SHaahuwaa 7
Makkalay Ay Kaalettidee?
1-3. Yihooway giidoogee tuma gidiyoogaa wodee waati qonccissidee?
XOOSSAA haaruwaa maataa bolli denddida oyshaa xeelliyaagan, asay Xoossaappe gaxi kiyidi, daro xeetu laytta wodiyaassi banttana haarido hanotay ay kaalettidee? Asaa haaroy Xoossaagaappe kehiyoogee qonccidee? Asay asaa haari aadhdhido meqetti baynna hanotaa xeellidi pirddikko, asaagee Xoossaagaappe mule kehenna.
2 Nu koyro aawayinne aayyiyaa Xoossaa haaruwaa ixxis giidogaappe kaallidi, bashshay gakkiis. Eti bantta huuphiyaunne eti yelido asaa naatu ubbaassi tuggaa ehiidosona. Hegaassi gaasoy etappe attin hara oonanne gidana danddayenna. Xoossaa Qaalay: “Intte ammanettennanne aibaunne pattenna, nagaranchchanne balettiya yeleta gidiyo gishshau, a asa gidanau intte bessekketa” yaagees.—Zaarettido Wogaa 32:5.
3 Addaameenne Hewaana Xoossaa giigissuwaappe gaxi kiyikko, eta deꞌoy shoraa xayidi wurssettan hayqqanaagaa Xoossay seeridoogee tuma gidiyoogaa taarikee bessees. (Doomettaabaa 2:17; 3:19) Eti Xoossaa haaruwaappe kiyidosona; aqi peeꞌidi eta deꞌoy shoraa xayiiddi bin wurssettan hayqqidosona.
4. Nuuni ubbay polo gidennaageeta, harggiyaageetanne hayqqiyaageeta gididi yelettidoy aybissee?
4 Hegaappe guyyiyan, eta naatu ubbaa bolli gakkidabay Roome 5:12y, yootiyoogaadaana: “Nagarai ha sa7aa issi asa baggaara geliis; he nagarai banaara haiquwaa ehiis; hegaa gaasuwan, . . . haiqoi asa zare ubbaa gakkiis.” Nu koyro aawaynne aayyiyaa Xoossay bollatidi haariyo maataa bolli makkalido gishshau, balabaa oottiya nagaranchcha gididosona. Meretan demmobaa zaree laattiyo higgiyaara (genetics) maayettiya ogiyan, eti bantta naatussi polo gidenna deꞌuwaa laatissidosona. Nuuni ubbaykka balabaa oottiyaageeta, harggiyaageetanne hayqqiyaageeta gididi yelettidoy hegaassa.
5, 6. Asay tumu sarotettaanne ishaluwaa ehaanau oottido baaxiyaabaa taarikee ay bessii?
5 Hegaa mala hanotan daro xeetu layttati aadhdhidosona. Dumma dumma haariyo ogeta asay beꞌiis. Asay qoppiyo aysso ubbaa mali beꞌiis. Gidikkokka, asaa naata barchchiya bessiya iita hanotay bolli bollan gakkiis. Usuppun shaꞌu layttaappe guyyian, asay alame yuushuwan sarotettan, likke pirddaaninne aquwan gita dichchaa bessana; ha wodiyan ubba kehatettaa, qaretaanne issoy issuwaara maadettiyoogaa bessiyo ogiya loytti akeekanau danddayees giidi issi asi qoppana danddayees.
6 Gidikkonne, hanettiiddi deꞌiyaabay, hegaappe keehi dumma. Ubbaassi tumu sarotettaanne ishaluwaa ehaana danddayida asa ayssoy baawa. Aadhdhida 20ntta xeetu layttatu xallan, Jarimane biittan Naazeti bessenna gaasuwan miilooniyan qoodettiya asaa buttidosonanne 100u miilooniyaappe dariya asay olan gooraꞌettiis. Nu wodiyan, issoy issuwaa danddayidi deꞌennaagaappenne polotikkan dummattiyoogaappe denddidaagan qoodi baynna asay barchchiya beꞌees, qasheteesinne hayqqees.
Ha Wodiyan Deꞌiya Hanotaa
7. Haꞌꞌi deꞌiya asaa hanotaa waati qonccissana danddayiyoo?
7 Hegaa bollankka, haꞌꞌi asaa naati deꞌiyoosan ubban hanettiyaaba ane xeella. Danoynne makkalay aakkiis. Bessenna ogiyan jallissiya xaliyaa goꞌettiyoogee aakkiis. Asho gayttotettan oyqqiya harggekka aakkiis. Yashshiya eedisee [AIDS] miilooniyan qoodettiya asaa wurssiiddi deꞌees. Layttan layttan tamu miilooniyan qoodettiya asay namisan woykko harggiyan hayqqees; shin guutta qooday deꞌiyoogeeti keehippe dure. Asay biittaa hambbalaachcheesinne boggees. So asaa duussaynne kandduwau deꞌiya xeelay ubba heeran gatiya xayiis. Tumuppe, ha wodiya deꞌoy ‘ha saꞌaa xoossaa’ gidida Seexaanaa iita haaruwaa bessees. Seexaanay haariyo alamee siiqoy xayido irxxaa, meqetti baynnaagaanne muleera kanddoy moorettoogaa.—2 Qoronttoosa 4:4.
