Xoossay A Dabbo Gidanaadan Neena SHoobbees

Xoossay neeni a dabbo gidanaadan koyees. Salo gufantton-saꞌa micettan ooppenne keehi gita Uraara neeni dabbo gidana danddayiyoogaa qoppa eray? Daro wodeppe kase deꞌida Abrahaami, Xoossaa dabbo geetettidi xeesettiis. (Yaaqooba 2:23) Geeshsha Maxaafaa giddon etabay odettido haraatikka, Xoossaa dabbo gididi ufayttidosonanne keehippe anjjettidosona. Ha wodiyan, saꞌan ubba heeraappe asay Xoossaa dabbo gidiiddi deꞌees. Neenikka Xoossaa dabbo gidana danddayaasa.

Xoossaa dabbo gidiyoogee, ay asaarakka gidin dabbotiyoogaappe aadhdhiyaaba. Xoossay banan ammanettida dabbota mule yeellayenna. (Mazamure 18:25) Miishshan duretiyoogaappe Xoossaa dabbo gidiyoogee aadhdhees. Issi dure uri hayqqiyo wode, a miishshay haraatuyyo gidees. SHin, Xoossaa dabbo gididaageetuyyo, ooninne ekkana danddayenna miishshay deꞌees.—Maatiyoosa 6:19.

Issi issi asay neeni Xoossaabaa tamaariyoogaa agganaadan oottanau malana danddayees. Ubba ne laggetuppenne ne soo asaappe issooti issooti hegaadan oottana danddayoosona. (Maatiyoosa 10:36, 37) Haraati nena qoosiyaaba woykko yashissiyaaba gidikko, hagaadan yaagada ne huuphiya oychcha, ‘Taani oona ufayssana koyiyaanaa? Asaayye woy Xoossaa?’ Ane hagaa qoppa: Issi uri neeni kattaa miyoogaa aggana mala yootikko, he uraa siyay? Siyennaagee qoncce! Ne deꞌanau kattaa maana koshshees. Xoossay qassi nena merinau deꞌana mala oottana danddayees! Hegaa gishshau, ooninne nena Xoossaa dabbo gidana danddayiyo ogiyaa tamaariyoogaa digganaadan eeno gooppa.—Yohaannisa 17:3.