaafaa xuufeta woykko “Galꞌꞌa Maachaa” geetettoosona.

◼ Wurssetta 27n maxaafati Giriiketto qaalan xaafettidosona; he maxaafati Kiristtaane Giriike Geeshsha Maxaafaa xuufeta woykko “Ooratta Maachaa” geetettoosona.

◼ Geeshsha Maxaafay shemppuwaaninne payduwan shaahettees. Leemisuwau, Maatiyoosa 6:9, 10y, Maatiyoosa maxaafaa 6tta shemppuwaa, paydo 9nne 10 malaatees.

[Footnotes]