8. Nuuni asay oottidobata tumu dichcha gaana danddayennay aybissee?
8 Asay saynnissiyaninne banttau koshshiyaabaa giigissiyoogan koyosaa gakkanaadan Xoossay gidiya wodiya immiis. SHin wonddafeenne zubbee zayyiyan, tankkiyan, bombbiyaa oliya jettiyaaninne nukilere-missaylliyan laamettoogee tumu dichchee? Asay shaaraappe aadhdhidi baanau danddayidi, saꞌan issippe saruwan deꞌanau danddayennaagee dichchee? Asay qamman ogiyaara hemettanau woykko issi issi heeran gallassi hemettanau yayyiyoogee dichchee?
Wodee Bessidobaa
9, 10. (a) Aadhdhida daro xeetu layttati ay qoncciyan bessidonaa? (b) Xoossay koyidobaa oottiyo maataa diggibeennay aybissee?
9 Aadhdhida daro xeetu layttatun paacci xeellidobay, asay Xoossaa haaruwaappe gaxi kiyidi ba hemetaa suurissanau danddayennaagaa qonccissiis. Asay meennan, uyennaaninne ayyiriyaa shemppennan deꞌana danddayennaagaadan, Xoossaa haaruwaappe gaxi kiyidi deꞌanaageekka danddayettennaba. Naqaashshay qoncce: Nuuni qumay, haattaynne ayyiree koshshiyoogeeta gididi merettidoogaadan Xoossaa kaaletoykka koshshiyoogeeta gididi merettida.
10 Xoossay iitatettaa coꞌꞌu giidi xeellidi, naaꞌꞌantto zaarettennaadan ubba wodiyau oottiya ogiyan, koyidobaa oottiyo maataa bessenna ogiyan goꞌettiyoogee ehiyo azzanttiya hanotaa beꞌanaadan oottiis. Koyidobaa oottiyo maatay alꞌꞌo imota gidiyo gishshau, Xoossay eti ha imotaa goꞌettennaadan oottiyoogaappe bessenna ogiyan goꞌettiyoogee ay kaalettiyaakko beꞌanaadan oottiis. Xoossaa Qaalay: “Ba hemetaa suurissanaagee aawu shene gidennaagaa taani erais” yaagidi tumaa yootees. Qassi, “Issi asi bau de7iya haariyo maataa hara asa qohanau go7ettiyoogaa be7aas” yaagiyoogekka tuma.—Ermmaasa 10:23; Eranchchaa 8:9.
11. Asay haarido ogetuppe tuggaa xayissidaagee deꞌii?
11 Asay haaranaadan Xoossay usuppun shaꞌu layttau coꞌꞌu giidi xeellidoogee asay tuggaa xayssana danddayennagaa qoncciyan bessiis. Asi awudenne hegaadan oottana danddayibeenna. Leemisuwau, Israaꞌeela Kawuwaa Solomoni ba wode, bau deꞌiya aadhdhida eratettan, duretettaaninne wolqqa ubban asa haaruwaappe denddidaagan merettiya metuwaa giigissana danddayibeenna. (Eranchchaa 4:1-3) Hegaadankka, ha wodiyan alamiyan haariyaageeti, xoqqa sohuwaa gakkida bantta hiillankka, tuggaa xayissana danddayibookkona. Asay xoossaa haaruwaappe gaxi kiyidoogee, tuggay ubba haa daranaadan oottidoogaappe attin xayissana danddayibeennaagaa taarikee bessiis.
Xoossay Adussi Xeellidi Oottidobaa
12-14. Xoossay tuggaa coꞌꞌu giidi xeellidoogan ay adussa wode goꞌꞌay beetii?
12 Xoossay tuggaa coꞌꞌu giidi xeelliyoogee, nuuni metootanaadan oottiis. SHin i sinttappe wurssettan yiya loꞌꞌobaa eriyo gishshau, adussidi xeelliis. Xoossaa adussa xeelay meretatussi guutta laytta xallau woy guutta shaꞌu laytta xallau gidennan miilooniyan qoodettiya layttaassi, ee, ubba merinau goꞌꞌiyaaba.
13 Sinttappe issi asi Xoossay ubbabaa oottiyo ogiya xeelliyaagan oyshaa denttidi, koyidobaa oottiyo maatan bessenna ogiyan goꞌettiyo hanotay merettikko, he izaawu qofay tumakkonne shaakkanau, wodiya immiyoogee koshshennaba. Xoossay makkalanchchatussi shaꞌan qoodettiya wodiya immido gishshau, yunivesse giddon awan gidikkokka merinau goꞌettana danddayiyo giigissuwaa oottiis.
14 Yihooway ha wodiyan iitatettaanne tuggaa coꞌꞌu giidi xeellido gishshau, aara moggottenna aybakka gidin ayfana danddayennaagaa hanotay gidissidi boxooxissiis. Hegee Xoossan zemppibeenna asa woy ayyaana mereta hayyoy adussa wode goꞌꞌaa ehaana danddayennaagaa, sirissenna ogiyan bessees. Hegaappe guyyiyan, Xoossay ay makkalanchchaakka sohuwaara xayssikko, suure pirdda gidees. “GODAI . . . iitata ubbaa xaissana.”—Mazamure 145:20; Roome 3:4.
[Sinttaa 15n deꞌiya misiliyaa]
Nu koyro aawaynne aayyiyaa Xoossaa haaruwaappe gaxi kiyidoogaappe guyyiyan, wurssettan ceeggidi hayqqidosona
[Sinttaa 16n deꞌiya misiliyaa]
Xoossaappe haakkida asaa haaroy waayee kumidoogaa gidiyoogee qoncciis
[Misilee Ekettidosaa]
U.S. Coast Guard photo